بۇل تۋرالى بۇگىن وقو ايماقتىق كوممۋنيكاتسيالار قىزمەتىندە وتكەن بريفينگتە وبلىستىق ساۋلەت جانە قالا قۇرىلىسى باسقارماسىنىڭ باسشىسى ەركىن ءجۇسىپوۆ حابارلادى. 

سپيكەردىڭ ايتۋىنشا، سانىنە ساۋلەتى كەلىسكەن جوبالاردىڭ باسىم بولىگى، ياعني 40-تان استام ءىرى جوبا، سوڭعى التى جىلدا – 2009-2015 جىلدار ارالىعىندا ىسكە اسىرىلىپ، بوي كوتەرگەن. 
اتاپ ايتقاندا، «جەر انا» مونۋمەنتى، ورداباسى الاڭىنداعى سۋبۇرقاق، جىبەك جولى اللەياسى (ت.رىسقۇلوۆ ەسكەرتكىشى), كوركەمونەر گالەرەياسى، اباي مۇراجايى، ديۋاني حيكمەت اللەياسى (تۇركىستان ق.), «داڭق» مەموريالى، دەندروساياباقتى قايتا جوندەۋ، ء«شامشى الەمى» سكۆەرى، سپورتشىلار اللەياسى، نەكە سارايى، جاستار ورتالىعى، قابانباي باتىر ەسكەرتكىشى، بوسانعانعا دەيىنگى ورتالىق، وبلىستىق فيلارمونيا، «قىزعالداق» سۋبۇرقاعى جوبالارى بولىپ جالعاسىپ كەتە بەرەدى. 

«وبلىستىڭ ساۋلەتتىك ءسانىن ارتتىرىپ، كوركەيتۋگە باعىتتالعان جۇمىستار مۇنان ءارى جالعاسىن تابا بەرەدى. ماسەلەن، تۇركىستان قالاسىنا 60 شاقىرىم كىرە بەرىس جەرگە تۇركى تىلدەس حالىقتاردىڭ قالاشىعىن سالۋ جوسپارلانىپ وتىر. شىعىس حالىقتارىنا بەرىلەتىن ەتنو قالانى ءار ۇلت وزدىگىنشە اسەمدەيتىن بولادى. مۇنان بولەك، تاياۋدا ءوڭىرىمىزدىڭ قىزىلوردا جانە جامبىل وبلىستارىمەن شەكتەسەتىن بولىگىندە «وڭتۇستىك» سيمۆوليكالىق قاقپاسى بوي كوتەرمەك»،-دەدى باسقارما باسشىسى. 

ءباسپاسوز جيىنىندا ە.ءجۇسىپوۆ وبلىستاعى تۇرعىندار سانى بەس مىڭنان اساتىن ەلدى مەكەندەردى باس جوسپارمەن قامتاماسىز ەتۋ جايى 98,1 پايىزدى قۇرايتىنىن جەتكىزدى. جۇمىستاردىڭ اتقارىلۋى جونىنەن رەسپۋبليكا بويىنشا ەكىنشى ورىندا تۇرعان ايماعىمىزدا 2020 جىلعا دەيىن بۇل ناتيجە 99,6 پايىزعا شىقپاق.

Abai.kz