نەگىزى بار عوي، يمپەرياليست بولعان دۇرىس پا دەگەن ويعا كەلدىم. جاقسى عوي، وزگەنىڭ جەرىن باسىپ الاسىڭ، بايلىعىن پايدالاناسىڭ، حالقىن بۇراتاناعا اينالدىراسىڭ، دىنىڭە كىرگىزەسىڭ، تىلىڭدە سويلەتەسىڭ.

ءومىر بويى سەنىڭ الدىڭدا تومەنشىكتەپ تۇرادى. ۇلى حالىق اتاناسىڭ. ءتىلىم جويىلىپ كەتەدى-اۋ دەگەن ماسەلە تۋمايدى. 50*50 باعدارلاماسىن قابىلداپ اۋرە بولمايسىڭ. "ۇرانداردى باسقا تىلدە جازىپ قويىڭدار، ۇيات بولادى" دەپ پارمەن بەرمەيسىڭ. بۇراتاناعا دا اماندىق كەرەك، "ويباي، اسكەرىڭدە تەرريتوريامدا ۇستاپ وتىر. ايتپەسە، باسقا ءبىر يمپەرياليست باسىپ الۋى مۇمكىن" دەپ جات تا كەلىپ جالىنادى. راحات قوي،ءا؟

ازىلدەپ وتىرعان جوقپىن. جەر شارىن اينالدىرىپ قاراڭىزشى، ءبىر كەزدەگى يمپەرياليستەر - اعىلشىندار، نەمەسە فرانتسۋزداردا ءتىل ماسەلەسى دەيتىن قيىندىق بار ما؟ لاتىن امەريكاسى پورتۋگال جانە يسپان تىلدەرىنىڭ وتانىنا اينالىپ كەلەدى. اعىلشىن جانە فرانتسۋز ءتىلدى ەلدەردىڭ وزىندىك ۇيىمدارى بار. ول ازداي، ەندى گەوساياساتتا "ورىس ءتىلدى جۇرتشىلىق" دەگەن ۇعىم پايدا بولدى. كورشىڭنىڭ ىشكى ىسىنە ارالاسقىڭ كەلسە، "ورىس ءتىلدى جۇرتشىلىقتىڭ" مۇددەسىن قورعاۋشى بولىپ شىعا كەلەسىڭ. ءبىتتى. ەشقانداي لوگيكا، ەشقانداي ادىلەتتىلىك جوق. تەك مۇددە. يمپەرياليستىك مۇددە.

الەمدىك ساياسات نە بولىپ بارادى ءوزى؟ ءتىل - ساياساتتىڭ قۇرالىنا اينالدى. ءتىل ساياساتى ساياسي شوقپارعا اينالىپ كەلەدى. ال، ءبىز، ەلىمىزدەگى باسقا ۇلت وكىلدەرىن قازاققا اينالدىرۋعا جۇرەكسىنەمىز. مەنسىنبەيمىز - وزىمىزشە. ولار قازاق بولا المايدى، ءبىزدىڭ قانىمىز تازا. ولار رۋعا سىيماعان سوڭ قالاي قازاق بولادى دەپ شالقايامىز. ەرتەڭ ولار باسقا بىرەۋدىڭ ساياسي قولشوقپارىنا اينالىپ شىعا كەلەتىنىن ويلانىپ تا جۇرگەن جوقپىز. قازاققا ءبىر ۇلت ەمەس، رۋ-رۋ بولىپ ايتىسىپ جۇرگەن قولايلى. ناعاشى، جيەن بولىپ ءسوز قاعىسىپ جۇرسەك - جەتەدى.

باياعىدا ءجۇز-ءجۇز بولىپ ءجۇرىپ، رەسەيدىڭ قولاستىنا قالاي ءوتىپ كەتكەنىمىزدى بىلمەي قالىپ ەدىك. رۋدى ايتىپ وتىرعانىم، ءبىز ءالى دە بولسا بىرۇلتتىق پسيحولوگياعا جەتە الماي وتىرمىز. جۇمىلعان جۇدىرىقتاي ۇلت قانا يمپەرياليست بولا الادى. وزگەنى باسىپ الىپ قارق قىلماساڭ دا ەل مەن جەردى ساقتاۋ ءۇشىن يمپەريالىق پسيحولوگيانىڭ بولعانى ابزال.

سەرىك جانبولات

Facebook-تەگى پاراقشاسىنان