ءمولدىر ادىلوۆا بوستاندىققا شىقتى
الماتىدا جەر ماسەلەسىنە قاتىستى شەرۋ وتەدى دەلىنگەن 21 مامىر قارساڭىندا ۇستالىپ، "رۇقسات ەتىلمەگەن ميتينگ ۇيىمداستىرۋ" بابى بويىنشا 15 كۇنگە قامالعان ازاماتتاردىڭ ءبىرى ءمولدىر ادىلوۆا بوستاندىققا شىقتى. ادىلوۆانى اكىمشىلىك جازاعا تارتىلعانداردى قاماۋ ورنىنىڭ الدىندا بىرنەشە ازاماتتىق بەلسەندى كۇتىپ الدى. بوستاندىققا شىققان ءمولدىردى اكە-شەشەسى جۋرناليستەرمەن كوپ تىلدەستىرمەي، اسىعىس تۇردە الىپ كەتتى.
الماتىنىڭ اۋدانارالىق مامانداندىرىلعان سوتى 18 مامىردا ءمولدىر ادىلوۆانى «الەۋمەتتىك جەلىدە كوپشىلىكتى جەر ماسەلەسى بويىنشا ميتينگىگە شاقىردى» دەگەن ايىپپەن 15 تاۋلىككە قاماعان. ول بۇل ايىپپەن كەلىسپەي، «قازاقستاننىڭ پاتريوتى رەتىندە جەر ماسەلەسىنە قاتىستى جەكە پىكىرىن بىلدىرگەنىن» ايتقان.
2 ماۋسىمعا قاراعان ءتۇنى الماتىدا 15 تاۋلىككە قامالعان قۇقىق قورعاۋشى باقىتجان تورەعوجينا، بەلسەندى مارات ۋاتحان، 1 ماۋسىمدا كەشكە قۇرال يسمانوۆ، سۇيىندىك الدابەرگەنوۆ بوستاندىققا شىققان.
"21 مامىردا جەر رەفورماسىنا قاتىستى بۇكىلقازاقستاندىق ميتينگ وتەدى" دەگەن اقپارات تاراعان سوڭ مامىردىڭ 17-سىنەن باستاپ 30-عا تارتا ادام ۇستالىپ، 10-15 تاۋلىككە دەيىن قامالعان.
21 مامىردا قازاقستاننىڭ بىرنەشە قالاسىندا جەردى ساتۋ جانە شەتەلدىكتەرگە ۇزاق مەرزىمگە جالعا بەرۋگە قارسى ميتينگىنى پوليتسيا بولدىرماي، وعان قاتىسپاق بولعان ونداعان ادامدى پوليتسيا ۇستاعان. ۇستالعانداردىڭ كەيبىرىنە ميتينگىگە قاتىستى ايىپ تاعىلىپ، اكىمشىلىك ايىپپۇل سالىنعان. ۇستالعاندار اراسىندا ونداعان جۋرناليست پەن ازاماتتىق بەلسەندىلەر دە بولعان.
اسىلحان ماماشۇلى
