قوستاناي وبلىسىندا قولىنان ايىرىلسا دا، دومبىراسىن تاستاماعان داۋلەسكەر كۇيشى تۇرادى. ول – امانگەلدى اۋدانى، قاراسۋ اۋىلىنىڭ تۇرعىنى ايتباي مۇزداحانوۆ. وندىرىستىك جاراقات الىپ، وڭ قولى شىنتاعىنان كەسىلگەن دارىندى ازامات تاۋقىمەت كوردىم دەپ جاسىعان ەمەس. كەرىسىنشە، شابىتىن شىڭداي ءتۇستى،-دەپ جازدى stan.kz.

ايتباي مۇزداحانوۆتىڭ شاڭىراعى مەيماننان بوساعان ەمەس. ءبارى دە داۋلەسكەر كۇيشىنىڭ دومبىراسىنىڭ ءۇنىن تىڭداپ، ونەگەلى ءسوزىن ەستۋگە قۇمار. تاعدىر ونىڭ قولىن كەسكەنمەن، ونەردەگى جولىن كەسە العان جوق. 1977 جىلى 36 جاسىندا وندىرىستىك جاراقات العان كۇيشى اراعا 9 جىل سالىپ، ساۋساق ورنىنا سىم جالعاپ، شىعارماشىلىققا قۇلشىنا كىرىستى.

««ەلىم-اي» دەگەن كۇي، «ارۋ ارمان» دەگەن كۇي، «قاراتاۋ» دەگەن كۇي. كەشەگى جوڭعارلاردىڭ شاپقىنشىلىعىندا قاراتاۋدى مەكەندەپ، كوپ ادام امان قالعان ەكەن. «بوزتايلاق» – جەتىم قالعان بالالاردىڭ زارى تۋرالى كۇي. سول سياقتى 4-5 بەس كۇي قاتار شىقتى دا، 8 كۇيمەن «بابالار ءۇنى» دەگەن توپتاما جازدىم»،-دەيدى كۇيشى ايتباي مۇزداحانوۆ.

شالعاي اۋىلداعى ونەرپاز ەشقاشان قوعام ومىرىنەن شەت قالعان ەمەس. ەلىمىز تاۋەلسىزدىك العاندا العاشقى ءوز تۋىندىسىن تارتۋ ەتتى. سونداي شىعارمانىڭ ءبىرى – «كوكەيكەستى، ايتبايدىڭ سارىنى».

«1992 جىلى دۇنيە ءجۇزى قازاقتارىنىڭ قۇرىلتايى بولدى عوي. سوندا نۇرعيسا اعاما كەزدەسىپ قالدىم. ول كىسى: «مۇنى قوي، مۇندا سەنىڭ ءوزىڭنىڭ دە زارىڭ بار، «ايتبايدىڭ سارىنى» دەپ تارت» دەدى»،- دەيدى كۇيشى  ايتباي مۇزداحانوۆ.

بۇگىندە ايتباي مۇزداحانوۆتىڭ الپىستان استام كۇيى، قىرىققا تارتا ءانى بار. ولاردىڭ ءبارى «بابابار ءۇنى» جيناعىنا ەنگەن. تۋىندىلارى ءتۇرلى ساحنالاردا ورىندالىپ، شاكىرتتەرى بايقاۋلاردا توپ جارىپ ءجۇر. ەلجاندى ازامات تاۋەلسىزدىكتىڭ 25 جىلدىعىنا ارناپ، «ەلىم مەنىڭ» اتتى شىعارماسىن جازىپ شىقتى.

Abai.kz