بۇگىن  قر ينۆەستيتسيا جانە دامۋ مينيسترلىگى جانىنداعى اەروعارىش كوميتەتىنىڭ توراعالىعىنا – ەركىن شايماعامبەتوۆ تاعايىندالدى. مينيستر جەڭىس قاسىمبەك ءوزىنىڭ «فەيسبۋك» جەلىسىندەگى جەكە پاراقشاسىندا جازدى.

«بۇگىن قر ينۆەستيتسيا جانە دامۋ مينيسترلىگى جانىنداعى اەروعارىش كوميتەتىنىڭ توراعالىعىنا ەركىن مۇستافاۇلى شايماعامبەتوۆ تاعايىندالدى. ەركىن مۇستافاۇلى بۇعان دەيىن اەروعاشىر كوميتەتى توراعاسىنىڭ ورىنباسارى بولىپ قىزمەت ەتكەن بولاتىن»،-دەيدى ينۆەستيتسيا جانە دامۋ ءمينيسترى جەڭىس قاسىمبەك.

ەركىن شايماعامبەتوۆ 1974 جىلى دۇنيەگە كەلگەن. 1998 جىلى ماسكەۋدەگى مەملەكەتتىك اۆياتسيا ينستيتۋتىن تامامداعان.

ول ءوزىنىڭ عارىش سالاسىنداعى قىزمەتىن1995 جىلى اۆياتسيا ينستيتۋتىنىڭ بايقوڭىر قالاسىنداعى «شىعىس» فيليالىندا اعا لابورانت، 2-دارەجەلى ينجينەر ماماندىعىنان باستادى. 1998-1999 جىلدارى قر ەنەرگەتيكا، يندۋستريا جانە ساۋدا مينيسترلىگىنىڭ جانىنداعى اەروعارىش كوميتەتىنىڭ باس مامانى بولىپ تاعايىندالعان. 2005-2006 جىلدارى «بايقوڭىر» عارىش ايلاعىنىڭ باسقارما باسشىسى، 2006-2007 قر ءبىلىم جانە عىلىم مينيسترلىگى جانىنداعى اەروعارىش كوميتەتى توراعاسىنىڭ ورىنباسارى بولدى. ال 2007-2014 جىلدار ارالىعىندا قر ۇلتتىق عارىش اگەنتتىگى توراعاسىنىڭ ورىنباسارى قىزمەتىن اتقاردى.

ايتا كەتەيىك، وسىعان دەيىن «قازعارىشتى» عارىشكەر تالعات مۇساباەۆ باسقارىپ كەلگەن. اتالعان اگەنتتىك قۇرىلعان 2007 جىلدان بەرى 9 جىل ىشىندە توراعالىق قىزمەتتە بولعان تالعات امانكەلدىۇلى مەملەكەت باسشىسى نۇرسۇلتان نازارباەۆتىڭ جارلىعىمەن قر پرەزيدەنتىنىڭ كەڭەسشىسى بولىپ تاعايىندالدى.

ازىرگە جەتى قات كوككە كوتەرىلگەن ءۇش قازاقتىڭ ءبىرى – تالعات امانكەلدىۇلى قازاق ءتىلدى ورتاعا «سۇيكىمسىزدەۋ» تۇلعا. اسىرەسە قازاقستاننىڭ عارىش اگەنتتىگىنىڭ تىزگىنىن ۇزدىكسىز 9 جىل ۇستاعان عارىشكەردىڭ اسكەري اتاعى – زاپاستاعى رف ااك گەنەرال-مايورى. تاعى قر اۆياتسيا گەنەرال-لەيتەنانتى (2007 جىلدان). قر «حالىق قاھارمانى». باتىر دەگەن اتاقتى كەز كەلگەن ادامعا تاڭا سالمايتىنىن ەسكەرسەك، اشىق عارىشقا قايتا-قايتا جۇرەگى داۋالاپ، ۇزاق مەرزىمگە شىققان تالعات مۇساباەۆتىڭ سوڭىنان شۇبىرعان ءسوز ءجيى ەرەدى.

تالعات مۇساباەۆ – سىرت كوزگە اڭىز، وزىنە اقيقات بولىپ كورىنەتىن، عارىش الەمىندە جالپى عۇمىرىنىڭ 1 جىلعا جۋىق (342 كۇن) ۋاقىتىن وتكىزگەن. ءبىر اي ىشىندە بەس رەت (30 ساعات 8 مينۋت) اشىق عارىشتا بولعان ساپارى گيننەس رەكوردتار كىتابىنا ەنگەن.

ال تاكەڭنىڭ تىلشىلەرگە تىكسىنىپ ءجۇرۋى مەن بايقوڭىرداعى «پروتون» اپاتىنان كەيىن جاساعان ءبىرلى-جارىم سۇحباتى – ونىڭ قازاق قوعامى الدىنداعى ابىرويىنا سىن تۇسىرگەن ەدى.

بايقوڭىردان رەسەيلىكتەردىڭ كەتپەگەنىن اشىق ايتقاندا جۇرت مۇساباەۆتى اعاش اتقا تەرىس مىنگىزىپ جىبەرۋگە دە وقتالعان-تىن.

راس، لاستانعان ەكولوگيا، ۋلانعان اۋا، جارامسىز جەر، باس يزەگىش قازاقتىڭ مويىن بۇققان سورلى احۋالى، قاراۋسىز قالعان قازاقتىڭ قاسىرەت كەشكەن باياعى بەيشارا ءحالى سۇراۋسىز قالا ما دەگەن ۋايىم ءالى كۇنگە سەيىلگەن جوق. ول كەزدە مۇساباەۆ: «ول رەسەيدىڭ ىشكى شارۋاسى. زىمىران جالعا بەرىلگەن اۋماقتا قۇلادى»، — دەۋدەن ارى اسپادى. ءتىپتى، سۇحبات سۇراعان تىلشىلەردىڭ وزدەرىن تىلدەپ، بىردەڭەگە بۇلقىندى، ايتەۋىر.

ودان كەيىن رەسەيدىڭ "يزۆەستيا" باسىلىمىنا سۇحبات بەرىپ، بايقوڭىردان رەسەيدىڭ كەتپەگەنىن قالايتىنىن ايتتى.

سول سۇحباتتىڭ بارىسىندا قازاق جەرىنە قايتا-قايتا قۇلاعان رەسەيلىك "پروتون" زىمىران تاسىعىشى تۋرالى دا ويىن ءبىلدىردى.
«پروتون» تۋرالى سۇراق قازىر قوعامدا قىزۋ تالقىلانۋدا. بىزدە ءتىپتى انتيگەپتلدىك ۇيىمدار پايدا بولدى. قازاقستانداعى رەسەي ەلشىلىگىنىڭ الدىندا ادامداردىڭ قارسىلىق كورسەتكەنىن قاشان كورىپ ەدىڭىز؟ ءبىز رەسەيدىڭ جاقىن ارادا پروتوننان باس تارتا المايتىنىن تۇسىنەمىز. ۇشىرا بەرسىن! بىراق قۇلاماسىنشى!", - دەدى تالعات مۇساباەۆ.

تاكەڭنىڭ ءدال وسى اۋانداعى  سۇحباتتارى از ەمەس. نە دەسەك تە، ەندى تالعات امانكەلدىۇلى پرەزيدەنتتىڭ كەڭەسشىسى بولدى.

نۇرگەلدى ابدىعانيۇلى

 Abai.kz