استاناداعى №2 ەسىل اۋداندىق سوتىندا قازاقستان جۋرناليستەر وداعىنىڭ توراعاسى سەيىتقازى ماتاەۆ پەن ونىڭ ۇلى، «قازتاگ» حالىقارالىق اقپاراتتىق اگەنتتىگىنىڭ باس ديرەكتورى اسەت ماتاەۆتىڭ قىلمىستىق ءىسى بويىنشا كۋاگەرلەردەن جانە زارداپ شەككەن تاراپ وكىلدەرىنەن جاۋاپ الۋ ودان ءارى جالعاسۋدا.

سوتتىڭ بۇگىنگى وتىرىسىندا زارداپ شەككەن تاراپ – «قازاقتەلەكوم» اق سەيىتقازى ماتاەۆتان 143 ملن. تەڭگە ءوندىرىپ بەرۋدى ءوتىندى. زارداپ شەككەن تاراپتىڭ شاعىمىن «قازاقتەلەكوم» اق-نىڭ قىزمەتكەرى ايگۇل دايروۆا وقىپ بەردى. تەرگەۋدىڭ نۇسقاسى بويىنشا، «ۇلتتىق ءباسپاسوز كلۋبى» قوعامدىق بىرلەستىگىنىڭ پرەزيدەنتى سەيىتقازى ماتاەۆ 2011-2013 جىلدار ارالىعىندا قىزمەت تۇرلەرىنىڭ قۇنىن كوتەرۋ جولىمەن «قازاقتەلەكوم» اق-نا جارنامالىق-اقپاراتتىق ماتەريالداردى ورنالاستىرۋعا بولىنگەن 398 ملن. تەڭگەنىڭ 143 ملن-ىن ۇرلاعان. مۇنداي الاياقتىقتى ىسكە اسىرۋعا «قازاقتەلەكوم» اق-نىڭ ستراتەگيالىق باسقارۋ جونىندەگى باس ديرەكتورى باتىر ماحانبەتاجيەۆ كومەكتەسەدى. ول كۋاگەر رەتىندە سوتقا بەرگەن تۇسىنىگىندە ءوزىنىڭ قىزمەتتىك وكىلەتتىگىن پايدالانىپ، «ۇلتتىق ءباسپاسوز كلۋبى» قوعامدىق بىرلەستىگىنىڭ مۇددەسىنە قىزمەت ەتكەنىن جاسىرماي ايتقان بولاتىن.

«سەيىتقازى ماتاەۆ ءۇش جىل بويى «قازاقتەلەكومعا» ادەيى كوتەرىلگەن باعا بويىنشا ەسەپ-شوتتار مەن اتقارىلعان جۇمىستار تۋرالى اكتىلەردى تاپسىرىپ كەلگەن. بۇل ارەكەتىن قىلمىستىق ءىستىڭ ماتەريالدارى راستايدى. وسىلايشا س. ماتاەۆ «قازاقتەلەكوم» اق-ىن قىزمەت قۇنىنا قاتىستى شاتاستىرىپ، ماتەريالدىق شىعىنعا ۇشىراتتى. قىلمىستىق ءىستىڭ ماتەريالدارىندا دالەلدەنگەندەي، «قازاقتەلەكوم» اق-نىڭ جارنامالىق-اقپاراتتىق ماتەريالدارىن ءىس جۇزىندە كومپانيانىڭ ءوز قىزمەتكەرلەرى شىعارىپ كەلگەن. ولار باسپا باق-تارمەن وزدەرى كەلىسسوز جۇرگىزىپ، ماتەريالدار شىعارۋعا ءوتىنىش بەرگەن»،- دەلىنگەن شاعىمدا.

تەرگەۋ بارىسىندا انىقتالعانداي، سەيىتقازى ماتاەۆ ءوزىنىڭ بەدەلىن پايدالانا وتىرىپ، باتىر ماحانبەتاجيەۆكە كومپانيانىڭ قىزمەتىن جارنامالاۋعا قاتىستى تەندەردى ۇتىپ الۋعا كومەكتەسۋدى وتىنەدى. اتاپ ايتارلىعى، س. ماتاەۆ جارنامالىق ماتەريالداردى باق-تارعا ورنالاستىرۋدا گازەتتەر مەن كومپانيانىڭ اراسىنداعى دەلدال رەتىندە ارەكەت ەتكەن. ال باتىر ماحانبەتاجيەۆ مەملەكەتتىك ساتىپ الۋ ەرەجەلەرى بويىنشا قوسالقى مەردىگەرلىككە بەرۋدى ىقشامداۋ قاجەتتىگىن الدىن الا بىلسە دە، سەيىتقازى ماتاەۆتىڭ ۇسىنىسىمەن كەلىسەدى. ءسويتىپ ول ءوز قىزمەتكەرلەرىنە تەندەرلىك قۇجاتتاردى بەلگىلەنگەن تارتىپكە سايكەس دايىنداۋعا س. ماتاەۆقا قول ۇشىن سوزۋعا تاپسىرما بەرەدى.

سوتقا دەيىنگى تەرگەۋدەن ءمالىم بولعانىنداي، سەيىتقازى جانە اسەت ماتاەۆتارعا «الداۋ مەن سەنىمدى تەرىس ماقساتقا پايدالانۋ جولىمەن بيۋدجەتتىڭ 300 ملن. تەڭگەسىن ۇرلادى»، سونداي-اق «200 ملن. تەڭگەدەن استام سومانىڭ سالىعىن تولەمەگەن» دەگەن ايىپتار تاعىلىپ وتىر.

ءامىرلان ءالىمجان

Abai.kz