اقتوبەدە انتيتەررورلىق وپەراتسيا رەجىمى جاريالاندى. بۇل تۋرالى قر ءىىم مەملەكەتتىك ءتىل جانە اقپارات دەپارتامەنتىنىڭ باسشىسى الماس سادۋباەۆ حابارلادى.

«بۇگىن استانا ۋاقىتى بويىنشا 15:45-تە اقتوبە وبلىسىنىڭ ىشكى ىستەر دەپارتامەنتىنە بەلگىسىز بىرەۋلەردىڭ «پاللادا» قارۋ-جاراق دۇكەنىنە شابۋىل جاساعانى تۋرالى حابارلاما كەلىپ ءتۇستى. 16:45-تە تاعى ءبىر قارۋ-جاراق دۇكەنىنە جانە ۇلتتىق ۇلان اسكەري بولىمىنە شابۋىل جاسالعانى حابارلاندى. وقيعا سالدارىنان «پاللادا» دۇكەنىنىڭ ساتۋشىسى قازا تاپتى، ءبىر ادام جارالاندى. شابۋىلدى تويتارۋ كەزىندە ءبىر وفيتسەر جانە ءبىر اسكەري قىزمەتكەر اجال قۇشتى، 9 اسكەري قىزمەتكەر جاراقات الدى. ال شابۋىل جاساۋشىلاردىڭ تاراپىنان 1 ادام تۇتقىندالدى، ۇشەۋىنىڭ كوزى جويىلدى، تاعى بىرەۋى جارالاندى. بىرنەشە قىلمىسكەر ءىز جاسىرىپ ۇلگەردى. ولاردى ۇستاۋعا باعىتتالعان جۇمىستار جۇرگىزىلىپ جاتىر.

الدىن الا بولجام بويىنشا، شابۋىلدى تەرىس اعىمداعى ءدىن ۇستانۋشىلار جاساعان. اقتوبە قالاسىندا انتيتەررورلىق وپەراتسيا رەجىمى جاريالاندى. ويىن-ساۋىق مەكەمەلەرىنىڭ جۇمىسى مەن قوعامدىق كولىك قاتىناسى توقتاتىلدى. تۇرعىندار كوشەگە شىقپاۋى جانە وتە ساق بولۋى كەرەك. قوسىمشا اقپاراتتار تاراتىلادى»، - دەدى الماس سادۋباەۆ.

جەدەل جاردەم كولىگىمەن بىرنەشە ادام اۋرۋحانالاورعا جەتكىزىلگەن. وبلىستىق دەنساۋلىق ساقتاۋ باسقارماسى باستىعى اسەت قاليەۆتىڭ ايتۋىنشا، التى بىردەي جان ساقتاۋ بولىمىندە كۇردەلى وپەراتسيا وتكەن. التى بىردەي ازامات ىشىنەن جانە كەۋدە تۇسىنان اۋىر جاراقات العان. ءا. قاليەۆتىڭ ايتۋىنشا جاراقات العاندار قاراقشىلار شابۋىل جاساعان «پانتەررا»، «پاللادا» قارۋ-جاراق دۇكەندەرى مەن اسكەري بولىمدە دە بار.

مەملەكەتتىك ورگاندار بۇل وقيعانى لاڭكەستىك ارەكەت دەپ باعالاپ وتىر. قازىر قارۋلى كۇشتەر مەن ارنايى ورگاندار كۇشەيتىلگەن رەجيمدەگى قىزمەتكە كوشكەن. قالادا لاڭكەستىككە قارسى وپەراتسيا رەجيمى ەنۋىنە بايلانىستى قوعامدىق كولىك پەن كوڭىل كوتەرۋ ورىندارىنىڭ جۇمىسى توقتاتىلعان. سونداي-اق، تۇرعىندار ءتۇس كەزىندە تەلەفون بايلانىسى ءۇزىلىپ، قايتا قوسىلعانىن، قازىر ينتەرنەت جەلىسى ىستەمەي تۇرعانىن ايتۋدا.

رەسمي مالىمەتتەردىڭ كەش تاراۋىنا، حالىقتى قۇلاقتاندىرۋدىڭ جانە ءتۇسىندىرۋ جۇمىستارىنىڭ كەمشىلىگىنەن جەلىدە، تەلەفون بايلانىسى ارقىلى ءتۇرلى اقپارات تاراۋدا. 

سونداي-اق، الەۋمەتتىك جەلى مەن اقپاراتتىق سايتتاردا پوليتسيا كولىگىنىڭ جانىندا ەكى ادامنىڭ قۇلاپ جاتقان سۋرەتى جاريالانۋدا (وقىرمانداردىڭ دەنساۋلىعىنا كەرى اسەر ەتپەسىن دەگەن نيەتپەن ول ادامداردىڭ سۋرەتىن جاريالاۋدى ءجون كورمەدىك). ول ازاماتتاردىڭ دا كىم ەكەنى تۋرالى ناقتى اقپارات جوق. ءبىر انىعى 6-7 ماۋسىمدا ءوتۋى ءتيىس ۇلتتىق بىرىڭعاي تەستىلەۋ كەيىنگە قالدىرىلعان، تۇرعىندارعا لاڭكەستىككە قارسى ارنايى وپەراتسيا وتۋىنە بايلانىستى لاڭكەستىك قاۋىپتىڭ "قىزىل دەڭگەيى" بەلگىلەنگەنى تۋرالى سمس-حابارلاما جولدانعان.

"قىلمىسكەرلەر اسكەري بولىمگە شابۋىلداۋ ءۇشىن اۆتوبۋستى باسىپ العانى بەلگىلى بولدى. جۇرگىزۋشىسى مەن جولاۋشىلارىن ءتۇسىرىپ، كەيىن قاقپانى سوعىپ، تەرريتورياعا كىرىپ، اتىس شىعارعان، ءۇش اسكەريدى ءولتىرىپ، التى اسكەريدى جاراقاتتاعان. كەزەكشى قاراۋىل ءبولىم تەرريتورياسىنا كىرمەك بولعانداردى توقتاتتى. ال كەيىن وقيعا ورنىنا كەلگەن پوليتسيا جاساعىمەن بىرگە ءبىر قىلمىسكەردىڭ كوزىن جويعان، تاعى بىرەۋى جاراقات الىپ، ۇستالدى. انتيتەررورلىق وپەراتسيانى جۇرگىزۋ بارىسىندا جالپى 4 قىلمىسكەردىڭ كوزى جويىلدى، جەتەۋى ۇستالدى، ولاردىڭ ەكەۋى جاراقات العان.

Abai.kz