قازاق قوعامىن تەرەڭ ويعا سالىپ، تولقىتىپ، تولعاندىرىپ تۇرعان جەر مەن ءتىل جانە كەشەگى «سەكتانتتاردىڭ سويقانى» سەكىلدى ماسەلەلەردى ءبىر ساتكە ىسىرا تۇرىپ (اتالعان جايتتاردى ۇلىقتارىمىز ۇمىتىپ كەتىپ جاتقان سوڭ وسىلاي دەۋگە تۋرا كەلدى), استانادا وتكەن ءبىر "الامان" جارىستىڭ جايىنا توقتالايىق.

بۇل نەگىزى ء«پوزيتيۆتى» جاڭالىق. ناسيحاتتىق ماڭىزى دا زور-اق. جاس قوعامعا سالاۋاتتى ءومىر سالتىنىڭ ناعىز ۇلگىسىن كورسەتۋ بولسا كەرەك. جاقىندا استاناداعى اق جاعالى «اعايلار» جۇرىگۋدەن جارىس ۇيىمداستىرىپتى. 

«استانا-دۋاتلون 2016» دەپ اتالاتىن قوس سايىس تۇرىنەن تۋرنير تاۋەلسىزدىگىمىزدىڭ 25 جىلدىعىنا ارنالعان. ءۇش كەزەڭنەن تۇراتىن جارىسقا قاتىسۋشىلار  اۋەلى 5 شاقىرىمدى جاياۋ جۇرىسپەن، سوسىن 15 شاقىرىم ۆەلوجۇرىسپەن، ءارى قاراي تاعى 5 شاقىرىمدى جۇرىگىرىپ ءوتۋى ءتيىس بولعان.

بۇل جارىستىڭ ەرەكشەلىگى جوعارعى لاۋازىمدى شەنەۋنىكتەردىڭ قاتىسۋى بولدى. ءبىر جاعىنان «جۇگىرۋ – دەنساۋلىق كەپىلى» بولسا، بۇنىڭ سيمۆوليكالىق جاعىدا بار. اسىرەسە جۋرناليستەردەن قاشقاندا الدارىنا جان سالمايتىن مينيستر مىرزالار وزدەرىنىڭ كاسىبي شەبەرلىكتەرىن كورسەتتى.

قر پرەمەر-ءمينيسترى كارىم ماسىموۆتەن باستاپ، پرەزيدەنت اكىمشىلىگىنىڭ جەتەكشىسى ادىلبەك جاقسىبەكوۆ، مادەنيەت جانە سپورت ءمينيسترى ارىستانبەك مۇحامەديۇلى، ەكس-ەكونوميكا ءمينيسترى ەربولات دوساەۆ، قازاقستان دامۋ بانكى توراعاسى بولات جامىشەۆ، سپورتشى الەكساندر ۆينوكۋروۆ، قازاقستان فۋتبول فەدەراتسياسىنىڭ پرەزيدەنتى ەرلان قوجاعاپانوۆ ت.ب. ازاماتتار 25 شاقىرىمدى ءجۇرىپ، جۇگىرىپ ءوتىپتى. ولاردان بولەك، «بارىپ-كەل، شاۋىپ-كەلدەرى» بار، بارلىعى 500 استانالىق جۇگىرىپتى. اسىرەسە كارىم قاجىمقانۇلىنىڭ بۇل جارىسقا اسىعىپ كەلگەندىگى «شۇلىعىنان-اق» بايقالىپ تۇردى. الەۋمەتتىك جەلى قولدانۋشىلارى اراسىندا ءماسىموۆ مىرزانىڭ ەكى ءتۇرلى شۇلىق كيىپ شىققاندىعى قىزۋ تالقىلانۋدا. ءجا، مۇمكىن ءسان بولار. سوگە جاماندامايىق.

«ادىلبەك رىسكەلدىۇلى قالانىڭ «مەرى» بولىپ تۇرعاندا وسىنداي شارا وتكىزۋدى ۇسىندى. مەن ء«بارىمىز قاتىسامىز»، دەدىم. مىنە، قازىر ول باسقا قىزمەتكە اۋىسسا دا، باستالعان ءىس اياقسىز قالعان جوق. مەنىڭ ويىمشا، استانا كۇنى قارساڭىندا بۇل بارلىق استانالىقتار ءۇشىن ۇلكەن مەرەكە بولدى»،-دەيدى كارىم ءماسىموۆ.

دۇرىس ەكەن، پرەمەر-مينيستر مىرزا. «باستالعان ءىس اياقسىز قالماعانى دۇرىس»، ءارى قاراي دا جالعاسىن تاپسىن دەپ تىلەيىك.

ال جاقسىبەكوۆ مىرزانىڭ ءوزىنىڭ ايتۋىنشا، بيىلعى ديستانتسيا 5 شاقىرىمعا ۇزارتىلىپتى.

«بىلتىرعى جىلمەن سالىستىرعاندا بيىل جۇگىرۋ قيىنعا سوققان جوق. كەرىسىنشە جەڭىل بولدى. ءبىز رەكورد جاسادىق. مەن، بۇل شاقىرىمدى 1 ساعات 50 مينۋتتا جۇگىرىپ وتەمىز بە دەپ ەم، 1 ساعات  25 مينۋتتا-اق وتە شىقتىق. ايتپاقشى، جۋرناليستەرگە دە جۇگىرۋ كەرەك. كەلەسى جىلى بۇنى ەسكەرۋ كەرەك ەكەن. بارلىقاترىڭىزعا فورما بەرۋ كەرەك. سوسىن پرەمەر-ءمينيستردىڭ ارتىنان ءبارىمىز جۇگىرەمىز»،-دەيدى ءپا جەتەكشىسى ادىلبەك جاقسىبەكوۆ مىرزا.

ايتپاقشى، جارىس سوڭىندا جەلاياقتار انىقتالىپ، مىقتى جۇگىرگەندەر ماراپاتقا يە بولدى. «51 جاستان جوعارى» دەگەن كاتەگوريا بويىنشا ەڭ ۇزدىك جەلاياق – بولات جامىشەۆ بولعان. ول 25 شاقىرىمدى 1 ساعات 09 مينۋتتا جۇگىرىپ وتكەن. ەستەرىڭىزگە سالا كەتەيىك، بىلتىرعى «الماتى مارافونىندا» بولات جامىشەۆ مىرزا 42,195 شاقىرىمدى 4 ساعات 3 مينۋتتا جۇگىرىپ ءوتىپ، «55-59 جاس ارالىعىندا» ەڭ ۇزدىك جەلاياق اتانعان-دى.

نۇرزات توعجان

Abai.kz