بەلگىلى جازۋشى، بەدەلدى باسپاگەر، قوعام قايراتكەرى مەرەكە ابدەشۇلى قۇلكەنوۆتىڭ ايتۋلى الپىس بەس جاسقا تولۋىنا بايلانىستى بىرەر ءسوز ايتپاقپىن. كەزىندە بۇل قالامگەر جايىندا ونىڭ تالتۇسىنە وراي ارنايى ماقالا جازعانىم بار، سونداعى تۇيگەندەرىمدى قايتالاماي، ءوزىمدى ريزا ەتىپ جۇرەتىن كەي ىستەرىن ەسكە الۋمەن شەكتەلۋدى ءجون كورىپ وتىرمىن.

بۇل رەتتە، ەڭ الدىمەن، ونىڭ  ازاماتتىق بەلسەندى پوزيتسياسىن اتاپ وتسەم دەيمىن. ماسەلەن، ول انا ءتىلى ماسەلەسىن سوناۋ قايتا قۇرۋ داۋىرىندە تىلدەر تۋرالى العاشقى زاڭ شىققالى بەرى تۇراقتى نازاردا ۇستاپ كەلەدى. بارشامىز بىلەتىندەي، «انا ءتىلى» گازەتىندە ىستەپ جۇرگەنىندە جۇيەلى تۇردە شۇعىلداندى. جانە سول ادەتىنەن كۇنى بۇگىنگە دەيىن جاڭىلعان ەمەس. مەملەكەتتىك ءتىلدىڭ قولدانىلۋ اياسىن كەڭەيتۋدەگى ىستەرگە، بۇقارالىق اقپارات قۇرالدارىنداعى جۋرناليستەردىڭ تىلگە جاۋاپكەرشىلىكپەن قاراي بەرمەيتىنىنە سىني تۇرعىدا قارايدى. قازىرگى بيلىكتىڭ ومىرگە ەنگىزىپ كەلە جاتقان ۇشتىلدىلىك ساياساتىنىڭ  زالالدى جاقتارى جايىندا العاشقى بەلگىلەرى بىلىنگەننەن باستاپ ۇدايى دابىل سوعا ايتىپ كەلەدى. بيىل جەر-سۋ ماسەلەسى كوتەرىلگەندە دە وتكىر پىكىرلەرىمەن كوزگە ءتۇستى، وكىمەتتىڭ جەر رەفورماسى جونىندەگى مەملەكەتتىك كوميسسياسى قۇرامىندا جەمىستى ەڭبەك ەتتى.

قالامگەر مەرەكە قۇلكەنوۆ ماڭىزدى قوعامدىق جۇمىستارعا ارالاسا ءجۇرىپ، جەكە شىعارماشىلىعىمەن شۇعىلدانۋعا دا، سونىمەن قاتار باسپاسوزگە اتسالىسۋعا، باسپا سالاسىندا ءتۇرلى جوبالار جاساپ، جۇزەگە اسىرۋعا دا ۋاقىت تابۋدا. ونىڭ باسپاگەرلىك ەلەۋلى جۇمىستارى قانشاما. ءانۇران اۆتورلارىنىڭ ءبىرى، مەملەكەتتىك سىيلىق لاۋرەاتى، كورنەكتى  اقىن جانە جازۋشى جۇمەكەن ناجىمەدەنوۆتىڭ پروزالىق شىعارمالارىن («كىشكەنتاي»، «داڭق پەن داقپىرت» روماندارىن) ارنايى جازعىزعان زەرتتەۋ ماقالالارمەن بىرگە  باسپاسىنان «جاسوسپىرىمدەر كىتاپحاناسى» سەرياسىمەن قايتا جارىققا