بۇل تۋرالى ايماقتىق كوممۋنيكاتسيالار قىزمەتىندە وتكەن بريفينگتە وبلىستىق مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى قۇتتىبەك جاماشەۆ مالىمدەدى.

ونىڭ ايتۋىنشا، جىل باسىنان بەرى باسقارما تاراپىنان 1034 نىساننىڭ قۇرىلىس-مونتاج جۇمىستارىنا باقىلاۋ جۇرگىزىلگەن. ال ونىڭ ىشىندە بيۋدجەت قاراجاتى ەسەبىنەن قۇرىلىسى ءجۇرىپ جاتقان 493 نىسان.   

«باسقارمانىڭ قۇرىلىس  ينسپەكتورلارى وبلىستىڭ اۋدان، قالالارىندا سالىنىپ جاتقان قۇرىلىس نىساندارىنا 1453 رەت تەكسەرۋ جۇمىستارىن جۇرگىزىپ، انىقتالعان كەمشىلىكتەر بويىنشا 587 نۇسقاما بەرىلدى، كەمشىلىكتەرى تۇزەتىلدى.  سونىمەن قاتار، اكىمشىلىك قۇقىق بۇزۋشىلىق جونىندە 329 حاتتاما تولتىرىلىپ، 242 قاۋلىمەن 58,5 ملن. تەڭگە اكىمشىلىك ايىپپۇل سالىندى. ال زاڭ تالاپتارىن بۇزا وتىرىپ سالىنعان نىساندار بويىنشا سوتتىڭ قاراۋىنا 120 نىسان جىبەرىلىپ، سوت شەشىمىمەن 6,4 ملن. تەڭگە ايىپپۇل سالىندى»-, دەدى باسقارما باسشىسى.

ءباسپاسوز ءماسليحاتىندا ءمالىم بولعانداي وسى جىلى زاڭسىز جانە زاڭ تالاپتارىن بۇزا وتىرىپ سالىنعان قۇرىلىس نىساندارىنا تەكسەرۋ جۇرگىزىلىپ، ناتيجەسىندە 106 نىسان سوتقا جولداندى. بۇگىنگى كۇنى 32 نىساندى بۇزۋعا، 22 نىسانعا ايىپپۇل سالۋعا  سوت شەشىمى شىقتى.

باسقارمانىڭ مىندەتىنە كىرەتىن قىزمەتتەردىڭ ءبىرى ول ليتسەنزيالاۋ. بۇل باعىتتا باسقارماعا 365 ازاماتتان ليتسەنزيا الۋعا جانە قايتا راسىمدەۋ بويىنشا وتىنىشتەر كەلىپ تۇسكەن.

Abai.kz