شىمكەنت قالاسىنىڭ اكىمى عابيدوللا ءابدىراحىموۆ قالالىق ءماسليحات دەپۋتاتتارى الدىندا ەسەپ بەردى. ەسەپتى جيىنعا وبلىس اكىمىنىڭ ورىنباسارى ەربول سادىر، حالىق قالاۋلىلارى قاتىستى. سەسسيا جيىنىندا شاھار باسشىسى وتكەن جىلى قالا ەكونوميكاسىنا جان-جاقتى تالداۋ جاسالىنىپ، قالانىڭ 2020 ج. ارنالعان الەۋمەتتىك-ەكونوميكالىق دامۋ كونتسەپتسياسى دايىندالعاندىعىن جەتكىزدى.

وسىلايشا، جوسپارلانعان ءىس-شارالاردى ىسكە اسىرۋ ءۇشىن قالانىڭ 2016 ج.بيۋدجەتىنە جاڭادان 68 جوبا (16,3 ملرد.تەڭگە جوسپارلانعان) ەنگىزىلگەندىگىن ايتىپ ءوتتى. وسى جىلدان باستاپ اكىمدىكتىڭ جۇمىس جوسپارىنا قالا تۇرعىندارىن تولعاندىراتىن نەگىزگى ماسەلەلەردى شەشۋ، قالا تۇرعىندارىنىڭ قاۋىپسىزدىگى، باسپانا جانە الەۋمەتتىك ينفراقۇرىلىم جۇيەلەرىن جەتىلدىرۋ جانە قالادا بيزنەسكە قولايلى جاعداي جاساۋ، ينۆەستيتسيا مەن تۋريستەردىڭ سانىن ارتتىرۋ مىندەتتەرى قويىلىپ وتىر. وسى ماسەلەلەردى تولىق قامتىعان قالا اكىمىنىڭ ەسەبىنە قالالىق ءماسليحات دەپۋتاتتارى وڭ باعا بەردى.

بايانداماسىنىڭ سوڭىندا شاھار باسشىسى ەلباسى ن.نازارباەۆتىڭ سىندارلى ساياساتىنىڭ ارقاسىندا جىل وتكەن سايىن ءۇشىنشى مەگاورتالىق-شىمكەنت قالاسى بيۋدجەتىنىڭ ءوسىپ كەلە جاتقاندىعىن ايتا كەلە، "پرەزيدەنت تاپسىرماسىنىڭ جوعارى دەڭگەيدە ورىندالۋىنا بار كۇش-جىگەرىمدى سالا قىزمەت ەتەمىن",- دەدى.

"نۇرلى جول" باعدارلاماسى اياسىندا رەسپۋبليكالىق بيۋدجەتتەن 11 نىساننىڭ قۇرىلىسىنا 7,4 ملرد.تەڭگە ءبولىنىپ، قازىرگى تاڭدا بارلىق نىساننىڭ مەردىگەرلەرى انىقتالىپ، 3,1 ملرد.تەڭگەسى يگەرىلدى. ال، حالىقتى ينجەنەرلىك جۇيەلەرمەن قامتۋ باعىتىندا قالا تۇرعىندارى ورتالىقتاندىرىلعان ساپالى اۋىز سۋمەن 85, كاناليزاتسيا جۇيەلەرىمەن 41, گازبەن 86, ال، ساپالى ەلەكتر قۋاتىمەن 84 پايىزعا قامتىلعان. بيىلعى جىلى بارلىعى 47 ينجەنەرلىك جۇيەلەردىڭ قۇرىلىسىنا 18,6 ملرد.تەڭگە قارجى ءبولىندى. وسى ۋاقىت ىشىندە شاھاردا 9 اۋىز سۋ قۇبىرىنىڭ قۇرىلىسى جۇرگىزىلىپ، بيىل ونىڭ 7-ءۋى پايدالانۋعا بەرىلەدى. ناتيجەسىندە 98 مىڭ حالىق اۋىز سۋمەن قامتىلادى. ال، ەلەكترمەن قامتاماسىز ەتۋ باعىتىندا 10 جوبانىڭ قۇرىلىسى جۇرگىزىلىپ، ونىڭ التاۋىنىڭ قۇرىلىسى اياقتالدى. وسىلايشا بۇل كورسەتكىش 84 پايىزدان 88 پايىزعا ءوستى. گازبەن قامتاماسىز ەتۋ باعىتىندا جۇرگىزىلگەن 8 جوبانىڭ 4 جوباسى اياقتالىپ، ەل يگىلىگىنە بەرىلدى. 64 مىڭ حالىق ورتالىقتاندىرىلعان كارىز جۇيەسىمەن قامتىلعان.

Abai.kz