شىعاردى. اتالعان سەريامەن سوعان دەيىن وقىرماندارعا اباي قۇ­نانباەۆ، ساكەن سەيفۋللين، ءىلياس جانسۇگىروۆ، ماعجان جۇما­باەۆ، قاسىم امانجولوۆ سەكىل­دى كوپتەگەن قازاقتىڭ اقىن-جازۋ­شىلارىنىڭ كىتاپتارىن ۇسىنعانى ءمالىم. اتقارىلعان اۋقىمدى شارۋالارى قاتارىندا عاسىردان استام ىلگەرىدە جارىق كورىپ، وقىرمان كوزىنەن تاسادا قالعان ماڭىزدى ەڭبەكتى قايتا جارىققا شىعارعانى بار. ول ورتا ازيادا اسكەري قىزمەتتە بولعان ورىس وفيتسەرىنىڭ كىتابى. بۇل ادام، اسكەري تاريحشى ميحايل تەرەنتەۆ، تۇركىستان ولكەسىنىڭ گەنەرال-گۋبەرناتورى فون-كاۋفماننىڭ تاپسىرماسىمەن پاتشالىقتىڭ ورتا ازيا اۋماعىن جاۋلاپ الۋىنىڭ تاريحىن زەرتتەپ، جەرگىلىكتى مۇراعاتتاردان  مول ماتەريال جيناعان ەكەن. سونىڭ نەگىزىندە، سول كەزگى كارتالار مەن سىزبالاردى مولىنان پايدالانا وتىرىپ، دوعارىسقا شىققاننان كەيىن «ورتا ازيانى جاۋلاپ الۋ تاريحى» («يستوريا زاۆوەۆانيا سرەدنەي ازي») اتتى ءۇش تومدىق ەڭبەك جازىپتى. ءۇش تومدىق حح عاسىردىڭ باسىندا سانكت-پەتەربۋرگتە جارىق كورىپتى. جەكەلەگەن عالىمدارعا بولماسا، قالىڭ وقىرمانعا  مۇلدەم بەيمالىم دەرلىك كىتاپتار. يمپەريانىڭ قارۋلى كۇشتەرىنىڭ ءبىزدىڭ ەلىمىز بەن بىزبەن شەكارالاس ەلدەردى قالاي جاۋلاپ العانىن بايان ەتەتىن بۇل ۇشتومدىقتىڭ زەرتتەۋشىلەرگە وتە قۇندى دەرەكتەر بەرەرى كۇمانسىز. سونداي-اق مەرەكەنىڭ قازاق پوەزياسىنىڭ ون تومدىق انتولوگياسىن گۇلسىم مۇقىشەۆامەن بىرگە جيناقتاپ، قۇراستىرعانى، ءسويتىپ، كورنەكتى اقىن تەمىرحان مەدەتبەكوۆتىڭ العىسوزىمەن باسىپ شىعارعانى بەرتىندە اتقارعان تاعى ءبىر اسا ەلەۋلى جۇمىسى بولعانىن اتاپ ايتقان ءجون. ون تومدىق انتولوگيادا تۇرك قاعاناتى زامانىنداعى كۇلتەگىننەن باستاپ، ودان بەرگى زامانداردا ءومىر سۇرگەن جىراۋلار، اقىندار، بۇگىنگى جاستار پوەزياسىنىڭ تاڭداۋلى تۋىندىلارىمەن تانىسۋعا بولادى. ءار كەزگى ءار اۆتوردىڭ ولەڭدەرى توپتاستىرىلعان بۇل جيناقتا بارلىعى 678 اقىن قامتىلعان ەكەن.

