قاراعاندى وبلىسىنىڭ اكىمدىگى قازاق تىلىنە قىرىن قاراي ما؟
قاراعاندى وبلىسىنىڭ اكىمى
نۇرمۇحامبەت ابدىبەكوۆ مىرزانىڭ نازارىنا!
قۇرمەتتى نۇرمۇحامبەت قاناپياۇلى!
مەملەكەتتىك ورگانداردىڭ رەسمي ينتەرنەت-رەسۋرستارىنداعى قازاق ءتىلىنىڭ قولدانىس دەڭگەيىنە مونيتورينگ جاساۋ بارىسىندا قاراعاندى وبلىستىق ىشكى ساياسات باسقارماسى تۇتىنۋشىلاردىڭ قۇقىقتارىن اياققا باسىپ وتىرعانى انىقتالدى. باسقارما سايتىنىڭ قازاق ءتىلدى پاراقشاسىندا تەك جاڭالىقتار عانا قازاق تىلىندە بەرىلگەن. قالعان اقپارات تۇگەلدەي ورىسشا. ءتىپتى، باسقارما ءوز اتاۋىن رەسمي تىلدەن اۋدارىپ، قازاقشا بەرۋدى قاجەت دەپ تاپپاعان. ال، ورىس تىلىندەگى پاراقشادا "ينفورماتسيا وب ۋپراۆلەني", "ديالوگوۆىە پلوششادكي", "زاكونوداتەلنو-نورماتيۆنايا بازا", "گوسۋدارستۆەننىە زاكۋپكي" جانە "پروتيۆودەيستۆيە كوررۋپتسي" جانە تاعى باسقا بولىمدەر بويىنشا قاجەتتى اقپاراتتىڭ ءبارى بار. سونداي-اق، وسى قازاقتىلدى پاراقشاداعى سىلتەمەلەر، تاقىرىپ اتاۋلارى دا ورىس تىلىندە جازىلعان.
ءتىل دەگەنىمىز ۇلتتىق تەرريتوريا، گيمن، ەلتاڭبا ىسپەتتى قاسيەتتى قۇندىلىقتاردىڭ بىرى. ەندەشە، وبلىستىق اكىمدىك، ونىڭ ىشىندە ىشكى ساياسات باسقارماسى سياقتى ماڭىزدى مەملەكەتتىك ورگاننىڭ مەملەكەتتىك ءتىلدى اياققا تاپتاۋىن قالاي تۇسىنۋگە بولادى؟
قازىر حالىق وزىنە قاجەتتى اقپاراتتى نەگىزىنەن ينتەرنەت ارقىلى الادى. سوعان سايكەس قازاقتىلدى ينتەرنەت-رەسۋرستار تۇتىنۋشىلاردىڭ سۇرانىسىنا ساي قىزمەت كورسەتۋى ءتيىس. وسى رەتتە مەملەكەتتىك ورگاندار ۇلگى كورسەتۋدىڭ ورنىنا وسىنداي ورەسكەل كەمشىلىكتەرمەن كوزگە تۇسەدى.
قۇرمەتتى اكىم مىرزا!
وبلىستىق اكىمدىكتىڭ ەلەكتروندى پوشتاسىنا اكىمدىك سايتىنداعى قازاق تىلىنە قاتىستى كەمشىلىكتەردى كورسەتىپ، 40-قا جۋىق ەسكەرتۋ-حات جازعان ەدىك. الايدا، وسى حاتتاردىڭ بىرەۋى دە اشىلىپ، قارالماي وتىر. قازىرگى زاماناۋي ينتەرنەت-تەحنولوگيالار داۋىرىندە مەملەكەتتىك ورگاندار دا ەلەكتروندى قىزمەت تۇرلەرىن كەڭەيتكەنى بەلگىلى. ال، وبلىستىق اكىمدىكتىڭ ءتيىستى قىزمەتكەرلەرى ءوز پوشتالارىنا كەلىپ تۇسكەن حاتتاردى نەلىكتەن اشىپ قارامايدى؟
وسىعان وراي، سىزدەن قر-نىڭ "تىلدەر تۋرالى" جانە "تۇتىنۋشىلاردىڭ قۇقىقتارىن قورعاۋ تۋرالى" زاڭدارىنا سايكەس، اتالعان كەمشىلىكتەردىڭ جوندەلۋىنە ىقپال ەتۋىڭىزدى سۇرايمىز.
دينا يمامباي،
«Til-audit.kz» سايتىنىڭ رەداكتورى
Abai.kz
