وڭتۇستىك قازاقستاندا «جانۇيا» بەينەفيلمى تۇسىرىلۋدە.تولىق مەتراجدى درامالىق شىعارما وبلىستىق جاستار ساياساتى ماسەلەلەرى جونىندەگى باسقارماسىنىڭ «جاستار رەسۋرستىق ورتالىعى» كوممۋنالدىق مەملەكەتتىك مەكەمەسىنىڭ تاپسىرىسىمەن «وڭتۇستىك جاستارى» جوباسى اياسىندا جاسالىپ وتىر. بۇل تۋرالى وقو اكىمىنىڭ ءباسپاسوز قىزمەتى حابارلايدى.

وتباسىلىق قۇندىلىقتاردى قۇرمەتتەۋ، اتا-انا مەن بالانىڭ قارىم-قاتىناسىن دۇرىس جولعا سالۋ، قازىرگى قوعامدا ورىن العان وتباسىلىق كەلەڭسىزدىكتەردى سۋرەتتەپ، وعان جول بەرمەۋدى كوزدەيتىن تۋىندىدا، كەرىسىنشە ۇلكەنگە قۇرمەت، كىشىگە ىزەت كورسەتۋ، جالپى تاربيەلىك ۇعىمدار ناسيحاتتالماق. 

بەينەتۋىندىنىڭ رەجيسسەرى كوپشىلىككە تانىمال سەرىك تالاسوۆ. جالپى ءتۇسىرىلىم شىمكەنت قالاسىندا وتۋدە.

بەينەفيلمنىڭ باستى رولدەرىن قازاق كينوسىنىڭ تانىمال اكتەرلارى ەرجان جارىلقاسىن (ەلباسى جايىندا «مەنىڭ بالالىق شاعىمنىڭ اسپانى» ك/ف-گى ءابىش اكەيدىڭ جاس كەزى، «استاناعا كوكتەم كەش كەلەدى» ك/ف، ت.ب), ج.شانين اتىنداعى وبلىستىق اكادەميالىق دراما تەاترىنىڭ اكتريساسى اقمارال ماحانوۆا، «شانشار» ءازىل-وسپاق تەاترىنىڭ ءارتىسى عالىمجان قالىباەۆ، جاستار اراسىندا تانىمال بولىپ ۇلگەرگەن وڭتۇستىكتىڭ تۋماسى اكتەر ولجاس بەكباۋوۆ سومدايتىن بولادى. سونىمەن قاتار، ءفيلمنىڭ كەيبىر تۇسىرىلىمدەرىنە تامىز ايىنىڭ باسىندا كاستينگكە قاتىسىپ، اكتەرلىك قابىلەتىن كورسەتە بىلگەن بىرقاتار ازاماتتار قاتىسپاق.

Abai.kz