2011 جىلى، مەرەكە الپىس جاسىن اتاپ وتكەننەن كەيىن ايدان ءسال استام ۋاقىت وتكەندە، ءبىر وقىس وقيعا بولدى. ەلىمىزدىڭ ۇلى مەيرامى اتالىپ جاتقان شاقتا، جاڭاوزەن قالاسىنىڭ ورتالىق الاڭىندا ەڭبەك داۋىنا بايلانىستى ايلاپ بەيبىت ەرەۋىل جاساپ جاتقان جۇمىسشىلار مەن قۇقىق قورعاۋشىلار اراسىندا قاندى قاقتىعىس ورىن الدى. وقيعا قالادا عيماراتتارعا ءورت سالۋ، ءتۇرلى كوممەرتسيالىق نىسانداردى قاۋساتۋ سەكىلدى قيلى ارانداتۋشىلىق ارەكەتتەرگە، كەلەسى كۇنى شەتپە ستانساسىندا جولاۋشىلاردى تاسىمالدايتىن پويىزدى باسىپ الۋعا ۇلاستى. توتەنشە جاعداي جاريالاندى، اقپارات تاپشىلىعى سالدارىنان ەلىمىزدىڭ باسىم بولىگى ناقتى احۋالدان بەيحابار، جايباراقات كۇي كەشتى. زيالى اتالاتىن جۇرتتىڭ كورشىلىگى بيلىكتىڭ ارەكەتتەرىن قولدادى، نە، «تىنىش جۇرسەڭ – توق جۇرەسىڭنىڭ» كەرىمەن، بالەلى ءجايت جونىندە مۇلدەم اۋىز اشپاي، ءۇنسىز قالۋدى قوش كوردى. سوندا الماتىداعى قالام قايراتكەرلەرىنىڭ  تەك ساۋساقپەن سانارلىعى عانا ءوز كوزقاراستارىن اشىق بىلدىرگەن بولاتىن. سول ازشىلىق ىشىندە مەرەكە قۇلكەنوۆ تە بولعان ەدى.  ول قاندى وقيعاعا بايلانىستى ارنايى قۇرىلعان قوعامدىق كوميسسيا قۇرامىنا ەنىپ، ماڭعىستاۋ وبلىسىندا بىرنەشە رەت بولدى. اقتاۋعا، جاڭاوزەنگە بارىپ، جۇمىسشىلارمەن اڭگىمەلەستى، ناقتى جاعدايمەن تانىستى. ولاردىڭ تەڭدىككە قول جەتكىزۋدى، ەڭبەكتەرىنە لايىقتى جالاقى بەرىلۋىن، نارازىلىق كورسەتكەنى ءۇشىن جۇمىستان شىعارىلعانداردى قايتا الۋدى، الەۋمەتتىك جاعدايدىڭ جاقسارتىلۋىن تالاپ ەتۋى جايىنداعى اڭگىمەلەرىن تۇسىنىستىكپەن تىڭدادى. مۇنايشىلاردىڭ شەشىلمەگەن ماسەلەلەرىنە وكىمەت نازارىن اۋدارۋدى كوزدەپ، بەيبىت جولمەن ەرەۋىلدەگەندەرىندە جانە اشتىق جاريالاعاندارىندا، ءتارتىپ بۇزباۋ جاعىن قالاي قادالاعاندارىن ەستىدى، ارانداتۋشىلاردىڭ قارا ىستەرى سالدارىنان ورناعان اۋىر جاعدايدى كوزىمەن كوردى. ء سويتىپ بيلىك الدىنا احۋالدى جاقسارتۋدى كوزدەيتىن ماسەلەلەر قويىپ ءجۇردى. سول قارالى كۇندەردى، ادال ەڭبەگىنىڭ وتەمىن تالاپ ەتۋ جولىندا قۇرباندىققا ۇشىراعانداردى ەسكە الۋ جيىندارىندا ول ءوز وي-پىكىرىن اشىق ايتىپ كەلەدى.

