كۇنى كەشە عانا اقش-تا كەزەكتى پرەزيدەنت سايلاۋى اياقتالىپ، رەسپۋبليكاشىل دونالد ترامپ جەڭىسكە جەتكەنىن  حابارلاعان ەدىك. سايلاۋشىلاردىڭ 48 پايىز داۋىسىن جيناعان دونالد ترامپ اقش-تىڭ ءنومىرى 45-پرەزيدەنتى بولدى. الەم مەملەكەتتەرىنىڭ باسشىلارى وزدەرىنىڭ اقجارما قۇتتىقتاۋلارىن جولدادى. دونالدتىڭ باستى قارسىلاسى دەموكراتياشىلدار اتىنان دوداعا تۇسكەن حيلاري كلينتون جەڭىلگەنىن مويىنداپ، ترامپتى قۇتتىقتادى. حوش، بولسا بولىپتى دا.

الايدا كۇللى الەمگە ناعىز دەموكراتيانىڭ قانداي بولاتىنىن پاش ەتكەن امەريكا تۇرعىندارى كەشەلى بەرى كوشەدە ءجۇر.  سايلاۋدىڭ سوڭى جالپى حالىقتىق نارازىلىق شەرۋىنە ۇلاستى. تراپمقا قارسى. «ترامپ ءبىزدىڭ پرەزيدەنتىمىز ەمەس!» دەيدى بەلسەندى قوعام ازاماتتارى. بۇل نارازىلىق ءبىزدىڭ دە نازارىمىزدى اۋدارعاندىقتان شولۋ جاساۋدى ءجون كوردىك.

«BBC» اگەنتتىگىنىڭ اقپاراتتارىنا سۇيەنسەك، ترامپقا قارسى نارازىلىق شارالارى نيۋ-يورك، وكلەند (كاليفورنيا), پورتلەند، لوس-اندجەلەس، چيكاگو، ۆاشينگتون، فيلادەلفي، بوستون، سيەتل جانە سان-فرانتسيسكو قالالارىندا وتۋدە.

دەمونسترانتتاردىڭ دەنى «مەنىڭ پرەزيدەنتىم ەمەس!» دەپ ۇرانداپ، دونالد ترامپ بەينەلەنگەن قۋىرشاقتاردى ورتەۋدە.

ال اقش-تىڭ 44-پرەزيدەنتى باراك وباما سايلاۋ دوداسىندا ترامپتى «تۇككە جارامسىز» (unfit) دەپ، امەريكا تۇرعىندارىن حيلاري كلينتونعا داۋىس بەرۋگە شاقىرعانىمەن، سايلاۋ قورىتىندىسى شىققان سوڭ حالىقتى ترامپتىڭ جەڭىسىن مويىنداۋ كەرەكتىگىن ءمالىم ەتتى.

«قازىر ءبىز بارلىعىمىز ونىڭ جۇمىسىنا ساتتىلىك تىلەيمىز»، - دەدى ول.

ءتىپتى، جۇرتتى سابىرعا شاقىرعان حيلاري كلينتون دا ترامپقا ءبىر مۇمكىندىكتىڭ بەرىلۋى ءتيىس ەكەنىن ايتتى. 

ال «Independent» باسىلىمى «انتي-دونالد ترامپ نارازىلىق شاراسى: ميللياردەر ءبىزدىڭ پرەزيدەنتىمىز ەمەس!» اتتى ماقالا جاريالادى.

سارسەنبىنىڭ تۇنىندە اقش كوشەلەرىنە شىققان بەلسەندىلەر دوانلد ترامپتىڭ پرەزيدەنت بولىپ سايلانعانىن مويىندامايتىنىن ايتقان.

باسىلىمنىڭ جازۋىنشا، الاڭعا جينالعانداردىڭ باسىم كوپشىلىگى جاستار بولعان. ال جەرگىلىكتى پوليتسيا «Trump Tower» عيماراتىن قورشاۋعا الىپ، قۇم تيەلگەن جۇك كولىكتەرىن جەتكىزگەن.

دەمونسترانتتار «ترامپ f**king» دەگەن سالەمدەرىن قابىلدامايتىن بولسا، كۇندە جينالاتىندارىن ايتىپ سەس كورسەتۋدە.

«CNN» اگەنتتىگىنىڭ حابارلاۋىنشا, نارازى توپقا دونالد ترامپتىڭ راسسيستىك كوزقاراستارى ۇناماعان. اسىرەسە، امەريكا-مەكسيكا شەكاراسىندا قورعان تۇرعىزۋ تۋرالى باستاماسى كسەنوفوبيالىق احۋالدى ۋشىقتىرىپ وتىر.

ال «THEGUARDIAN» باسىلىمى «انتي-ترامپ اكتسياسىنا قاتىساسىز با؟»   اتتى ساۋالناما جاساعان. اتالعان باسىلىم دونالد ترامپقا قارسى نارازىلىق شارالارىندا ايتىلعان ۇرانداردى تىزبەلەپ شىققان ەكەن. مىسالى، «دونالد ترامپتى دوپورتاتسيالاۋ كەرەك»، «f**k ترامپ»، «فاشيستەرگە جول جوق»، «ترامپ، سەن بوسسىڭ!»، «ترانس قۇقىق – ادام قۇقىعى شەڭبەرىندە»، «ادام قۇقىعى – ايەلدەر قۇقىعى»، «مەنىڭ دەنەم – مەنىڭ تاڭداۋىم» ت.ب.

ءتۇيىن: باتىس باسىلىمدارىنىڭ كوبى بۇل سايلاۋدى اقش تاريحىنداعى ەڭ لاس سايلاۋ دەپ باعالاپتى. جەڭىمپاز دونالد ترامپ سايلاۋالدى ناۋقاندا ەگەر پرەزيدەنت اتانىپ، اق ۇيگە باراتىن بولسا، ەلدەگى بوسقىنداردى، يسلامدى تۇتىناتىن تۇرعىنداردى، الىس-جاقىن ەلدەردەن كەلگەن ەڭبەك ميگرانتتارىن امەريكادان قۋىپ شىعاتىنىن ايتىپ، امەريكا مەن مەكسيكا شەكاراسىندا قورعان تۇرعىزۋعا ۋادە بەرگەن. ودان بولەك، ترامپ ناسىلدىك، جىنىستىق ديسكريميناتسياعا جول بەرىپ، ءحيللاريدى «ايەل كەيپىندەگى ەركەك» دەپ اجۋالاعان بولاتىن.

«Financial Times» باسىلىمى دونالد ترامپ پەن قاشقىندا جۇرگەن الماتىنىڭ ەكس-اكىمى ۆيكتور حراپۋنوۆ اراسىندا قارىم-قاتىناس بار ەكەندىگىن جازعان ەدى.

ال كۇنى كەشە عانا قازاقستان پرەزيدەنتى نۇرسۇلتان نازارباەۆ دونالد ترامپتى سايلاۋداعى جەڭىسىمەن قۇتتىقتاپ، قازاقستانعا شاقىردى.

نۇرگەلدى ابدىعانيۇلى

Abai.kz