- ولار پاتەرگە جينالعان كەزدە وزدەرىنە يمامدارى ءدال سول كۇنى قاسيەتتى جيھاد جاساۋ تۋرالى ۇندەۋ جاساعان. ارينە، ولار دايىندالعان. نىسانداردى بىلگەن. قايدا، قالاي بارۋ كەرەگىن بىلگەن. يمامدارى سيريادان بولعان سياقتى. مەنىڭشە، ونى تەرگەۋشىلەر انىقتايدى. ولار يمامدارىن تىڭداپ، جيھاد جۇرگىزۋىمىز كەرەك دەپ، قوسىلعاندارى ارەكەتكە كوشكەن، - دەدى مينيستر قاسىموۆ.

ءمينيستردىڭ سوزىنشە، شابۋىل جاساۋدى 45 ادام جوسپارلاعان. "بىراق جيھاد جاريالاپ، پاتەردەن شىققان كەزدە 19 ادام باس تارتقان. قازىر ولاردىڭ بارلىعىن انىقتاپ، تەرگەپ جاتىرمىز. 29 ادام كەلىسىپ، شابۋىلعا شىققان. جول بويىندا تاعى ءۇش ادام باس تارتقان", - دەدى قالمۇحانبەت قاسىموۆ.

ىشكى ىستەر ءمينيسترى قارۋ-جاراق دۇكەنىنىڭ بەينەباقىلاۋ كامەراسىنان وندا 25 ادام كىرگەنى كورىنەتىنىن، قىلمىس جاساۋدان باس تارتقان تاعى ءبىر ادام كەتىپ قالعانىن ايتادى.

- قىلمىستى 25 ادام جاساعان. ءبىرىنشى دۇكەندەگى وقيعا توعىز مينۋتقا سوزىلعان. ولار دۇكەنگە كىرگەن سوڭ ءتورت مينۋتتان كەيىن جەكە كۇزەت قىزمەتى بارعان. كۇزەتشى دۇكەنگى جۇگىرىپ كىرگەن بويدا ولار ونى اتىپ تاستاعان. ءۇش مينۋتتان سوڭ دۇكەنگە جاساق جەتىپ، اتىس باستالعان. پوليتسەيلەر دۇكەندە وزدەرىنە بىردەن 14 ادام دۇكەننەن العان قارۋ-جاراقتان وق اتادى دەپ ويلاماعان، - دەيدى مينيستر قاسىموۆ.

قاسىموۆ سونىمەن بىرگە اقتوبە وبلىسىنداعى توتەنشە جاعداي قالىپتى رەجيمگە كوشكەنىن، بارلىق ارنايى قىزمەتتىڭ وكىلدەرى ءوز ورىندارىنا قايتقانىن ايتتى.

اباي-اقپارات