بۇل ونىڭ قاشاندا ادىلەتتىلىك جاعىندا تۇراتىنىنىڭ جارقىن مىسالى عوي دەپ ويلايمىن. رەتى كەلگەندە ەسكە الا كەتكەن ءجون شىعار، مەرەكە ابدەشۇلى ءوز قىزمەتى سالاسىندا دا، كەلەڭسىزدىكپەن بەتپە-بەت كەلگەن جاعدايدا، ادىلەتتىلىك تۇرعىسىنان ارەكەت ەتۋدى ورىندى دەپ سانايتىن. سونداي ازاماتتىق ءىس-ارەكەتىنىڭ بىرىنە مەن ءوزىم كۋا بولعان ەدىم. ايتالىق، جوسپارلى ەكونوميكا داۋىرىندە ءبىرشاما الاڭسىز ءومىر ءسۇرىپ جاتقان مەرزىمدىك باسىلىمداردىڭ بازار ەكونوميكاسى تابالدىرىقتان اتتاي بەرگەندە-اق قيىندىقتارعا ۇشىراسا باستاعانى ءمالىم. مەملەكەتتىك تاۋەلسىزدىكپەن بىرگە ەكونوميكالىق رەفورمالار كەزەڭى تۋعاندا گازەت-جۋرنالداردىڭ تىنىس-تىرشىلىگى، قارجىلىق تۇرعىدان قاراعاندا، كۇرت اۋىرلاپ كەتتى.  مۇنى اڭداپ وتىرعان ۇكىمەت (ارينە، ءتيىستى ۆەدومستۆو، مينيسترلىگى ارقىلى), جاعدايدى ساۋىقتىرۋ ماقساتىمەن، ءباسپاسوز سالاسىنا بىرقاتار وزگەرىستەر جاسادى. اۋەلى جيىرما بەس باسىلىمدى ىرىكتەپ، مەملەكەت قامقورلىعىنا الدى. ونىڭ سونشالىقتى ءتيىمدى تاجىريبە ەمەس ەكەنى بايقالعاندا،  اكتسيونەرلىك قوعامدار قۇرۋ ماسەلەسىن العا تارتتى. سول شاقتا،  1999 جىلى، «قازاق ادەبيەتى»، «انا ءتىلى»، «ۇيعىر اۆازي» گازەتتەرى مەن «جۇلدىز»، «پروستور»، «اقيقات»، «مىسل» جۋرنالدارىن بىرىكتىرگەن «قازاق گازەتتەرى» اكتسيونەرلىك قوعامى شاڭىراق كوتەردى.  كەيىنىرەك جاۋاپكەرشىلىگى شەكتەۋلى سەرىكتەستىككە اينالدىرىلعان بۇل ۇيىمدى باسقارۋ جۇمابەك كەنجالينگە تاپسىرىلعان بولاتىن. ول اۋىرتپاشىلىعى شاش-ەتەكتەن بوپ تۇرعان زاماندا ۋاقىت تالابىنا توتەپ بەرە الاتىن جاڭا ۇجىم قۇرىپ، اتالعان باسىلىمداردى قيىندىقتان الىپ وتە الدى. تاۋەلسىزدىكتىڭ العاشقى جىلدارى قىزمەتكەرلەرىنىڭ ەڭبەكاقى الۋى، باسىلىمدارىنىڭ جارىق كورۋى مۇڭ بولىپ قالعان «قازاق ادەبيەتى» گازەتى مەن «جۇلدىز»، «پروستور» جۋرنالدارى «قازاق گازەتتەرى» سەرىكتەستىگىنىڭ ارقاسىندا قايتا قوڭايدى. سول شاقتا ولارعا جازۋشىلار وداعى قوجايىن بولعىسى كەلەتىن نيەت تانىتىپ، ۇلكەن شۋ كوتەردى. ماسەلەنىڭ ءمان-جايى مەن قىر-سىرىن جازۋشىلار وداعى حاتشىلىعىنا جۇمابەك تە، سەرىتەستىكتى ودان كەيىن باسقارعان مەرەكە قۇلكەنوۆ تە بىلىكتى باسشى پاراساتىمەن تۇسىندىرۋگە تىرىسقان. الايدا وداقتاعى باسشىلاردىڭ تۇسىنىگى باسقاشا