قازاقستان ۇكىمەتىنىڭ ەڭ «تاجىربيەلى» تىزگىنشىسى كارىم قاجىمقانۇلىنىڭ الەۋمەتتىك جەلىلەرگە تىركەلىپ، ءوزىنىڭ كۇندەلىكتى ومىرىنەن ەسەپ بەرىپ جۇرگەنى بەلگىلى. مىنە، جاقىندا «تۆيتتەردەگى» پاراقشاسىندا پرەمەر-مينيستر  رەسەي پرەمەرى دميتري مەدۆەدەۆپەن كەزدەسەتىنىن ايتتى. قر ۇكىمەت باسشىسى ءدال وسى كەزدەسۋدە كەنەسارى حان مەن كەيكى باتىردىڭ باس سۇيەكتەرىن قايتارۋ ماسەلەسىن دە ءسوز ەتپەك كورىنەدى. 

«د.ا.مەدۆەدەۆپەن كەزدەسۋدە كەنەسارى حان مەن كەيكى باتىردىڭ باستارىن قايتارۋ ماسەلەسىن كوتەرۋدى جوسپارلاپ وتىرمىن»،-دەپ جازادى ول.

رەسەيدىڭ سانك-پەتەربور مۇراجايىندا ساقتاۋلى تۇرعان كەيكى باتىر مەن قازاقتىڭ سوڭعى حانى كەنەسارىنىڭ باسىن تۋعان ەلگە قايتارۋ ماسەلەسى تاريحشىلار اراسىندا سان مارتە كوتەرىلگەنىمەن، جوعارعى لاۋازىمدى شەنەۋنىكتەر جاعىنان پارمەندى قيمىل بايقالماعان ەدى.

قر پارلامەنتىنىڭ سەناتورى سەرىك اقىلباي عانا ءبىر رەت دەپۋتاتتىق ساۋال جولداعانى بولماسا، باسقالارى بىلق ەتپەگەن.

بيىل ۇلت-ازاتتىق كوتەرىلىسكە – 100 جىل تولادى. وسى رەتتە، كەنەسارى حان مەن كەيكى باتىردىڭ باس سۇيەگىن ەلگە قايتارىپ، تۋعان جەرىنە جەرلەۋ ماسەلەسىن ۇكىمەت شىنداپ قولعا السا يگى ەدى-اۋ...

بۇعان دەيىن اتالعان ماسەلەگە ەل ۇكىمەتى ءجۇردىم-باردىم قاراپ كەلگەن بولاتىن. ەندى، مىنە، ۇكىمەت باسشىسى كارىم ءماسىموۆتىڭ ءوزى ايتقانداي، ناقتى ءىس-شارالاردى جاساي ما؟ الدە بۇل جولى دا «جوسپار» كۇيىندە قالا ما؟ راس، پرەمەر مىرزانى ەشكىم ماجبۇرلەپ، اۋزىنا ءسوز ساپ بەرگەن جوق. ءوزى ايتتى، ءوزى جازدى. ەندى ءبىز پرەمەر-ءمينيستردىڭ رف ساپارىنان سوڭ، ءدال وسى ماسەلە توڭىرەگىندە كەڭىنەن اڭگىمە وربىتەتىن بولامىز.

بابامىزدىڭ باسىن قايتارۋ ءۇشىن ءبىزدىڭ پرەمەر نە ىستەي الار ەكەن؟

نۇرگەلدى ابدىعانيۇلى

Abai.kz