ك.ءماسىموۆ: اقتوبەدەگى جاعداي تولىق باقىلاۋعا الىندى
اقتوبەدە قر پرەمەر-ءمينيسترى كارىم ءماسىموۆتىڭ قاتىسۋىمەن قاۋىپسىزدىك ماسەلەلەرى بويىنشا كەڭەس ءوتتى. كەڭەس الدىندا كارىم ءماسىموۆ 5 ماۋسىمدا لاڭكەستەر شابۋىلىنا ۇشىراعان 6655 اسكەري بولىمشەسىنىڭ قاسىندا گۇل شوقتارىن قويۋ راسىمىنە قاتىسىپ، قازا تاپقان اقتوبەلىكتەردى ءبىر مينۋت ۇنسىزدىكپەن ەسكە الدى.
«جۋىردا ەلىمىزدە قايعىلى وقيعالار بولدى، ونىڭ سالدارىنان بەيبىت تۇرعىندار مەن اسكەري قىزمەتكەرلەر اجال قۇشتى. ءبىز قازا تاپقانداردى ازا تۇتامىز جانە ءوز حالقىن قورعاعان اسكەري قىزمەتكەرلەردىڭ باتىرلىعىن ماقتان ەتەمىز. مەملەكەت باسشىسى اتاپ وتكەندەي، بەيبىتشىلىك پەن كەلىسىم – ءبىزدىڭ مەملەكەتىمىزدىڭ ەڭ ماڭىزدى قۇندىلىقتاردى»، - دەدى پرەمەر-مينيستر.
ايماقتاعى قاۋىپسىزدىكتى قامتاماسىز ەتۋ بويىنشا وبلىستىق ۇقكد جانە ءىىد باسشىلارىنىڭ باياندامالارىنان سوڭ كارىم ءماسىموۆ جيىندى قورىتىندىلادى:
«جاعدا ي تولىعىمەن باقىلاۋعا الىندى، تەرروريستەر اۋىزدىقتالدى. ايماقتاعى قاۋىپسىزدىك قامتاماسىز ەتۋ بويىنشا مەملەكەت باسشىسى قويعان تاپسىرمالار ورىندالدى. ەندى قالانى بۇرىنعى قالپىنا كەلتىرىپ، الەۋمەتتىك ماسەلەلەرگە، جۇمىسپەن قامتۋعا، جاستار ساياساتىنا، كاسىپكەرلىكتى دامىتۋعا كوڭىل بولگەن ماڭىزدى».
ەسكە سالايىق، قر پرەمەر-ءمينيسترىنىڭ اقتوبە وبلىسىنا جۇمىس ساپارى بارىسىندا استانادا وتكەن قاۋىپسىزدىك كەڭەسىنىڭ وتىرىسىندا ايتىلعان مەملەكەت باسشىسىنىڭ تاپسىرمالارىن جۇزەگە اسىرۋ ماسەلەلەرى بويىنشا كەڭەس ءوتتى. ءدال وسى كۇنى كارىم ءماسىموۆ تەراكتى سالدارىنان قازا تاپقان اقتوبەلىكتەردىڭ وتباسىلارىمەن كەزدەسىپ، ولارعا كوڭىل ايتتى. سونىمەن قاتار مينيسترلەر كابينەتىنىڭ باسشىسى اقتوبەدەگى جەدەل مەديتسينالىق جاردەم اۋرۋحاناسىن بارىپ، جارالانعان ازاماتتاردىڭ كوڭىلىن سۇرادى.
اباي-اقپارات