ەدى، سودان دا شىعار، اراعا از عانا ۋاقىت سالىپ، اتالعان باسىلىمدارعا قوجا بولماق پيعىلدارىن تاعى قوزداتتى. ويتكەنى ولار ءجون سوزگە توقتايتىندار قاتارىنان ەمەس-ءتىن. ءوزىمنىڭ قالامگەرلەر ۇيىمىندا قىزمەت اتقارعان جىلدارىمداعى تاجىريبەمە بايلانىستى،  مەنىڭ بۇعان انىق كوزىم جەتكەن. جازۋشىلار وداعىنىڭ جاڭا باسشىلىعى زامان تالابىن دۇرىس ۇقپاعان، ەسكىشە ءومىر سۇرۋدەن ايرىلعىسى كەلمەيتىن، كەڭەستىك داۋىردەگى ماسىلدىق پايىمدا قالعان قىزمەتكەرلەر قاتارىنان ەدى. سوۆەت زامانىندا شىلقىپ كۇن كورگەن وداق تاۋەلسىزدىك كەزەڭدە دە سونداي بولۋعا ءتيىس دەپ ويلايتىن. الايدا ناقتى شىندىقتىڭ باسقاشا ەكەنىن، وكىمەت بازار ەكونوميكاسىن قابىل ەتكەندىكتەن، ەندىگى تىرشىلىكتە جازۋشىلاردىڭ دا سوعان كوندىگۋى ءام بەيىمدەلۋى ءتيىس دەگەندى تۇسىنە قويمايتىن. ۋاقىت العا شىعارعان جاڭا تالاپتارعا بايلانىستى، تاۋەلسىزدىكتىڭ العاشقى جىلىندا-اق، جازۋشىلاردىڭ شىعارماشىلىق وداعىنا ۇكىمەتتەن، ادەبي قورىنا ورتالىق قوردان قۇيىلاتىن قارجى كوزى توقتاعان. سوندىقتان وداقتىڭ تاۋەلسىزدىك قارساڭىندا سايلانعان باسشىلىعى الدىمەن، قارجىلىق تىعىرىقتان وپ-وڭاي شىعىپ كەتسەك دەگەن ۇمىتپەن، ءوزىنىڭ جانە ادەبي قوردىڭ عيماراتتارىن كوممەرسانتتارعا جەدەل باسقارۋعا بەرگەن. ارينە، قاتتى قاتەلەسكەن. ارتىنشا تۇزەتۋگە تىرىستى، بىراق بۇل ارەكەت ۇزاققا سوزىلعان سوتتاسۋلار سالدارىنان، ولاردىڭ جارعىلىق قىزمەت ەتۋ مەرزىمىن تۇتاس الدى دەۋگە بولادى. اقىرى، سوت شەشىمىمەن كوممەرسانتتاردان عيماراتتار قايتارىلدى. ودان ارعى جاعداي دۇرىس ءوربۋ ءۇشىن، جىلجىمايتىن مۇلىكتىڭ ءبارى ادەبي قورعا بەرىلدى. وداق پەن قور ءوزارا قىزمەتتەستىك حاقىندا كەلىسىمشارت جاسادى. وندا وداقتىڭ شىعارماشىلىق جانە قوعامدىق شارۋالارمەن شۇعىلداناتىنى، ال ادەبي قوردىڭ شارۋاشىلىقتى ۇتىمدى جۇرگىزۋ ارقىلى وداققا جانە جازۋشىلارعا ماتەريالدىق، الەۋمەتتىك-تۇرمىستىق جاعداي جاساۋعا تىرىساتىنى بەلگىلەگەن-ءدى. الايدا ماتەريالدىق يگىلىكتى ءوز قولىنا المايىنشا، اتقارار جۇمىسىنىڭ ءجون-جوباسىن كوزىنە ەلەستەتە دە المايتىن جاڭا باسشىلىق ونى مويىنداعان جوق. ءتۇرلى ءادىس قولدانۋ ارقىلى زاڭدى بەلدەن باسىپ، ادەبي قوردى جويدى. ەسەسىنە كوممەرسانتتارمەن بەتپە-بەت قالدى دا، وزدەرىنىڭ ايتۋى بويىنشا، ولارمەن