مۇرات جۇرىنوۆ  - مەملەكەت جانە قوعام قايراتكەرى. ۇلتجاندى ازامات. 1970 ج – عىلىم كانديداتى، 1981 ج – عىلىم دوكتورى، 17 مونوگرافيانىڭ، 600 ماقالانىڭ، 108 ونەرتابىستىڭ اۆتورى. 

تومەننەن جوعارىعا ساتىلاپ وسكەن، ياعني ەڭبەك تابىسىنا وراي قىزمەتى جوعارىلاعان. مىسالى، 1970-1982 جىلدارى اعا وقىتۋشى، كافەدرا مەڭگەرۋشىسى، دەكان بولىپ قىزمەت ىستەدى. (قازاق حيميا تەحنولوگيا ينستيتۋتىندا) 1982-1985 جىلدار ارالىعىندا قاراعاندى مەملەكەتتىك ۋنيۆەرسيتەتىنىڭ پرورەكتورى. ال 1985-1991 جىلدار ارالىعىندا ورگانيكالىق سينتەز جانە كومىر حيمياسى ينستيتۋتىنىڭ ديرەكتورى بولىپ، 6 جىل قىزمەت ىستەدى.

بۇل جىلدار ەڭ اۋىر، ءارى ەڭ سىندارلى جىلدار بولدى. ويتكەنى 1986 جىلعى ستۋدەنت-جاستاردىڭ الماتىداعى جەلتوقسان كوتەرىلىسى بۇكىل قازاقستان جاستارىنىڭ رۋحاني جاڭعىرىعىنا ۇلاستى. تاپتاپ-جانشۋ اپپاراتى كولبيندىك، گورباچەۆتىق سولاقاي ساياساتتىڭ قانشالىقتى وزبىر ەكەندىگىن كورسەتتى. ۇلتجاندى ۇستازدار مەن ستۋدەنتتەر جوعارى وقۋ ورىندارىنان قۋىلىپ جاتتى.

بىراق توقىراۋ ەكىنشى جاعىنان ۇلتتىق نامىستى وياتتى. وسى كەزەڭدە ۇلتتىق قۇرامىندا وزگە ۇلتتارى كوپ قاراعاندى قالاسىندا قازاق ءتىلى قوعامى قۇرىلدى. ونىڭ توراعاسى بولىپ ۇلتجاندى ازامات مۇرات جۇرىنوۆ سايلاندى. وسىلاي عىلىمي-زەرتتەۋ ينستيتۋتىنىڭ ديرەكتورى، ءارى ساياسي تۇلعاعا اينالدى.

ءتورت جىل ق.ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ  رەكتورى بولىپ جۇرىنوۆ باسشىلىق ەتكەن جىلدارى اتالعان وقۋ ورنى  ەگەمەن، تاۋەلسىز مەملەكەتىمىزدىڭ جوعارى وقۋ ورىندارى اراسىنداعى ىرگەلى ءبىلىم ورداسىنا اينالدى. مۇكەڭ قاسيەتتى تۇركىستان قالاسىنىڭ قازاقتىڭ رۋحاني ءارى جاستار قالاسىنا اينالۋىنا ەرەكشە ۇلەس قوستى.

1995-1997 جىلدارى  مۇرات جۇرىنۇلى قر ءبىلىم ءمينيسترى بولىپ قىزمەت ىستەدى. بۇل ۇلتتىق كادرلاردىڭ وسكەن جىلدارى بولدى. ويتكەنى مۇرات جۇرىنۇلى ۋنيۆەرسيتەتتەر مەن ينستيتۋتتاردىڭ رەكتورلارىن تاعايىنداۋ بارىسىندا  ولاردىڭ ىسكەرلىگىمەن بىرگە ۇلتجاندىلىعىنا ەرەكشە نازار اۋداردى.

مۇرات جۇرىنوۆ - حيميا سالاسىنىڭ ىرگەلى مامانى ءارى ۇيىمداستىرۋشىسى. 2003 جىلدان بەرى قر ۇلتتىق عىلىم اكادەمياسىنىڭ پرەزيدەنتى. قوعامدىق ۇيىم نەگىزىندە جۇمىس ىستەيتىن ۇلتتىق عىلىم اكادەمياسى ءوزىنىڭ نەگىزگى ءتىنى – عىلىمي ورتالىق ەكەنىن ساقتاپ قالدى. ۇلى عالىم ك.ساتپاەۆ قۇرعان عىلىم اكادەمياسى ءارتۇرلى قۇرىلىمدىق وزگەرىستەرگە ۇشىراعانىمەن ءوزىنىڭ بيىك ستاتۋسىنا سايكەس جۇمىس ىستەپ تۇر. جىل سايىن ەلباسىعا عىلىمنىڭ جاي-كۇيى جونىندە ۇلتتىق باياندامانى قر ۇلتتىق عىلىم اكادەمياسى دايىندايدى. وندا عىلىمنىڭ جاي-كۇيى سارالانىپ، سان ءتۇرلى ۇسىنىستار بەرىلەدى. سونىڭ ناتيجەسىندە قازىر ءال-فارابي اتىنداعى قازاق ۇلتتىق ۋنيۆەرسيتەتى مەن عىلىم ورداسى اراسىندا ارنايى مەمورامدۋمعا قول قويىلىپ، ءبىلىم مەن عىلىم ينتەگراتسياسى جۇزەگە اسىرىلۋدا. وسىلاي عىلىمي قىزمەتكەرلەردىڭ ۇلەس سالماعى جاس عالىمدارمەن تولىستى. تولىسا بەرمەك، جاڭعىرا بەرمەك!

وسىنداي ىرگەلى ءىستىڭ باسىندا ءومىردىڭ وزىنەن وسكەن، عالىم، ءىرى ۇيىمداستىرۋشى مۇرات جۇرىنوۆ ءجۇر.

ۇلتتىق عىلىم اكادەمياسىنىڭ قۇرىلعانىنا 70 جىل تولىپ وتىر. قازىر وسىنداي اتاقتى اكادەميانىڭ 140 اكادەميگى مەن 110 كوررەسپوندەنت-مۇشەسى، سونداي-اق 17 شەتەلدىك جانە 78 قۇرمەتتى مۇشەسى بار. وسىنداي قۋانىشىمىزعا تاعى ءبىر قۋانىش قوسىلدى. اكادەميك، مەملەكەتتىك سىيلىقتىڭ لاۋرەاتى، ءىرى-ءىرى حالىقارالىق، رەسپۋبليكالىق ۇيىمداردىڭ مۇشەسى مۇرات جۇرىنوۆ اعامىز 75-كە كەلىپ وتىر. ءسىزدى، قۇرمەتتى، مۇرات جۇرىنۇلى، قوس مەرەكەمەن شىن جۇرەكتەن قۇتتىقتايمىن، ۇزاق عۇمىر، وتباسىڭىزعا اماندىق تىلەيمىن!

قۇرمەتپەن ءۋاليحان قاليجانوۆ، 

 م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى، قر ۇعا مۇشە-كوررەسپوندەنتى، فيلولوگيا  عىلىمدارىنىڭ دوكتورى

Abai.kz