سىر بويىندا اۋىل كاسىپكەرلىگىن دامىتۋعا ارنالعان شاعىن نەسيەگە قول جەتكىزگەندەردىڭ قاتارىندا «جامبىل» اۋىلشارۋاشىلىق تۇتىنۋشىلار كووپەراتيۆى بار.  اتالعان ۇجىم سىرداريا اۋدانىنىڭ قوعالىكول اۋلىندا ورنالاسقان جانە  جاڭا زامان لەبىمەن وندىرىستىك كووپەراتيۆكە بىرىگىپ،  كۇرىشتىڭ «ايساۋلە» سۇرىبىن ەنگىزۋمەن اينالىسۋدا.  

«اتامەكەن» ۇلتتىق كاسىپكەرلەر پالاتاسى بولگەن 300 ميلليون تەڭگەلىك قاراجاتتان العاشقى ترانش رەتىندە 6 اي جەڭىلدىگىمەن 36 اي اۋقىمىندا قايتاراتىنداي 4 400 000 تەڭگە مولشەرىندە قارىز سوماسىن العان «جامبىل» اتك» وك باسشىسى بولاتبەك رۇستەموۆ ءوتىنىشىنىڭ بۇلاي تەز قارالىپ، قاجەتتى قاراجات كولەمىنىڭ شاپشاڭ بەرىلە قوياتىنىن كۇتپەگەنىن ايتادى.

بۇگىندە ىسكەر كاسىپ يەسى كەپىلگە تۇرارلىق مۇلىك ءتۇرىن ازىرلەپ، جالپى بولجانعان 10 ملن. تەڭگەنىڭ قالعان بولىگىن الۋعا دايىندالىپ جاتقانىن ايتتى.

«قولعا تيگەن اقشانى بىردەن كادەگە جاراتىپ، ىبىراي جاقاەۆ اتىنداعى عىلىمي-زەرتتەۋ ينستيتۋتى ويلاپ تاپقان كۇرىشتىڭ جاڭا سۇرىبىن ەگىپ تاستادىق. ەندى ەگىستىك دالاسىن كۇتىپ-باپتاپ، قوڭىر كۇزدە مول ءونىم جيناۋعا نيەت ەتىپ وتىرمىز»، - دەپ ءساتتى باستالعان شارۋادان سىر شەرتكەن بولاتبەك قامارۇلى شاعىن نەسيە باعدارلاماسى جايلى جاعىمدى جاڭالىقتى ەستىپ، الدىمەن قىزىلوردا وبلىستىق كاسىپكەرلەر پالاتاسىنا بارعانىن ەسكە الادى.

«ونداعى ماماندار ءمان-جايدى ەگجەي-تەگجەيلى ءتۇسىندىرىپ، ءتيىمدى تۇستارى مەن ارتىقشىلىقتارىن جان-جاقتى بايىپتاپ بەردى. ء ارى قاراي جىلدام قۇجاتتارىمدى جيناپ، اينالدىرعان ەكى اپتانىڭ ىشىندە نەسيەنى ەنشىلەدىم.  راسى كەرەك، مەملەكەت تاراپىنان كورسەتىلەتىن قامقورلىق قۇرالدارىنا جاتىرقاي قاراپ، كوبىنەسە ءىس-قيمىلعا بىلەك سىبانا كىرىسىپ كەتۋدەن تارتىنشاقتايمىز عوي.  وسى جولى ءمىنسىز قىزمەتكە شىن تاڭعالدىم. كاسىپكەرلەر پالاتاسىنداعى قىز-جىگىتتەرگە مىڭ العىس»، - دەپ اڭگىمەلەيدى كۇرىش پەن بيداي جانە جوڭىشقا سىندى اۋىل شارۋاشىلىعى سالاسى ونىمدەرىن ءوندىرۋ، قايتا وڭدەۋ مەن وتكىزۋ باعىتىندا بىرنەشە جاۋاپكەرشىلىگى شەكتەۋلى سەرىكتەستىك باسىن قوسقان كووپەراتيۆ توراعاسى.

تابىستى بيزنەسىن دوڭگەلەتكەن كاسىپورىن جەتەكشىسىنىڭ ايتۋىنشا، «جامبىل» اتك» وندىرىستىك كووپەراتيۆى 2016 جىلدىڭ ءساۋىر ايىندا قۇرىلتايشىلىق شارت نەگىزىندە قۇرىلعان. ەگىستىكتەن تىس، مال جايىلىپ، ءشوبى شابىلاتىن 10 مىڭنان گەكتاردان استام جەر تەلىمدەرى بار.  ارنايى تەحنيكا كووپەراتيۆ قۇرامىنداعى «اگرو-ورتالىق» جشس مەنشىگىنەن جۇمىسقا جەگىلگەن.

شىلدە ايىندا اۆياحيميالىق وڭدەۋ ارەكەتتەرى جۇرگىزىلمەك. 7%-دىق مولشەرلەمەدەگى نەسيە ماقساتى دا سول، نەگىزىنەن تۇقىم، جانار-جاعارماي ساتىپ الۋ. سايكەسىنشە ەلىمىزدەگى ءىرى كۇرىش ءوسىرۋشى ءوڭىر ەسەپتەلەتىن قىزىلوردا وبلىسىندا تاڭداۋ جاساۋ دا قيىنعا سوقپاعان.

جالپى، سىر بويىندا قازاقستانداعى كۇرىشتىڭ 85 پايىزى ءوندىرىلىپ، جىل سايىن شەتەلگە ەكسپورتقا جىبەرىلىپ كەلەدى. ەڭبەك كورىگى قىزۋ قايناعان قاۋىرت ىستەرگە ماۋسىمدىق كەزەڭدە قوسىمشا ماماندار جۇمىلدىرىپ، جاڭا جۇمىس ورىندارىن اشۋ كوزدەلۋدە.

الدابەرگەن كەمپىرباەۆ

Abai.kz