ءۇش جارىم جىل سوتتاستى. ەڭ عاجابى، مۇنداي قيىندىققا ۇشىراۋلارىن ولار وزدەرىنەن (بىتكەن ءىستى نەگىزگە الىپ، جۇمىستى جاڭاشا دامىتۋدىڭ ورنىنا، وزدەرىنىڭ قايتكەندە ءبارىن ءبىر قولعا شوعىرلاندىرىپ، دوكەي باستىق بولۋعا قۇمارلىقتان تۋعان قۇقىقتىق ساۋاتسىزدىقتارىنان) ەمەس، وداقتىڭ وزدەرىنە دەيىنگى باسشىلارىنان كوردى جانە سول قاتە كوزقاراستارىن كۇنى بۇگىنگە دەيىن جالاۋلاتىپ، جالعاندىقتى اسپانعا كوتەرە داۋرىعۋمەن كەلەدى. مىنە، باسىلىمدار ماسەلەسىندە دە تاپ سوعان ۇقساس جاعداي ورىن الىپ تۇرعان. وداق كەيىنگى جىلدارى جاعدايلارى تۇراقتانىپ، ۋاقتىلى شىعىپ كەلە جاتقان گازەت-جۋرنالدار ەندى «وزىمىزگە قايتارىلسىن، ول باياعىدان بىزدىكى بولاتىن» دەيدى. بىراق ولاردى قايتىپ قارجىلاندىراتىنىنا وي جۇگىرتپەيدى.  ءىس جۇزىندە، ماتەريالدىق تۇرعىدان قاراعاندا، بۇل گازەت-جۋرنالدار ەشقاشان وداققا تيەسىلى بولعان ەمەس-ءتىن. راس، شەكەلەرىنە وداقتىڭ ورگانى ەكەنى جازىلىپ قويىلاتىن، بىراق ولاردى باسىپ شىعارۋعا، قىزمەتكەرلەرىنە ەڭبەكاقى بەرۋگە ورتالىق پارتيا كوميتەتىنىڭ باسپاسى جەگىلگەن، ال وداق بيۋدجەتتەن قارجىلاندىرىلاتىن.

تاۋەلسىزدىك كەزىندە جاعداي وزگەردى. جازۋشىلار وداعىنا قارجى اۋەلدە تەك عيماراتتى ۇستاپ تۇرۋ ءۇشىن عانا ءبولىنىپ، ارتىنان ول دا دوعارىلدى. سودان وداق تەك عيمارات بولمەلەرىن جالعا بەرۋ جولىمەن كۇن كورە باستادى. ال باسىلىمداردى باسپا مينيسترلىگى قارجىلاندىرىپ، العاشقى كەزدە وداق پەن رەداكتسيا ۇجىمىن مينيسترلىكپەن قاتار قۇرىلتايشى ەتىپ كورسەتىپ ءجۇردى دە، ۇزاماي، قوساتىن ماتەريالدىق ۇلەسى جوق بولۋى سەبەپتى،  وداقتى دا، رەداكتسيا ۇجىمىن دا قۇرىلتايشىلىقتان مۇلدەم الىپ تاستادى. ودان كەيىنگى كەزەڭدە، جوعارىدا ايتقانىمىزداي، مينيسترلىك بىرنەشە باسىلىمنىڭ باسىن قوسىپ، دەربەس قۇرىلىم جاسادى. قالامگەرلەردىڭ وسى قۇرىلىمدا تىرشىلىگى ءتاپ-ءتاۋىر بوپ قالعان گازەت-جۋرنالدارىن بيلەگىسى كەلگەن جازۋشىلار وداعى كاسىبي مامانداردىڭ دالەلدى تۇسىندىرۋىنەن كەيىن ءسال تىنشىعانداي بولعانمەن،  از مەزگىلدەن كەيىن جۇرتشىلىقتى قايتادان دۇرلىكتىردى. ويتكەنى قايتكەندە  قوجالىققا جەتۋدىڭ جاڭا قادامدارىن جاساۋدى ويلاستىرعان.  