كەيىنگى كەزدە ەكى ايەل الۋ، جالپى، بايبىشە-توقال تاقىرىبىنا قاتىستى جازبالاردىڭ استىنا كەيدە سالماقتى، كەيدە قىجىرتپا پىكىر جازىپ، كەيدە "بەنزين" شاشىپ كەتىپ ءجۇرمىن. بىرجاقتى پىكىر بولمايدى مۇنداي تاقىرىپتا.

ءبىر تانىسىم: "ەكىنشى ايەل العىسى كەپ جۇرگەندەردىڭ كوبى جاس قىزدارعا جۇگىرەدى. دۇرىس تا شىعار. بالا سۇيگىسى كەلەدى دەگەندەي... بىراق نەگە 40-تان اسقان وتىرىپ قالعان قىزدى الماسقا؟ ەگەر، شىنىمەن، قازاق قىزدارىنا جاندارى اشيتىن بولسا، سويتەر ەدى عوي. ولاي ەمەس، وكىنىشكە قاراي. جاپ-جاس قىزدارعا جۇگىرەدى. جار تاڭداۋعا مۇمكىندىگى مول ونداي قىزدار "تۇمسىعىن قارتايتا الماي" جۇرگەن ورتا جاستان اسقان "جىگىتتەردى" نەعىلسىن؟ بىراق سونى مارتەبە قىلاتىندار بار عوي، اسىرەسە دۇنيە ءۇشىن", - دەدى.

شىنىندا دا! بىردەڭە الىپ-قوسۋدىڭ ءوزى ارتىق مۇندايدا. "قازاق بايىسا، قاتىن الادى" دەگەن ماقال دا وزدىگىنەن شىعا سالماعان بولار... ال كەيبىر "دانىشپان" تومەن ەتەكتى بايبىشەنىڭ ءوزىمشىل بولماۋى كەرەكتىگىن ايتىپ ءدىلمارسيدى. پا، شىركىن! ءبىردى ەكى ەتە الماي جۇرگەن، نە جۇمىسى وڭدى ەمەس، نە باسپاناسى جايلى ەمەس بوسبەلبەۋ ەركەكتىڭ ەكىنشى ايەلدى ويلاۋعا شاماسى جوق، ونىڭ ايەلىنە دە ءباربىر، بالكىم... ال ومىردە بار قيىندىقتى بىرگە كورىپ، بىرگە جەتىستىككە جەتىپ نەمەسە كۇيەۋىنىڭ بار تەنتەكتىگى مەن سەرىلىگىن كەشىرىپ، سىرتقا ەشتەڭەسىن سەزدىرمەي، جىلى-جۇمساعىن سونىڭ اۋزىنا توسىپ، جاقسىنى تەك كۇيەۋىنىڭ ۇستىنە جاپسىرىپ ءجۇرىپ ءومىردىڭ جارتى بەلەسىن وتكىزگەن ايەلدى، كەشىرىڭدەر، "سۋپەروزىمشىل" دەپ ايىپتاسا دا، مەن سونداي جەڭەشەلەرىمنىڭ جاعىندامىن! تاپ سونداي ايەلدەردىڭ ازاماتتارى ەكىنشى ايەل السا، قازاقتىڭ سانى كوبەيمەك تۇر عوي اسىپ، دۇنيەسى تولماق تۇر عوي توگىلىپ، قازاقستان كوركەيىپ گۇلدەنىپ كەتەدى دەسە دە، قارسىمىن. ايەلىنىڭ ارقاسىندا تاپ-تۇيناقتاي بولىپ، ماڭدايى جارقىراپ جۇرگەن ونداي ازاماتتاردىڭ سول جەڭگەلەرىممەن عانا قالعانىن قالاعان بولار ەدىم.

ارينە، بۇل - مەنىڭ جەكە پىكىرىم. "ەكىنشى ايەل الام" دەپ داۋرىعاتىندار: "ماعان ول تيە مە ەكەن", - دەپ نەگە ويلانبايدى ەكەن، ا؟ جو-جوق، مەنى ەشكىم الايىن دەپ جاتقان جوق، مەنىڭ دە بايسىراپ بارا جاتقانىم شامالى، جۇرەكتەرىڭدى ورنىنا تۇسىرىڭدەر! تەگىسىن ايتقانىم عوي... 

جاي... كەيدە ءبىزدىڭ ەلدە بارلىق ماسەلەنىڭ ءتۇيىنى شەشىلىپ، دۇنيەنىڭ ۇشى تەك بايبىشە-توقالعا كەپ ءتۇيىلىپ قالعانداي وسى تاقىرىپتى جاپ-جاس قىز-جىگىتتەردىڭ تالقىلاپ وتىرعانىن وقىعاندا كەلگەن وي عوي.

ايگۇل بولاتحانقىزى

Facebook-تەگى پاراقشاسىنان