استانا اكىمدىگى كوشەلەردىڭ اتاۋىن وزگەرتۋ جانە جەكەلەگەن كوشەلەرگە اتاۋلار بەرۋگە قاتىستى تۇسىنىكتەمە بەردى. بۇل تۋرالى qazaquni.kz پورتالىنىڭ ءتىلشىسى حابارلايدى.

«سوڭعى ەكى جىل ىشىندە 2016 جىلدىڭ شىلدەسىنە دەيىن نىساندارعا، اكىمشىلىك-اۋماقتىق بىرلىكتەرگە اتاۋ بەرۋگە جانە اتاۋلارىن وزگەرتۋگە موراتوري ەنگىزىلگەن بولاتىن. 2015 جىلدىڭ 1 قاڭتارىنان 2016 جىلدىڭ قىرقۇيەگىنە دەيىنگى كەزەڭدە استانا قالاسىنىڭ اكىمدىگىنە ەڭبەك ۇجىمدارىنان جانە شىعارماشىلىق وداقتاردان، بىرلەستىكتەردەن، ۇيىمداردان، زيالى قاۋىم جانە قوعام وكىلدەرىنەن جۇزگە جۋىق ۇسىنىس ءتۇستى»، – دەدى اكىمدىكتەگىلەر.

ءجون دەيمىز. ەلوردا كوشەلەرىنىڭ دۇرىس اتالعانى ەلگە ابىروي. دەگەنمەن، وسى ۋاقىتقا دەيىن كوشە اتاۋىنا سالعىرت قاراپ كەلگەن ءبىزدىڭ شەنەۋنىكتەر تاعى دا ءبىرتۇرلى شەشىمدەرىمەن كوزگە ءتۇستى.

ماسەلەن، جاقىندا استانادا ءاليحان بوكەيحان، بۇقار جىراۋ، سۇلتانبەك قوجانۇلى، ءازىربايجان مامبەتوۆ سەكىلدى بىرقاتار تۇلعالاردىڭ ەسىمدەرىمەن اتالعان كوشەلەر پايدا بولماق. قۋانارلىق جايت!

سونىمەن قاتار، جوبالىق ە350 اتاۋى بار كوشەگە نيكولا تەسلانىڭ ەسىمى بەرىلمەكشى ەكەن.

و زامان دا بۇل زامان، نيكولا جارىقتىقتىڭ مىناۋ ەلگە، مىنا استاناعا نە ەڭبەگى ءسىڭىپ ەدى؟ سول كوشەگە ەسىمىن بەرۋگە تۇرارلىق تاعى ءبىر قازاقتىڭ ماقتانىشى تابىلماي قالدى ما؟ الدە، جوعارىدا اتى اتالعان تۇلعالارعا كوشە بەردىك، سول دا جەتەدى دەدى مە ەكەن اكىمدىكتەگىلەر؟

وسىعان وراي قازاقتىڭ ۇلكەن عالىمى مەكەمتاس مىرزاحمەتوۆتىڭ «جەر تاريحى – ەل تاريحى» اتتى كىتابىنان ءۇزىندى كەلتىرە كەتسەك دەيمىز.

«بۇگىندە قالالارداعى كوشە اتاۋلارى الاڭداتىپ وتىر. سەبەبى، بۇگىندە ەل اۋزىندا مىسقىلمەن ايتىلىپ جۇرگەن «كوشەنىڭ اتى كوكەمە، اۋىلدىڭ اتى اتاما» دەپ ايتىلعان ءسوزدىڭ استارىندا بۇگىنگى كۇننىڭ اششى شىندىعى جاتقانىن اڭعارامىز. وبلىستىق، قالالىق، اۋداندىق ونوماستيكالىق كوميسسيالار تاراپىنان ماسەلەنىڭ توركىنىن تاني بەرمەيتىن ونوماستيكالىق ساۋاتسىزدىق بەلەڭ الىپ تۇر. بۇل كەمشىن جاعداي كوپ ۋاقىتتا جەرگىلىكتى جاعدايدىڭ كەيبىر وزىندىك ەرەكشەلىگىن، وتكەندەگى تاريحي اتالىمىن جەتە بىلمەۋدەن»، – دەيدى عالىم.

كەزىندە قازاق دالاسىندا كوشە تۇرماق، جەر-سۋ اتتارى تۇگەلدەي ورىستاندىرىلعانىن تاريحتان جاقسى بىلەمىز. ونىڭ بارلىعى قازاق حالقىن ماڭگۇرت ەتۋ ءۇشىن جاسالعانى دا ايان.

اتاپ ءوتۋ كەرەك، استانا اكىمدىگىندەگى ونوماستيكالىق كوميسسيانىڭ توراعاسى ەلوردا اكىمىنىڭ ورىنباسارى ەرمەك امانشاەۆ. ەرمەك ءامىرحانۇلى – قازاقتىڭ تالانتتى جازۋشىسى، دراماتۋرگ. ءسوز قادىرىن جەتە تۇسىنەتىن، ۇلتىن سۇيەتىن پەرزەنت قوي دەپ جۇرگەن ازاماتتىڭ مۇندايعا قالاي جول بەرگەنى تۇسىنىكسىز. جوق، الدە بۇل قالىپتى جاعداي دەپ سانايدى ما؟

ارينە، كوشە اتاۋلارى بويىنشا بارلىق جۇمىس ارنايى كوميسسيا تاراپىنان جاسالعانىمەن، قول قوياتىن اكىم. قول قوياردا «تەسلا دەگەننىڭ بىزگە نە ەڭبەگى ءسىڭدى؟» دەگەن سۇراق ءسىزدى مازالامادى ما؟ ايتپەگەندە، شەتەلدىڭ بارلىق ينجەنەر، عالىم، جازۋشى، پاتشا بىتكەندەرىنە كوشە بەرە بەرەيىك. بولاشاق ۇرپاقتىڭ قالاي ماڭگۇرت بوپ كەتكەنىن بايقاماي دا قالامىز. ءاسىلى، كوشە اتاۋلارى دەگەن وتە كۇردەلى ماسەلە. بۇعان ات ءۇستى قاراۋعا مۇلدەم بولمايدى.

قازاققا دىم پايداسى تيمەگەن ينجەنەر تەسلا بار ءومىرىن اقش-تا وتكىزىپ، سول ەلگە جۇمىس ىستەدى. قازاقستان اقش-تىڭ ءبىر شتاتى ەمەس قوي. ۇلىقتاعان ۇلىلارىمىزعا قوسىپ جىبەرگەن تەسلا دەگەن كىمىڭىز ەدى، اسەت ورەنتاەۆيچ؟!.

الدە، ءسىز باسقاشا ويلايسىز با ؟!.

Abai.kz