امەريكا تۇرمەسىندە وتىرعان قازاق ستۋدەنتى  ەلگە ورالدى. اقش-تا لاڭكەستىك وقيعاعا قاتىستى ايىپتالىپ، 3,5  جىلعا باس بوستاندىعىنان ايىرىلعان ازامات تاجياقوۆ جازاسىن تولىق وتەپ شىقتى. بۇل تۋرالى «كتك ارناسى» حابارلايدى.

جات جەردە جازىقتى بولىپ، تۇرمەگە توعىتىلعان ۇلدارىن قارسى الۋعا اتا-اناسى مەن تۋىستارى تايلى-تاياعى قالماي تۇگەل كەلىپتى. 2013 جىلدان بەرى اقش-تا قاماۋدا بولعان ازامات تاجىاياقوۆ الماتى اۋەجايىنا كەلگەن.

«قازىر جۇرەگىم توقتاپ قالارداي بولىپ تۇر. قاتتى سوعىپ جاتىر. قۋانىشىمدا شەك جوق. كەلىپ كۇتىپ العاندارىڭىزعا راحمەت. اكەمە قوڭىراۋ شالىپ جاعدايىمدى ءبىلىپ تۇرعاندارىڭىزعا راحمەت. 3,5 جىل بولدى قازاقستاندا بولماعانىما. ەت جەپ دەمالىپ، قىمىز ءىشىپ جاتقىم كەلەدى»، - دەيدى ازامات تاجياقوۆ.

اقش-قا ءبىلىم الامىن دەپ بارىپ، باسى بالەگە قالعان ۇلىمەن قايتا قاۋىشقان اتا-انانىڭ دا قۋانىشىندا شەك جوق. ءامىر ىسماعۇلوۆ تا بالاسىنىڭ تىلەۋىن تىلەگەن بارشا حالىققا العىس ايتىپ، اعىنان جارىلدى.

ء«بىزدىڭ وتباسى ءۇشىن بۇگىن ەڭ باقىتتى كۇن. مەن پرەزيدەنت نۇرسۇلتان نازارباەۆقا ۇلكەن راحمەت ايتقىم كەلەدى. ويتكەنى بالالار 25 جىل الۋى مۇمكىن ەدى. سودان كەيىن باس پروكۋراتۋراعا، سىرتقى ىستەر مينيسترلىگىنە راحمەت ايتقىم كەلەدى جانە قازاق حالقىنا راقمەتىمدى ايتامىن»، - دەيدى  ازاماتتىڭ اكەسى امىر ىسماعۇلوۆ.

ەستەرىڭىزدە بولسا، 2013-جىلدىڭ ساۋىرىندە بوستونداعى مارافون كەزىندە جارىلىس بولىپ، 4 ادام قازا تاپقان. لاڭكەستىك ارەكەتتى ۇيىمداستىرعان اعايىندى تسارناەۆتاردىڭ ۇلكەنى تەمىرلان قۇرىقتاۋ شاراسى كەزىندە ولسە، جوحار تسارناەۆتى اقش سوتى ءولىم جازاسىنا كەسكەن بولاتىن. بۇل ەكەۋىنە كومەكتەستى دەگەن كۇدىككە ەكى قازاقستاندىق ستۋدەنت ءىلىنىپ، ازامات تاجياقوۆ پەن دياس قادىرباۆ جازاعا تارتىلعان بولاتىن.

قازىر امەريكا تۇرمەسىندە تاعى ءبىر وتانداسىمىز جازاسىن وتەپ جاتىر. دياس قادىرباەۆ تا بوستونداعى وقيعاعا قاتىستى تەرروريزم بابى بويىنشا ايىپتالىپ، 6 جىلعا باس بوستاندىعىنان ايىرىلعان. 

نۇرزات توعجان

Abai.kz