قر تاۋەلسىزدىگىنىڭ 25 جىلدىعىنا وراي «اۋىل» پارتياسى مەن «قازكونتەنت» اق «ادەبيەت پورتالىنىڭ» جاس اقىن-جازۋشىلار اراسىندا «اۋىلىم – التىن تۇعىرىم» اتتى ادەبي ونلاين-كونكۋرس ۇيىمداستىرىپ وتىر. 

بۇل كونكۋرستىڭ باستى ماقساتى  - جاس تالاپكەرلەر اراسىندا اۋىلدىڭ رۋحاني ءومىرىن، تىنىس-تىرشىلىگىن، اۋىلدا ءجۇرىپ جاتقان الەۋمەتتىك-ەكونوميكالىق پروتسەسستەردى سۋرەتتەۋ، اۋىل قۇندىلىقتارىن ناسيحاتتاۋ، جاس قالامگەرلەر، اقىندار مەن جازۋشىلاردى قولداۋ جانە شىعارماشىلىعىن دامىتۋ. 

بايقاۋعا 14 پەن 45 جاس ارالىعىنداعى كەز كەلگەن قالامگەرلەر ءوز شىعارمالارىن ۇسىنا الادى. ۇمىتكەرلەر كونكۋرسقا ۇسىنىلعان شىعارمالارى مەن جەكە مالىمەتتەرىن «ادەبيەت پورتالىندا» كورسەتىلگەن «شىعارمانى ەنگىزۋ» باتىرماسى ارقىلى ورنالاستىرا الادى. ءاربىر قاتىسۋشىنىڭ جەكە پاراقشاسىندا جاريالاعان شىعارمالارعا پورتالعا تىركەلگەن قولدانۋشىلار جۇلدىزشالار ارقىلى داۋىس بەرە الادى. كونكۋرس سوڭىندا ءار نوميناتسيا بويىنشا كوميسسيا مۇشەلەرى قاتىسۋشىلاردى جەكە-جەكە باعالايدى. 

ايتا كەتەيىك، كونكۋرسقا قاتىسۋ ءۇشىن شىعارمالار ونلاين تۇرىندە «ادەبيەت پورتالىندا» 2016 جىلعى 1 جەلتوقسانعا دەيىن ورنالاستىرىلۋى ءتيىس. كوركەمدىك دەڭگەيى تومەن شىعارمالار قابىلدانبايدى. كونكۋرسقا قاتىسۋشىلاردى كوميسسيا مۇشەلەرى جەكە-جەكە باعالايدى. ۇسىنىلعان شىعارمالار بۇعان دەيىن ەش جەردە جاريالانباعان بولۋى شارت. ۇمىتكەر كونكۋرسقا ۇسىناتىن ەڭبەگىن پورتالدا ونلاين ارقىلى جاريالاي الادى، سونىمەن قاتار «ادەبيەت پورتالىنىڭ» ەلەكتروندى پوشتاسى: adebiportal@gmail.com  تىكەلەي جولداي الادى. 

ايتا كەتەيىك، كونكۋرسقا شىعارمالار ءۇش اتالىم بويىنشا: پروزا، پوەزيا، دراماتۋرگيا جانىرلارى بويىنشا قاتىسا الادى. ءۇش نوميناتسياداعى 1-ورىن جەڭىمپازدارىنىڭ اراسىنداعى ۇزدىك قالامگەرگە «التىن تۇعىر» ادەبي جۇلدەسى بەرىلەدى. «اۋىل تاقىرىبىنا ارنالعان ۇزدىك پروزا» (ەسسە، اڭگىمە، پوۆەست) اتالىمى بويىنشا 1-ورىن 500 000 تەڭگە; 2-ورىن 300 000 تەڭگە; 3-ورىن 200 000 تەڭگە بولادى. قالعان ەكى اتالىم، ياعني «اۋىل تاقىرىبىنا ارنالعان ۇزدىك پوەزيا» (ولەڭ، باللادا، پوەما) مەن «اۋىل تاقىرىبىنا ارنالعان ۇزدىك دراماتۋرگيا» اتالىمدارى بويىنشا دا ءدال وسىنداي جۇلدە قورى بەكىتىلگەن.

بايقاۋعا قاتىسۋشىلاردىڭ شىعارمالارىن پروزا بويىنشا راحىمجان وتارباەۆ، مارحابات بايعۇت جانە ەربول بەيىلحان، پوەزيادا تالعات ەشەنۇلى، ەرقوجا القوجاۇلى، باۋىرجان قاراعىزۇلى جانە درامتۋرگيا بويىنشا جابال ەرعاليەۆ، جولتاي ءالماش، روزا مۇقانوۆا سىندى قازاق ادەبيەتىنىڭ بەدەلدى وكىلدەرى سىن تەزىنەن وتكىزەدى.

كونكۋرس قورىتىندىسى 2016 جىلى 3 جەلتوقساندا شىعارىلادى. جەڭىمپازداردى ماراپاتتاۋ 2016 جىلى 7 جەلتوقساندا وتكىزىلەدى. سالتاناتتى شارانىڭ وتكىزىلەتىن ورنى قوسىمشا حابارلانادى. تولىعىراق اقپاراتتى «ادەبيەت پورتالىنان» الا الاسىزدار.