ادىلەت مينيسترلىگى قىلمىستىق جازانى ىسكە اسىرۋ باسقارماسىنداعى دەرەك كوزىنىڭ ايتۋىنشا، سوتتالعاندار راقىمشىلىق تۋرالى زاڭ بويىنشا بوساتىلعان.

"كەشە نۇرەكتەگى كولونيادان 130 ايەل بوساتىلدى. بۇگىن ياۆانداعى تۇرمەدەن 400-دەن استام ادام بوستاندىققا جىبەرىلدى. سونىمەن بىرگە كامەلەت جاسىنا تولماعاندارعا ارنالعان كولونيادان جازاسىن وتەۋشىلەر بوساتىلدى" دەيدى دەرەك كوزى.

تاجىكستان تاۋەلسىزدىگىنىڭ 25 جىلدىعى قارساڭىندا پرەزيدەنت ەمومالي راحمون راقىمشىلىق تۋرالى زاڭ جوباسىن ۇسىنىپ، وتكەن اپتادا دەپۋتاتتار ونى قابىلداعان بولاتىن. بۇل زاڭ بويىنشا، 12 مىڭ ادامنىڭ جازاسى جەڭىلدەتىلىپ، جازاسىن وتەۋشى 3 مىڭ ادام بوستاندىققا شىعارىلماق.

24 تامىز كۇنى دەپۋتاتتاردى زاڭ جوباسىمەن تانىستىرعان تاجىكستاننىڭ باس پروكۋرورى يۋسۋف راحمون «كونستيتۋتسيالىق جۇيە مەن مەملەكەت قاۋىپسىزدىگىنە قارسى قىلمىس جاساعاندار مەن كىسى ولتىرگەندەرگە» نەمەسە تەرروريزم مەن ەكسترەميزم بويىنشا جازالانعاندارعا راقىمشىلىق جاسالمايتىنىن» ايتقان بولاتىن.

باس پروكۋرور سونىمەن بىرگە «راقىمشىلىق تۋرالى» زاڭ اۋىر قىلمىس جاساماعان، شەتەلدە تۇرىپ جاتقان ىزدەۋدەگى قىلمىسكەرلەرگە بايلانىستى دا قولدانىلاتىنىن مالىمدەدى.