بۇگىن ءوڭىر باسشىسى ب.اتامقۇلوۆ ريو وليمپياداسىنىڭ جەڭىمپازدارى – كۇمىس جانە قولا مەدال يەگەرلەرى جازيرا جاپپارقۇل مەن وتگونتسەتسەگ گالبادراحتى قابىلداپ، سپورتشىلاردى ماراپاتتادى. وبلىس اكىمى حالىقارالىق باسەكەدە ەلىمىزدىڭ نامىسىن قورعاپ، كوك تۋىمىزدى جەلبىرەتكەن سپورتشى قىزدارعا «نۇرسات» شاعىن اۋدانىنان ەكى جانە ءبىر بولمەلى پاتەرلەردىڭ كىلتىن تابىستاپ، كاسىپكەرلەردىڭ اتىنان «Toyota Land Cruiser 200» جانە «Toyota Land Cruiser Prado» دجيپ اۆتوكولىكتەرىن مىنگىزدى.

«سىزدەر ريو وليمپياداسىندا ونەر كورسەتىپ جۇرگەندە بارشا جەرلەستەرىمىز وزدەرىڭىز ءۇشىن جانكۇيەرلىك تانىتىپ، كۇنى-ءتۇنى تىلەۋلەس بولدى. سوندىقتان بۇل سىي-سياپاتتى بۇكىل وڭتۇستىك جۇرتشىلىعىنىڭ اتىنان بەرىلگەن العىس دەپ بىلىڭىزدەر»، - دەدى ب.اتامقۇلوۆ.

ءوز كەزەگىندە، سپورتشى قىزدار – جازيرا مەن وتگونتسەتسەگ سالانى دامىتۋداعى قولداۋلارى ءۇشىن وبلىس اكىمىنە العىسىن ءبىلدىرىپ، 2020 جىلى توكيودا وتەتىن حالىقارالىق وليمپيادادا ەل ءۇمىتىن اقتاپ، بارىن سالاتىندىقتارىن جەتكىزدى.

سپورتشىلارمەن بولعان كەزدەسۋدە ايماق باسشىسى سوڭعى جىلدارى وڭىرىمىزدە اۋىر اتلەتيكا مەن كۇرەسكە ايرىقشا كوڭىل ءبولىنىپ، اتالعان سپورت تۇرلەرىمەن جاستاردىڭ كوپتەپ اينالىسىپ جاتقانىن جەتكىزدى. سالاۋاتتى ءومىر سالتىن ۇستانۋعا ەلباسىنىڭ دا جەتە ءمان بەرىپ، كوڭىل ءبولۋىنىڭ ارقاسىندا ءار اۋىلدان سپورت كەشەنىن اشۋ جۇمىستارىنىڭ ءجۇرىپ جاتقانىن ايتقان وبلىس اكىمى حالقىمىزدى بۇقارالىق سپورت تۇرلەرىنە جيىرەك تارتۋ باستى ماقسات ەكەنىن العا تارتتى.

Abai.kz