ەكى دۇركىن وليمپيادا جانە ءتورت دۇركىن الەم چەمپيونى يليا يلين دوپينگ داۋىنا قاتىستى مالىمدەمە جاسادى دەپ حابارلايدى NUR.KZ.

“بۇگىنگى اقپاراتتى ەستىپ مەن شالقامنان تۇسە جازدادىم. حالىقارالىق اۋىر اتلەتيكا فەدەراتسياسىنىڭ ەرەجەcىنە سايكەس، مەن تۋرالى بارلىق اقپارات “ADAMS” حالىقارالىق جۇيەسىندە تىركەلگەن. وندا مەنىڭ ءاربىر ساعاتىما دەيىن جازىلىپ تۇر. بۇدان بولەك، مەنىڭ جاتتىعۋداعى جانە جاتتىعۋدان تىس ۋاقىتتارىم دا كورسەتىلگەن. مەن دوپينگكە قارسى اگەنتتىك وكىلدەرى ءۇشىن ۇنەمى اشىق بولدىم، بيىلدىڭ وزىندە پولشادا جانە الماتىدا ەكى رەت دوپينگ سىناما تاپسىردىم. وزدەرىڭىز بىلەسىزدەر، بىردە ءبىر حالىقارالىق جارىس دوپينگ-سىناماسىز باستالمايدى. مەن سپورتشى رەتىندە 2004 جىلدان بەرى دوپينگ سىناما تاپسىرىپ كەلەمىن. ناتيجەسى ۇنەمى  تەرىس بولىپ شىعاتىن. مەن ريوداعى وليمپياداعا دايىندالا بەرەمىن جانە سوڭىنا دەيىن كۇرەسەتىن بولامىن. سپورتتاعى باسشىلار دا بىلەك سىبانا كىرىستى، ماۋسىمنىڭ ورتاسىندا ناتيجەسى بەلگىلى بولىپ قالار. وليمپياداعا قاتىسۋعا ءوتىنىم بەرۋ ءۇشىن شىلدەنىڭ ورتاسىنا دەيىن ۋاقىتىم بار. ماعان قاتىستى شەشىم قالاي قابىلدانسا دا، مەن ءومىرىمنىڭ 20 جىلىن كۇنىنە 3 مارتە  جاتتىعۋمەن، تازا ەڭبەكپەن سپورت زالدا وتكىزگەنىمدى ايتقىم كەلەدى. مەن ءوز حالقىمنىڭ الدىنداعى جاۋاپكەرشىلىكتى ۇنەمى سەزىنىپ، تەك جەڭىس ءۇشىن كۇرەستىم. وسى ۋاقىتقا دەيىن سىزدەر مەنى قولداپ كەلدىڭىزدەر. قازىر دە سىزدەردىڭ دەمەۋلەرىڭىزگە سۇيەنەمىن. سىزدەردىڭ يليالارىڭىز”، – دەپ جازادى اۋىر اتلەت.

ەسكە سالا كەتەيىك، شەتەلدىك باق يليا ءيليننىڭ دوپينگ قابىلداعانىن حابارلاعان بولاتىن. بۇگىن حالىقارالىق اۋىر اتلەتيكا فەدەراتسياسى يليا يلين باستاعان قازاقستاندىق 4 اۋىر اتلەتتى ۋاقىتشا جارىستان شەتتەتى.

دوپينگ قابىلداعاندار قاتارىندا وليمپيادا چەمپيوندارى سۆەتلانا پودوبەدوۆا، مايا مانەزا جانە ءزۇلفيا چينشانلو بار.

Abai.kz