ماتاەۆ ءىسى. سوتتان 150 كۋاگەردەن جاۋاپ الۋىن سۇرادى
قازاقستان جۋرناليستەر وداعىنىڭ توراعاسى سەيىتقازى ماتاەۆتىڭ ادۆوكاتى ونداعان ادامدى كۋالىككە تارتۋ تۋرالى ءوتىنىش ءتۇسىردى. ولاردىڭ اراسىندا شەنەۋنىكتەر مەن مەملەكەتتىك كومپانيالاردىڭ باسشىلارى بار.
ماتاەۆتىڭ ادۆوكاتى اندرەي پەتروۆتىڭ ايتۋىنشا، سوتقا ءالى شاقىرىلماعان جاڭا كۋاگەرلەردەن جاۋاپ الۋ تۋرالى ءوتىنىش جاسالعان.
ماتاەۆتاردىڭ قورعاۋشىسى سوتقا شاقىرتقان 152 كۋاگەردىڭ اراسىندا اقپارات جانە كوممۋنيكاتسيا ۆيتسە-ءمينيسترى ساكەن سارسەنوۆ، "قازاقتەلەكوم" كومپانياسىنىڭ باسقارما توراعاسى قۋانىشبەك ەسەكەەۆ، "قازاتومپروم" كومانياسىنىڭ باسشىسى اسقار جۇماعاليەۆ، سونداي-اق بايلانىس كوميتەتىنىڭ قىزمەتكەرلەرى جانە باق وكىلدەرى بار.
ادۆوكات اندرەي پەتروۆتىڭ ايتۋىنشا، ونىڭ ءوتىنىشىن سوت ازىرگە اشىق قالدىردى.
سەيىتقازى ماتاەۆ پەن ونىڭ ۇلى اسەتكە قاتىستى سوت 23 تامىزدا باستالدى. ولارعا مەملەكەتتىك تاپسىرمانى باق-تا ورنالاستىرۋعا بولىنگەن اقشانى جىمقىردى دەگەن ايىپ تاعىلدى. ولار بيىل اقپاندا ۇستالدى، كەيىن الماتىدا ءۇي قاماۋىنا اۋىستىرىلدى، ال تامىز ايىندا استاناعا اۋىستىرىلدى. مۇندا دا ولار ءۇي قاماۋىندا وتىر. ماتاەۆتار تاعىلعان ايىپتاردىڭ بارلىعىن جوققا شىعاردى.
اباي-اقپارات
