بۇرناعى كۇنى جۇمىستان كەيىن ۇيگە بەت العام. ايالدامادا 43 اۆتوبۋستان اتىپ شىققان ايەل جان-جاعىنا جالما-جان قاراپ، كىشكەنتاي قىزىن قۇشاعىنا قىسىپ، ىشتەي كۇبىرلەدى. جۇرت بۇعان نە بوپ قالدى دەپ اڭتارىلدى.    

– قازىر عانا اۆتوبۋسقا بالاعى قىسقا، ساقالى بار جىگىت كىردى. قولىندا ۇلكەن قارا سومكەسى بار. جاي سومكە ەمەس – اسكەري سومكە»، – دەدى ەنتىگىپ، – بەتى قۇرىسىن، كىم بىلەدى، سومكەسىندە نە بارىن؟ اقتوبەدە اتىسقاندار وسىلار ەمەس پە؟..

ءبىز نە دەرىمىزدى بىلمەي، ءۇنسىز قالدىق. وسى كەزدە ءبىر عالىمنىڭ: «يسلامعا پايدالارىڭ تيمەسە دە، دىنگە زياندارىڭدى تيگىزبەڭدەرشى تەگى...» دەگەن ءسوزى ويىمىزعا كەلدى. ونسىز دا يسلامدى ۇرەيدىڭ ءدىنى ەتىپ كورسەتۋگە تىرىسىپ جاتقانداردىڭ ارەكەتى از بولعانداي، كەشەگى اقتوبە وقيعاسى تاعى دا جۇرتتىڭ جۇرەگىنە ەكىۇداي پىكىر ۇيالاتتى.

لاڭكەستەر ەل ىشىنە لاڭ سالعان سوڭ: «بالامىزدى مەشىتكە جىبەرۋگە قورقىپ قالدىق، ءدىن ۇستانباي تىنىش قانا جۇرە بەرگەنى دۇرىس قوي»، – دەگەن اتا-اناعا قانداي كەڭەس، قانداي ناسيحات ايتۋعا بولادى؟

ءبىردىڭ كەسىرى – مىڭعا دەگەن بار. سول ءسالافيزم مەن تاكفيريزم يدەولوگياسىنىڭ ىقپالىندا كەتكەن ازاماتتار بەيبىت كۇندە بەيبىت تۇرعىننىڭ ءومىرىن ءبۇلدىرىپ، جالپاق جۇرتتىڭ ۇرەيىن ۇدەتە ءتۇستى. يماندىلىق جولىنا انە-مىنە تۇسەم دەپ، ىزگىلىك ىزدەگەندەردىڭ ىزگى نيەتىنە تاعى قاياۋ ءتۇسىردى.  

عالامتوردان ءبىر كىسىنىڭ: «ۋا، اللا! سەنىڭ ءدىنىڭدى ۇستانۋشىلار ونى قانداي كۇيگە ءتۇسىردى؟» – دەگەن بازىناسىن، جازباسىن وقىپ ەدىك. ماسەلە دىندە ەمەس – ءدىندى ۇستانۋدا.   

اۆتوبۋستان، دالىرەگى – ساقالدى جىگىتتەن قاشقان ايەلدىڭ كۇيى، ونىڭ يسلام تۋرالى ويى قانداي بولدى ەكەن؟.. يسلامدا ەكسترەميزم، ەكسترەميزمدە يسلام جوعىن تۇسىندىرگەنمەن، ونىڭ تۇيسىگى قابىلداي قويار ما؟  

ساناۋلى قازاقتىڭ ساناسىن ىزگىلىككە تولتىرۋدى، يماندىلىققا ۇيىتۋدى ويلاستىرۋ قاجەت بولعان وسى ءبىر ساتتە ءدىننىڭ قادىرىن قاشىرىپ العانىمىز وكىنىشتى. قوعام دىنگە سالقىن قاراسا، ول قالايشا داميدى؟

ارينە، ساف ءدىن قاشاندا ساف قالپىن ساقتاپ قالاتىنى حاق. ال ءبىز ءوز تاراپىمىزدان: «جاقسى پەندە – قوعامعا پايداسى تيگەن ادام»، «مۇسىلمان وزگەگە قولىمەن دە، تىلىمەن دە زيان تيگىزبەيدى»، – دەگەن ءحاديستى قوعامعا كوبىرەك ايتا بەرۋىمىز كەرەك. ءدىندى دۇرىس تۇسىندىرۋدەگى ورتاق ۇلەسىمىز وسى بولسىن!

اعابەك قوناربايۇلى، قمدب ءباسپاسوز ءبولىمىنىڭ مەڭگەرۋشىسى

Abai.kz