بەلگىلى قوعام قايراتكەرى، اقىن ءجۇرسىن ەرمان ايتىستا، قوعامدا بولىپ جاتقان ماسەلەلەرگە بايلانىستى پىكىرىن ءبىلدىردى. اقىن وزىنە كۇندەلىكتى سىن كوزبەن قارايتىنىن ايتادى، دەپ حابارلايدى «halyknews.kz» پورتالى.

«وزىمە كۇن سايىن سىن كوزبەن قارايمىن. نە تىندىردىم؟ نە تىندىرا الامىن؟ ەڭبەگىڭ ەش، تۇزىڭ سور كوپ جىلدار زايا كەتىپ قالعان. بىراق قازاق رۋحانياتىنا قارلىعاشتىڭ قاناتىمەن سۋ سەپكەندەي ءتول ونەرى ايتىستى قاتارعا قوسقانىما كەيدە ريزا بولاسىڭ، كەيدە قاڭقۋ سوزدەر ەستىلگەندە وزىڭنەن ءوزىڭ نالىپ، بەزىپ كەتكىڭ كەلەدى. سول ەكى ورتادا، اسپان استى جەر ۇستىندە قاپىلىپ جۇرگەن اداممىن»، – دەيدى ءجۇرسىن ەرمان.

ءجۇرسىن ەرمان اقىن مۇحتار شاحانوۆتىڭ دا كەي پىكىرىن قولداماي، سىنعا الاتىنىن ءبىلدىردى.

«مۇحتار شاحانوۆتى دا سىنعا الامىن. ويتكەنى اعامىز سوڭعى ەكى-ءۇش جىلدا قالام ۇستاعانداردى جازعانىنا قاراپ ەمەس، ارەكەتىنە قاراپ باعالايمىن دەگەن ۇستانىمىن ايتتى. ول ابايدان گورى ماحامبەتتى جوعارى قويامىن دەيدى. وسىنداي كوزقاراس بولا ما؟ ماحامبەت باسىنان ايىرىلىپ قالدى دەيدى. سوندا اباي باسىنان ايىرىلماعانى ءۇشىن كىنالى مە؟ اباي ءبىزدىڭ ەڭ اقىرعى قاسيەتىمىز، جۇلدىزىمىز. ابايدى سالىستىرماي-اق، وسى ءوزىمىزدىڭ توڭىرەگىمىزدەگى ءوز شارۋامىزدى تۇگەندەي بىلسەك جارايدى عوي»، – دەپ ناليدى اقىن.

ءجۇرسىن ەرمان سوڭعى ۋاقىتتا شىعىپ جاتقان شوۋ-ايتىستى دا تىلگە تيەك ەتتى.

«جۇلدىزدار ايتىسادى» ايتىسى العاش قولعا الىنعاندا وعان قارسى بولعاندار قازىر ۇندەمەيدى. مۇنىڭ سونشالىقتى ايتىستى قورلايتىنداي جەكسۇرىن نارسە ەمەستىگىنە كوزدەرى جەتتى دەپ ويلايمىن»، – دەيدى ول.

اقىن جەلى قولدانۋشىلار اراسىندا، ەل اراسىنداعى ءوزى جايلى قارسى  پىكىرلەر ايتىلاتىنىنان  حاباردار ەكەنىن جەتكىزدى.

ء«جۇرسىن ەرماننىڭ ءوزى دە سالافيتتەر ساپىندا دەگەن اڭگىمە بۇرىن دا بولعان. مەنىڭ شەشەمنىڭ اكەسى مولدا بولعان ادام، اكەم بەس ۋاقىت نامازىن ۇزبەگەن ادام. مەن وسى ءسالافيزمنىڭ نە ەكەنىنەن دە حابارىم جوق ەكەن. ماڭدايىمدى ساجدەگە تيگىزىپ ەرتەلى-كەش ناماز وقىپ جاتپاسام دا، ءتىلىمدى كاليماعا كەلتىرىپ، يمانىمدى تۇگەندەۋگە تىرىسىپ جۇرگەن كوپ قازاقتىڭ ءبىرىمىن. سوندىقتان مەنى ءار توپقا ءبىر قوسىپ، قولدان «گەروي» جاساۋدىڭ كەرەگى جوق»، -دەيدى ەرمان.

قوعام قايراتكەرى جەر كومميسياسىنىڭ دا جۇمىسىن دا ايتىپ ءوتتى. ول كوميسسيا جۇمىسىنىڭ ناتيجەسىندە ءادىل شەشىم بولاتىنىن ايتادى.

«جەر كوميسسيانىڭ جۇمىسى ەندى باستالىپ جاتىر. بارىمىزگە پىكىر ايتۋعا ەركىندىك بەرىلدى. كوميسسيانى باسقارىپ وتىرعان ءبىرىنشى پرەمەر دۇرىس ادام ەكەن. جۇرتتىڭ ءبارىن اۋزىن جاپپاي، بەتىنەن قاقپاي سويلەتىپ جاتىر. سوندىقتان قازاققا ورتاق ءادىل شەشىم بولادى دەپ كامىل سەنىپ وتىرمىن»، – دەيدى ءجۇرسىن ەرمان.

Abai.kz