"حاباردا" جۇرگەندە توي جۇرگىزەتىن ءبىر اسابا باۋىرىم حابارلاستى. قازاقتىڭ تويىنان نانىن تاۋىپ جۇرگەن ورتانقول اسابالاردىڭ ءبىرى. ازداپ ء«اۋ» دەيتىنى دە بار. بۇل جولى سوزبالاقتاماي بىردەن توتەسىنەن كەتتى. 

– اعا، ماعان سىزدەردە باعدارلاما جۇرگىزۋ كەرەك! جالاقى، قالاماقى دەگەندەرiڭiزدiڭ قاجەتى دە جوق. «كوك جاشىكتەن» كورىنىپ جۇرسەم بولدى...
– وۋ، باۋىرىم، نە بولدى؟ ساعان بەرە قوياتىنداي باعدارلاما جوق بىزدە. ەكونوميكا، ساياسات دەگەندەرگە ءتىسىڭ باتپايتىنىن وزىڭ دە سەزىپ تۇرعان بولارسىڭ؟..
– اعا، ماعان ءبارىبىر. ەل كورسە بولدى. بۇل دەگەنىڭىز – پيار عوي! ال، "قارا" پياردىڭ دا – پيار ەكەنىن بىلەتىن شىعارسىز؟ تەلەۆيزورعا شىقسام، استانا، اتىراۋدان دا تويعا تاپسىرىس الام عوي...
تفۋ، مىناعان داۋا جوق ەكەن! ترۋبكانى تاستاي سالدىم. وسى ءبىر «قارا" پيار دەگەننىڭ تالايدان بەرى جانىمدى جەگىدەي جەپ جۇرگەنىن نەسىن جاسىرايىن. بۇل بالە باتىستان كەلدى. مايك تايسوننىڭ قۇلاق تىستەگەنىن، جەر حابار بەرمەگىر مايكل دجەكسوننىڭ سوڭىنان ەرگەن ءتۇرلى قاۋەسەتتەردى، قالا بەردى پۋگاچەۆانىڭ بالاسىنداي بىرەۋلەردى باي قىلعانىنا دەيىن «قارا پيار» دەپ قابىلدادىق. جاي قابىلداپ قانا قويمادىق، قازاقى بولمىسقا قالاي بولسا سولاي ەندىرە باستادىق. باسقالاردى بىلمەيمىن، انشىلەرىمىز بۇل ماسەلەدە ءتىپتى الدىعا كەتتى. كەلسىن، كەلمەسىن ايتەۋىر، قارا باستارىنىڭ جارناماسى ءۇشىن قايداعى ءبىر بالەلەردى ويلاپ تاباتىن بولدى. ونى ەل ەستىسiن دەي مە، سوسىن تەلەارنالاردى جاعالاپ جۇرگەندەرى. سىزدەردى بىلمەيمىن، ءوز باسىم كەزىندە ايگۇل يمانباەۆا قارىنداسىمنىڭ التىنايمەن ابىسىن بولىپ، بۇرىنعى كۇيەۋىمەن جابىسىپ تۇسكەن سۋرەتىن ماقتانىپ جۇرتقا جاريا قىلعانىن «قارا پيار» دەپ قابىلدادىم.

«مەن قازاق قىزدارىنا قايران قالام!» دەپ جۇرگەن جانار ايجانوۆا قارىنداسىم دا تەلەارنالاردىڭ بىرىندە «قارا پياردىڭ» قۇربانى بولىپ، داراقى جانارعا، جەڭىلتەك كۇلكىلى، جەتەسىز جۇرگىزۋشى وبرازىنداعى «سۇيكىمسىز» جانارعا اينالدى. اسقار تاۋداي الىپ ءانشى نۇرلان ابدۋلليندى ناعىز قازاق وسى دەۋشى ەدىم. ونىڭ دا تاڭەرتەڭگىلىك باعدارلامادا جاڭالىق وقىپ تۇرعانىن كوردىك كەزىندە. نە ايتىپ تۇرعانىن ءوزى دە بىلمەيدى. بىلمەگەن سوڭ كۇلە بەرەدى. ءوزىن اتتاسى نۇرلان ەسپانوۆتىڭ دەڭگەيىنە تۇسىرەتىندەي، بۇل نۇرەكەنە نە جەتپەيدى ەكەن؟ تاعى دا سول «قارا پيار» ما؟ بۇل ءتىزىمدى ودان ءارى دە جالعاستىرۋعا بولادى.مەنىڭشە، ناعىز تالانتقا «قارا پياردىڭ» دا، «كوك جاشىكتە» جۇرگىزۋشىسى بولۋدىڭ دا قاجەتى جوق. حالىق مەيرامبەگiن حابار جۇرگىزبەسە دە جاقسى كورەدى. ماقپالىن «كوك جاشىكتەن» كورمەسە دە الاقانىندا ايالايدى. «اتىڭ شىقپاسا، جەر ورتە!» دەگەندى قازاق مازاق رەتىندە ايتقان. مازاق بولعاندارىڭىز جارامايدى، «قارا پياردى» جاقسى كورەتىن انشىلەر! 
...باياعىدا ءازىل ايتسا دا ءادىلىن ايتاتىن ءالىمجان ارىپتەسىم الگىلەر تۋرالى ءبىر ساۋەگەي ءسوز ايتىپ ەدى. 
– مىنالاردىڭ قارقىنى جامان. ەندى ءبىراز ۋاقىتتا «جەتى كۇندى» ءانشى جۇرگىزەتىن شىعار. بىزدەر – جۋرناليستەر جازىپ بەرىپ، اۋزىنا سالىپ وتىرامىز سوسىن...
ءاي، الەكەم-اي! كورىپكەل شىعارسىڭ! سىزدەردى قايدام، مەن ءوزىم سولاي بولاتىنىنا سەنىپ بارامىن...

ارمان سقابىلۇلى

FB پاراقشاسىنان الىندى