ەلدە ورىن العان جاعدايعا بايلانىستى «نۇر وتان» پارتياسى توراعاسىنىڭ ءبىرىنشى ورىنباسارى م.قۇل-مۇحاممەد ۇندەۋ جاسادى.

ۇندەۋدە م. قۇل-مۇحاممەد اقتوبە قالاسىندا ورىن العان قانتوگىستە قازا تاپقانداردىڭ تۋىستارىنا كوڭىل ايتىپ، بۇل قاندى وقيعانىڭ ءبىزدىڭ مۇباراك دىنىمىزگە قاتىسى جوق ايۋاندىق ەكەنىن ايتادى. بارلىق قازاقستاندىقتاردى تاتۋلىق پەن بىرلىك ارقىلى عانا بارلىق قيىندىقتاردى ەڭسەرۋگە بولاتىنىنا سەندىرەدى.

قۇرمەتتى وتانداستار!

قازاقستان مۇسىلماندارى مەن بۇكىل يسلام دۇنيەسى بارشا ايلاردىڭ سۇلتانى – قاسيەتتى رامازان ايىندا وتەتىن ورازاعا دايىندالىپ جاتقاندا اقتوبە قالاسىندا جانتۇرشىگەرلىك لاڭكەستىك وقيعا ورىن الدى.

سىزدەر مەن ءبىزدىڭ باۋىرلارىمىز – بەيكۇنا جاندار جازىقسىز قۇربان بولىپ، وققا ۇشتى.

«نۇر وتان» پارتياسى قازا تاپقانداردىڭ تۋىستارى مەن جاقىندارىنا قاتتى قايعىرىپ، كوڭىل ايتادى.

ءبىز اكەسىنەن، باۋىرىنان جانە بالاسىنان قاپىدا ايىرىلعان سىزدەردىڭ ارقايسىلارىڭىزدىڭ قايعىلارىڭىزعا ورتاقپىز. سىزدەرمەن بىرگە ءبىز دە ازا تۇتامىز.

تەرروريستەردە ەشقاشان ۇلت تا، ءدىني سەنىم دە بولماعان. قاندىقول كىسى ولتىرۋشىلەر وزدەرىنىڭ قاساپتى ارەكەتتەرىن جالعان ءدىني ۇراندارمەن اقتاپ العىسى كەلەدى.

مۇنداي ادامگەرشىلىكتەن مۇلدە ادا ءىس-ارەكەتتەردىڭ مۇباراك دىنىمىزگە ءۇش قايناسا سورپاسى قوسىلمايتىنىن ايرىقشا قايتالاپ ايتقىم كەلەدى.

ناعىز مۇسىلمان ءۇشىن يسلام – ءاردايىم بەيبىتشىلىكتىڭ، مەيىرىمدىلىكتىڭ، توزىمدىلىكتىڭ جانە ءوزارا قۇرمەتتىڭ ءدىنى بولىپ قالا بەرەدى.

ءبىز تۋعان وتانىمىزدىڭ تاعدىرىن ويلايتىن بۇكىل حالىقتى بىرلىك پەن بەرەكەگە شاقىرامىز.

بارشا قازاقستاندىقتار ءۇشىن ەڭ قاسيەتتى قۇندىلىقتار سانالاتىن تاۋەلسىزدىك، ساياسي تۇراقتىلىق پەن قوعامدىق كەلىسىم ەلباسىمىز ۇستانعان قازاقستاننىڭ نىعايۋى، ءوسىپ-وركەندەۋى مەن گۇلدەنۋىنە باعىتتالعان ساياساتىنىڭ بەرىك ىرگەتاسى ەكەندىگىن ارقاشان ۇمىتپاۋىمىز كەرەك.

بۇكىل وتانداستارىمىزدى اعايىننىڭ بىرلىگىن، ەلىمىزدىڭ تىنىشتىعىن، حالقىمىزدىڭ تاتۋلىعىن كوزدىڭ قاراشىعىنداي ساقتاپ، ونى ودان ءارى نىعايتا بەرۋگە شاقىرامىز.

تەك بىرگە، تەك تاتۋلىقتا، تەك ءوزارا سىيلاستىقتا عانا ءبىز كەز كەلگەن قيىندىق پەن كەدەرگىنى ەڭسەرە الامىز. وسىنى ءاردايىم ەستە ۇستايىق، اعايىن!

اباي-اقپارات