ءسويتىپ، دالەلدى تۇسىندىرمەلەردى ءبىر قۇلاعىنان اعىزىپ جىبەرىپ، ماسەلەنى باسقا قىرىنان قوزدىردى. جازۋشىلاردىڭ گازەتى مەن جۋرنالدارىن جازۋشىلار وداعىنا قايتارمايتىن جاعدايدا، باسىلىمداردىڭ وداق عيماراتىندا ورنالاسقان بولمەلەرى ءۇشىن «قازاق گازەتتەرى» سەرىكتەستىگى جالداۋ پۇلىن تولەسىن... وسى ءجايت شەشۋشى ءرول اتقاردى ما دەيمىن، مەرەكە قۇلكەنوۆ باسقاراتىن سەرىكتەستىك اتالعان گازەت-جۋرنالداردى وداق عيماراتىنان وزدەرى وتىرعان باسپالار ءۇيى عيماراتىنا كوشىرىپ الدى. سودان سوڭ قيقۋ جاڭاشا ءوربىدى، جوعارعى جاقتاعى قول جەتەتىن بۋىنداردىڭ ءبارى ىسكە قوسىلدى. اقىرى، ءۇش باسىلىم سەرىكتەستىك قۇرامىنان شىعارىلىپ، وداق عيماراتىنا قايتا كوشىپ كەلدى. بىراق قارجىلىق قيىندىقتى، جاڭىلىسپاسام،  ءالى ەڭسەرىپ كەتە قويعان جوق. ەڭ جامانى، ولار ءىس جۇزىندە، زاڭي تۇرعىداعى قوعامدىق مەنشىك يەسى رەتىندە بارشاسىنا تەڭ قاراۋى ءام ساناسۋى ءتيىس وداق مۇشەلەرىن الالايتىن، شىنتۋايتىندا، باسشىلىقتىڭ جەكەمەنشىگىندەگى اقپارات قۇرالىنا  اينالدىرىلدى. ىسكەر، ماسەلەنىڭ كوزىن تابا بىلەتىن، ناعىز ۋاقىت تالابىنا لايىقتى جاۋاپ بەرە الاتىن زاماناۋي باسپاگەر مەرەكە سەرىكتەستىڭ قۇرامىندا جاڭادان «ەكونوميكا» گازەتى مەن جاس شىعارماشىل كۇشتەر ءۇشىن «ۇركەر» اتتى ادەبي جۋرنال اشتى. ونىڭ سول ءىسىن سەرىكتەستىكتى باسقارۋعا  كەلگەن باۋىرجان وماروۆ، ول باسقا قىزمەتكە كەتكەننەن كەيىن سەرىكتەستىك باسشىلىعىنا قايتا ورالعان جۇمابەك كۇنى بۇگىنگە دەيىن وتە ءساتتى جالعاستىرۋدا. جاڭا گازەت پەن جۋرنال ءباسپاسوز ايدىنىندا ءوز ورنىن تاۋىپ، وقىرمانداردىڭ سۇيىسپەنشىلىگىنە بولەنىپ كەلەدى.

مەرەكەنىڭ قازىرگى تاڭداعى الپىس بەس سىندى ەلەۋلى بەلەسىنە كوتەرىلىپ كەلە جاتقان شاعىندا مەن ونى ناعىز زيالىلار قاتارىنداعى تۇلعا رەتىندە اتاپ وتكىم كەلەدى. ويتكەنى ول ءوزىنىڭ كۇللى بولمىسىمەن ۇلى كۇرەسكەر مۇستافا شوقايدىڭ زيالىلىققا بەرگەن انىقتاماسىنا تولىعىمەن سايكەس كەلەدى.   مەرەكە ابدەشۇلى قۇلكەنوۆ ۇلتقا قىزمەت ەتۋ يدەياسىنا تەرەڭ بەرىلگەن، ءوزىنىڭ بارشا شىعارماشىلىعىن، الەۋمەتتىك جانە مادەني تىنىس-تىرشىلىكتى جاقسارتۋ باعىتىنداعى كۇللى قوعامدىق ءىس-ارەكەتىن سوعان جۇمسايتىن زيالى ازامات. مەن وسىناۋ تاماشا جاندى الپىس بەسىنشى بەلەسىمەن قىزۋ قۇتتىقتاپ، جۇمىستارىندا جاڭا تابىستارعا جەتە بەرۋىنە تىلەكتەستىك بىلدىرەمىن.

بەيبىت قويشىباەۆ

Abai.kz