قىمباتتى وتانداستار!

وتكەن جەكسەنبىدە اقتوبە قالاسىندا ءدىننىڭ اتىن جامىلعان ءبىر توپ تەرروريست ەلدىڭ تىنىشتىعىن بۇزدى. ول تۋرالى بارشاڭىز بىلەسىزدەر. بىراق، مۇسىلمان قاۋىمى ءۇشىن قاسيەتتى رامازان ايى باستالار ساتتە قاندى قىلمىس جاساعانداردىڭ ارام نيەتتەرى ىسكە اسقان جوق. قۇقىق قورعاۋ جانە قاۋىپسىزدىك قىزمەتتەرىنىڭ قىزمەتكەرلەرى ۇلكەن قاتەردىڭ بەتىن قايتاردى. تەرروريستەردىڭ كوپشىلىگىنىڭ كوزدەرى جويىلدى، بىرقاتارى قولعا ءتۇستى، قالعاندارىن ءتيىستى ورگاندار ىزدەپ تاۋىپ، ولار زاڭنىڭ ەڭ قاتاڭ تالاپتارىمەن جازاعا تارتىلاتىن بولادى. قازىر حالىقتىڭ الاڭداۋىنا ەشبىر نەگىز جوق، جاعداي تولىق باقىلاۋعا الىندى.

مەن قايتىس بولعانداردىڭ وتباسىلارىنا، تۋىس-تۋعاندارىنا شىن جۇرەگىممەن كوڭىل ايتامىن. قازا تاپقان اسكەري قىزمەتكەرلەر وتان الدىنداعى انتىنا ادال بولىپ، ەل قاۋىپسىزدىگى جولىندا وشپەس ەرلىك كورسەتتى. ولاردىڭ ەرلىكتەرى مەملەكەت تاراپىنان لايىقتى باعالاناتىن بولادى. ونىڭ ۇستىنە 4 ازامات قايتىس بولدى، ءبارى اقتوبەنىڭ تۇرعىندارى. سوندىقتان، مەن ەرتەڭگى بەيسەنبى، 9 ماۋسىم كۇنىن جالپىۇلتتىق ازا تۇتۋ كۇنى دەپ جاريالايمىن. قازا بولعانداردىڭ ارتىندا وتباسى، بالا-شاعالارى قالدى. مەنىڭ تاپسىرمام بويىنشا، ولارعا بارلىق قاجەتتى كومەكتەر جاسالۋدا.

تاۋەلسىزدىكتى جاريالاۋ بار، ال ونى قورعاپ، نىعايتۋ جانە دامىتۋ ودان دا جاۋاپتى ءىس. ەل بىرلىگى، ىشكى تىنىشتىق سول ءۇشىن كەرەك. مەن مۇنى ىلعي ايتىپ كەلەمىن. ەل ىشىنە بۇلىك سالۋدىڭ، ء«تۇستى رەۆوليۋتسيالاردىڭ» تالايىن باسقا ەلدەردەن كورىپ، ءبىلىپ وتىرمىز. ول لاڭكەستىك ارەكەتتەردەن، كوشەگە شىعىپ شۋلاۋدان باستالادى. ودان كونستيتۋتسياعا قارسى شىعادى دا، اياعىندا مەملەكەت كۇيرەپ، حالىق اش-جالاڭاش قالادى. مۇنىڭ ءبارىن ءبىز كورىپ، ءبىلىپ، بايقاپ وتىرمىز.  

بىرىنشىدەن، ءبىز كەز-كەلگەن سيپاتتاعى ەكسترەميزم مەن تەرروريزمگە قارسى زاڭداردى قايتا قاراپ، بۇل قۇبىلىسقا قاتاڭ تويتارىس بەرۋ جايىن ويلاستىرۋىمىز كەرەك. قولىنا قارۋ الىپ، كىسى ولتىرگەن ادام ءولىم جازاسىنا كەسىلۋى قاجەت. ەكىنشىدەن، ەلدىگىمىزگە سىنا قاعاتىن زۇلىمدىقتاردىڭ ىمىراسىز جولىن كەسۋىمىز قاجەت. ەل تىنىشتىعىن ساقتاماساق مىناداي الەمدىك داعدارىستان وتە المايمىز. سوندىقتان بارشا حالىق بولىپ بىرىگىپ، ەلدى ساقتاۋدى ويلاۋىمىز كەرەك.

Abai.kz