بۇگىنگىدەي اقپارات اعىنى جويقىن، الاعاي دا بۇلاعاي كەزەڭدە عالامتورداعى  قازاق ءتىلدى سايتتاردىڭ قاتارى كۇن ساناپ تولىعىپ كەلەدى. سولاردىڭ ءبىرى جاقىندا عانا اشىلعان – قازاق جانە ورىس تىلدەرىندەگى ونوماستيكالىق ەلەكتروندىق بازا – "Atau.kz" تورابى، - دەپ حابارلايدى اباي-اقپارات.

ونوماستيكالىق اتاۋلار جۇيەسىن قوعام قالىپتاستىراتىنى بەلگىلى. ەلدى مەكەن، جەر-سۋ، كوشە اتتارىن زامان تالابىنا ساي وزگەرتۋ جونىندەگى جۇرتشىلىقتىڭ ۇسىنىس-پىكىرلەرى ۋاقىت تالابى ەكەنىن ەسكەرەتىن مەزگىل الدەقاشان جەتكەن. 

وسى تۇرعىدان قاراستىرعاندا ەلىمىزدىڭ اقپاراتتىق كەڭىستىگى مەملەكەتتىك ءتىلدىڭ، ونىڭ تۇيتكىلدى پروبلەمالارىن تولىق قامتيتىن جاڭا ەلەكتروندىق بازامەن تولىقتى.

اتالعان پورتال قازاقستان رەسپۋبليكاسى پرەزيدەنتىنىڭ تىكەلەي پارمەنىمەن، قر مادەنيەت جانە سپورت مينيسترلىگى، تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرماسى بويىنشا قۇرىلعان.

وزگە سايتتاردان وزگەشەلىگى «Atau.kz» پورتالى تەك ونوماستيكالىق بازامەن عانا ەمەس، سونداي-اق، ونوماستيكا سالاسىنا قاتىستى مول عىلىمي مۇراعاتپەن دە تولىقتىرىلعان. اتالعان سالاعاعا بايلانىستى سايتتىڭ – «عىلىمي تاجىربيەلىك نەگىزدەرى» دەپ اتالاتىن ايدارىندا عىلىمي ەڭبەكتەر توپتاماسى ەنگىزىلگەن. سونىمەن قاتار، سايتتىڭ ءدال وسى ايدارىندا ەلىمىزدەگى ونوماستيكا ماسەلەلەرىنە قاتىستى عىلىمي-زەرتتەۋ ماقالالارى توپتاستىرىلعان.

ۇلتتىق ونوماستيكا – مەملەكەتتىڭ مادەني-رۋحاني تانىمىنان باستاپ، شەكاراسىنىڭ تۇتاستىعىنا دەيىنگى اۋقىمداعى ءارتاراپتى وراسان زور ماسەلەلەردى قامتيدى. ونوماستيكالىق ەلەكتروندىق قوردى اشۋدىڭ نەگىزگى ماقساتى – ەلىمىزدىڭ وڭىرلەرىندەگى كوشە، ەلدىمەكەن، مەكەمەلەر مەن ءتۇرلى نىساندارعا بەرىلگەن اتاۋلاردى جيناقتاۋ ارقىلى قازاق ونوماستيكاسىنىڭ ءبىرتۇتاس جۇيەسىن جاساۋ. بۇل ەلەكتروندى قور ونوماستيكا سالاسىنداعى قوردالانعان ماسەلەلەردى شەشۋدىڭ ءبىر تەتىگى بولادى.

سايتتىڭ سىلتەمەسى: Atau.kz

Abai.kz