وڭتۇستىك قازاقستان وبلىسىندا جازعى ءداندى داقىلداردى جيناۋ جۇمىستارى تولىعىمەن اياقتالدى. بيىل وبلىس ديحاندارى استىق وسىرۋدە وزىق تەحنولوگيالاردى، ونىڭ ىشىندە تەرەڭ قوپسىتۋ ءادىسىن قولدانا وتىرىپ، ۇلكەن كورسەتكىشتەرگە قول جەتكىزدى.

وڭتۇستىكتىڭ شارۋالارى 214,4 مىڭ گەكتار جەرگە ەگىلگەن ماساقتى ءداندى داقىلداردىڭ ءار گەكتارىنان 22 تسەنتنەردەن، بارلىعى 470 مىڭ توننا ءونىم جينادى. بۇل قازاقستاننىڭ ەگەمەندىك العان جىلداردان بەرگى ءوڭىر ديحاندارىنىڭ جەتكەن جوعارى جەتىستىگى دەپ ايتۋعا بولادى.

ماسەلەن، قازىعۇرتتا 42 مىڭ گەكتار جەرگە ەگىلگەن استىقتان گەكتارىنا 26,5 تسەنتنەر، تولە بي اۋدانى 20,6 مىڭ گەكتار استىقتىڭ ءار گەكتارىنان 26 تسەنتنەردەن ءونىم السا، تۇلكىباستىق شارۋالار 24,8 مىڭ گەكتار القاپتان 25,2 تسەنتنەردەن ءونىم جينادى.

سونىمەن قاتار، وبلىستا داندىك جۇگەرىنى ورۋ ناۋقانى باستالىپ، 40,1 مىڭ گەكتار جەرگە ەگىلگەن جۇگەرىنىڭ بۇگىندە 3,3 مىڭ گەكتارىنا وراق ءتۇستى. ونىڭ گەكتارىنان 42,4 تسەنتەر، بارلىعى 13,8 مىڭ توننا ءونىم جينالدى. ال 74 مىڭ گەكتار جەرگە ەگىلگەن ماقسارىنىڭ بۇگىندە 28,7 مىڭ گەكتارى ورىلىپ، ودان 20,1 مىڭ توننا ءونىم الىندى. الدىن-الا ەسەپ بويىنشا ديقاندار ءار گەكتارىنان 7 تسەنتنەردەن جالپى 52 مىڭ توننا ءونىم جيناۋدى جوسپارلاۋدا.

جالپى العاندا وبلىستا وسى جىلى ءداندى داقىلداردان 660 مىڭ توننا ءونىم جينالادى دەپ كۇتىلۋدە.

Abai.kz