فرانتسۋزداردى ەۋروپاداعى – قازاقتار دەيتىن ءسوز بار. وسى ءسوز راس-اۋ تەگى... ءبىزدىڭ قازاق ءبىر كەبىستى ءبىر كەبىسكە سۇقپاسا وتىرا المايدى عوي. فرانتسۋزدار دا سويتەتىن سياقتى. ايتپەسە ايدالادا ءجۇرىپ ءبىزدىڭ ءايبات پرەمەرىمىزدە نە اكەلەرىنىڭ قۇنى كەتىپ بارا جاتىر دەسەڭىزشى. ماسەلە ۇكىمەت باسشىسى ماسىموۆكە قاتىستى بولعاندىقتان اڭگىمەمىزدىڭ اشىعىنا كوشەلىك. بىراق، بىردەن ەسكەرتىپ قويعانىمىز ءجون، ءبىز بۇل اقپاراتقا استە سەنە المايمىز. بەرىدەن قايتقاندا، فرانتسيانىڭ قارجى پروكۋرورى ناقتى شەشىمىن ايتقانشا، سەنبەي تۇرا تۇرۋىمىزعا تۋرا كەلەدى. ال، فرانتسۋز پروكۋرورى كوپ كۇتتىرمەي بىزگە تومەندەگى جايتتىڭ انىق-قانىعىن ءبىلدىرۋى ابدەن مۇمكىن.

فرانتسۋزداردىڭ   Mediapart دەگەن باسىلىمى بار. نە بولسا سونى جازىپ، ارزان سەنساتسيا قۋىپ جۇرگەن ينتەرنەت-باسىلىم ەمەس. فرانتسۋزشا حاتقا جۇيرىك اعايىن سولاي دەسەدى. سول گازەت «قر پرەمەر-ءمينيسترى كارىم ءماسىموۆ   Airbus كومپانياسىنان 12 ميلليون ەۆرو پارا الدى دەگەن كۇدىككە ءىلىندى» دەپ جازىپ جاتىر. فرانتسيانىڭ قارجى پروكۋراتۋراسى Airbus كوماپنياسىنىڭ قازاقستانداعى قىزمەتىن 2013 جىلدان بەرى قاراي قاتاڭ باقىلاۋعا الىپ، تەكسەرە باستاپتى.  ويتكەنى، اتالعان قۇزىرلى ورگاننىڭ ءىس بارىسىن تەكسەرۋ ۇستىندەگى كۇدىگى بويىنشا،  Airbus كومپانياسىنىڭ توپ-مەنەدجەرلەرى 2010 جىلى قازاقستانعا 2 ملرد ەۆرو كولەمىندە 45 تىكۇشاق ساتىپ، ساۋدا-ساتتىق كەزىندە پرەمەر-مينيستر كارىم ءماسىموۆتىڭ جەكە ەسەپ شوتىنا 12 ملن ەۆرو اۋدارىپ جىبەرگەن كورىنەدى.

فرانتسيا سوتى Airbus Group-كە كوررۋپتسيامەن اينالىسقان دەپ رەسمي تۇردە ايىپ تاعىپ وتىر. وسى جايتتى  Mediapart ينتەرنەت-باسىلىمىنا سىلتەمە جاساي كەلىپ حابارلاعان ca-news.org (http://ca-news.org/news:1189636) سايتى: «بىزگە بەلگىلى اقپارات بويىنشا، فرانتسيانىڭ قارجى پروركۋرورى Airbus كومپانياسىن «شەتەلدىڭ لاۋازىمدى مەملەكەتتىك قىزمەتكەرىن پاراعا ساتىپ الىپ، كومپانيانىڭ قارجىلىق اكتيۆىن زاڭسىز جۇمسادى» دەگەن ايىپ تاعىپ، ءىستى جاڭا ايىپتاۋلارمەن تولىقتىرۋدا» دەپ جازادى.

قىسقاسى، فرانتسۋزدار وسىلاي دەسىپ گۋلەۋدە. ال، ءبىزدىڭ مۇنداي سوزگە سەنگىمىز كەلمەيدى. بىراق، «ەستىگەن قۇلاقتا جازىق جوقتىڭ»  جونىمەن جاريا ەتتىك. سەبەبى، جوعارىداعىنىڭ ءبارى قاڭقۋ ءسوز بولسا، ونى ەل ءىشىن ارالاتپاي توقتاتۋ كەرەك. ول ءۇشىن ارينە پرەمەر-مينيستر باق وكىلدەرىنە ءوزىنىڭ اقتىعى مەن پاكتىگىن جارتى اۋىز سوزبەن جەتكىزسە جەتىپ جاتىر.

Abai.kz