تولەبيلىك جاستار اۋدانداعى جاعدايى تومەن وتباسىلارعا كومەك بەرۋدە. بۇل تۋرالى «Abai.kz» پورتالى وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

تولەبي اۋدانىنىڭ جاستارى يگى ءىستى قولعا الدى. ونداعى «جاستار ورتالىعىنىڭ» ماماندارى باس بولىپ، «مەيىرىمدى جۇرەكپەن» قايىرىمدىلىق اكتسياسىن ۇيىمداستىرىپ، اۋدانداعى از قامتاماسىز ەتىلگەن بىرقاتار وتباسىلارعا جاردەم بەرۋدە. 

كۇندەلىكتى ازىق-تۇلىكپەن قامتاماسىز ەتىلىپ وتىرعان 10 وتباسىعا جەرگىلىكتى قايىرىمدى كاسىپكەرلەر دەمەۋشىلىك تانىتىپ جاتىر. ماسەلەن، تولەبيلىك بيزنەسمەن ە.جاباەۆ اكتسيا شەڭبەرىندە ازىق-تۇلىكپەنقامتۋدى موينىنا السا، م.قويباعاروۆ ءوز دۇكەنىنەن ارنايى ورىن دايىنداپ، كۇندەلىكتى ىستىق نان تاراتۋدى مىندەتىنە ساناپ وتىر. كاسىپكەرلەر بۇل قايىرىمدىلىق ىستەرىن جىل سوڭىنا دەيىن جالعاستىرماق. 

اۋدان جاستارى يگىلىكتى ءىستىڭ جالعاسىن تاباتىنىنا سەنىمدى. ەندىگى كەزەكتە ولار كاسىپكەرلەردىڭ كومەگىمەن جاعدايى تومەن وتباسىلاردى كيىم-كەشەكپەن قامتۋدىڭ جولىن قاراستىرىپ ءجۇر. قىركۇيەك ايىنىڭ سوڭىنا دەيىن جالعاساتىن «مەيىرىمدى جۇرەكپەن» اكتسياسىنا وزگەگە قۋانىش سىيلاپ، از دا بولسا كومەك قولىن سوزعىسى كەلەتىن كەز كەلگەن اتىمتاي جومارت قاتىسا الادى.

دەرەككوزى: وقو اكىمىنىڭ ءباسپاسوز قىزمەتى

اباي اقپارات