قۇزىرلى ورگانداعىلار اتالعان ۇيىم تۋرالى اقپاراتتى تاراتپاس بۇرىن، ونىڭ انىق-قانىعىنا كوز جەتكىزىپ الۋعا كەڭەس بەرەدى. بۇل تۋرالى «vlast.kz» پورتالى قر ۇقك ءباسپاسوز قىزمەتىنە سىلتەمە جاساي وتىرىپ حابارلايدى.

كۇنى كەشە عانا قازاقستاندىق باق اقتوبە قالاسىنداعى بولعان تەراكتىنى «قازاقستاندى ازات ەتۋ ارمياسى» دەپ اتالاتىن بەلگىسىز ءبىر تەرروريستىك ۇيىمنىڭ ءوز موينىنا العاندىعىن حابارلاعان ەدى.

«قازاقستاننىڭ ۇلتتىق قاۋىپسىزدىك كوميتەتى رەسمي تۇردە بۇل اقپاراتتى تەرىسكە شىعارادى. سەبەبى بۇل شىندىققا جاناسپايتىن مالىمەت. «قازاقستاندى ازات ەتۋ ارمياسى» ۇيىمى جوق»،-دەپ مالىمدەيدى ۇقك.

5-ماۋسىم كۇنى اقتوبە قالاسىندا بەلگىسىز بىرەۋلەر ەكى بىردەي قارۋ-جاراق ءدۇكەنىنە جانە ۇلتتىق گۆارديانىڭ اسكەري بولىمشەسىنە شابۋىل جاسادى. ۇلتتىق قاۋىپسىزدىك ورگاندارى اتالعان وقيعانى «تەراكتى» دەپ مالىمدەدى. قر  دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مالىمەتتەرىنە سۇيەنسەك، ەكى تاۋلىكتىڭ ىشىندە اقتوبە قالالىق اۋرۋحاناسىنا 38 ادام اۋىر دەنە جاراقاتتارىمەن تۇسكەن. قازىر پوليتسيا تەراكتى جاساعان تاعى 7 ادامدى ىزدەستىرۋدە. قارۋلى كۇشتەر مەن تەروريستەر اراسىنداعى اتىس كەزىندە 13 ادام قازا تاۋىپ، تاعى 4 ادام اۋىر جاراقات العان. ەلىمىزدىڭ بارلىق ايماقتارىنا بىردەي «قاۋىپتىڭ سارى دەڭگەيى» رەجيمى ەنگىزىلدى.

الەۋمەتتىك جەلىلەردەگى مالىمەتتەرگە سۇيەنسەك، تەررورشىلار 6-7 ماۋسىم كۇندەرى دە شابۋىل جاساپتى. الايدا قر ءىىم بۇل مالىمەتتى رەسمي تۇردە تەرىسكە شىعاردى.

ءتۇيىن: وسىنىڭ الدىندا قازاقستاننىڭ قۇزىرلى ورگاندارى مەن باق اقتوبەدەگى اتىستى جاساعاندار "قازاقستاندى ازات ەتۋ ارمياسى" دەپ اتالاتىن بەلگىسىز تەررويستىك ۇيىم دەپ جارياعا جار سالعان ەدى. بۇگىن ۇلتتىق قاۋىپسىزدىك كوميتەتى مۇنداي ۇيىمنىڭ مۇلدە جوقتىعىن ايتىپ وتىر. پارادوكس. اۋەلدە ەلدەگى بارلىق وقيعالاردى ۇيىمداستىرعان جالعىز ادام - شىمكەنتتىك كاسىپكەر، قازىر قاماۋدا وتىرعان توقتار تولەشەۆ دەپ مالىمدەدى. ىلە-شالا اقتوبەدە اتىس بولدى. وعان كىنالى - بەلگىسىز ءبىر ۇيىم دەدى. ەندى بۇگىن بۇل اقاپارات تا جالعان بولىپ شىقتى. 

Abai.kz