اقتوبەدە وتكەن جەكسەنبى كۇنى ەكى قارۋ-جاراق دۇكەنى مەن اسكەري بولىمشەگە ء"دىني راديكالدار توبى" جاساعان شابۋىلدار مەن ودان كەيىنگى وپەراتسيالار بارىسىندا قازا تاپقاندار سانى 17 ادامعا جەتكەن. بۇل تۋرالى ىشكى ىستەر مينيسترلىگىنىڭ ءباسپاسوز قىزمەتى حابارلادى. جارالانعاندار سانى 13 ادامعا جەتتى.

5 ماۋسىمدا اقتوبەدە تۇستەن كەيىن ءبىر توپ قارۋلى ادام "پاللادا" قارۋ-جاراق دۇكەنىنە شابۋىل جاساپ، ول جەردە ساتۋشى مەن كۇزەت اگەنتتىگىنىڭ ءبىر قىزمەتكەرى قازا تاپقان. بۇل شابۋىلدان دابىل بويىنشا دۇكەنگە بارعان ءبىر كۇزەت قىزمەتكەرى مەن ءۇش پوليتسيا قىزمەتكەرى جارالانعان.

رەسمي مالىمەت بويىنشا، قارۋلى توپ "پاللادادان" شىققان سوڭ ەكى توپقا ءبولىنىپ، التى ادامنان تۇراتىن ءبىر توبى "پانتەرا" قارۋ-جاراق دۇكەنىنە شابۋىلداعان. بۇل دۇكەنگە شابۋىلدان دۇكەندەگى ءبىر ادام قازا تاۋىپ، ءبىر ادام جارالانعان. بۇدان سوڭ دۇكەنگە بارعان پوليتسيا قىزمەتكەرلەرى شابۋىلداعان ءۇش ادامنىڭ كوزىن جويىپ، بىرەۋىن جارالاپ قولعا تۇسىرگەن. ەكى ادام قاشىپ ۇلگەرگەن. قاشقان ەكى ادام كەيىن قالا سىرتىنان تابىلىپ، كوزى جويىلعان.

ەكىنشى قارۋلى توپ قالادان جولاۋشىلار اۆتوبۋسىن باسىپ الىپ، ىشىنەن جولاۋشىلاردى شىعارىپ، ۇلتتىق ۇلاننىڭ 6655 اسكەري بولىمشەسىنە شابۋىلداعان. اسكەري ءبولىم قاقپاسىن بۇزىپ وتكەن توپ مۇندا اسكەريلەرمەن جانە پوليتسيامەن اتىسقان. اتىستان ءۇش اسكەري قىزمەتكەر وققا ۇشىپ، التاۋى جارالانعان. مۇندا شابۋىلداعانداردىڭ قارسىلىق كورسەتكەن ءبىر توبى قورشاۋعا الىنىپ، ەكىنشى بولىگى بولىمشە اۋماعىنان قاشىپ جاسىرىنىپ ۇلگەرگەن.

6 ماۋسىمعا قاراعان تۇنگى جەدەل-ىزدەستىرۋ شارالارى كەزىندە تاعى بەس كۇدىكتىنىڭ كوزى جويىلىپ، ەكەۋى ۇستالعان. ءىىم اقپاراتىنا قاراعاندا، قازىر شابۋىل جاساعانداردىڭ بارلىعىنىڭ اتى-ءجونى انىقتالعان. ولاردى ىزدەۋ جانە ۇستاۋ جۇمىستارى جالعاسىپ جاتىر.

"پاللادا" دۇكەنى قاسىندا ىزدەستىرۋ شارالارى كەزىندە شابۋىلعا قاتىسى بار دەگەن كۇدىكپەن بەس ادام ۇستالعان.

«پاللادا» دۇكەنىنىڭ قاسىندا ىزدەستىرۋ شارالارىن جۇرگىزۋ كەزىندە وسى قىلمىسقا قاتىسى بار كۇدىكتى 5 ادام ۇستالدى، ولار زاۋىت پوليتسيا بولىمشەسىنە جەتكىزىلدى.

اباي-اقپارات