ادامزات اداسقانىن دالەلدەدى...
مەنىڭ ايقىن ۇستانىمىم مىناداي: امەريكا الىپ ەل بولعانىمەن، كۇللى الەم ەمەس، ءتىپتى، ونىڭ جارتىسى دا ەمەس. دەسە دە، تۋراسىن ايتقاندا، كەشەگى كەڭەس بيلىگى سەكىلدى، بۇل دا زورلىق پەن زۇلىمدىقتىڭ ءبىر ورداسى: باس پايداسى باسىنا شىققان، ساسىق ساياساتى قانىنا ءسىڭىپ كەتكەن...
مىسالى، ءبىزدىڭ ەلدە كەشەگى وزبىر ورىستىڭ ءستالينى مەن كوممۋنيسىن، اق اراعى مەن شوشقاسىنىڭ مايىن جان-تانىمەن قورعاپ، قىرىقپىشاق ۇرسىساتىن اقساقالدار ءالى دە بار. سول سوۆەت وكىمەتى ادىلدىك تۋرالى، دوستىق جايلى، تەڭدىك تۇرعىسىندا بۇلبۇلداي سايراپ، نەشەمە وتىرىكتەردى سوقتى. ايتىپ، تاۋىسا المايسىڭ. سوعان اتالارىمىز بەن اكەلەرىمىز العاشىندا يمانداي سەندى عوي...
ءبىر جەردەن مىناداي ساۋەگەيلىكتى كوزىم شالدى: «گەوساياساتتان حابارى بار ادامدار وسى سايلاۋدا تمد ەلدەرىنىڭ تاعدىرى دا شەشىلەتىنىن ءتۇسىنىپ، تىقىرشىپ وتىرعان بولۋى كەرەك. تمد ەلدەرى ارى قاراي جەكە تاۋەلسىز ەل بولىپ قالا ما، الدە، رەسەيدىڭ قول استىنا قايتا كىرىپ، ونىڭ وتارى بوپ قۇري ما، دەگەن سۇراق بۇگىن شەشىلمەك... «ترامپ كەلمەسىن» دەپ تىلەيىك. ەگەر ترامپ پرەزيدەنت بولسا، تمد اۋماعى ونىڭ دوسى ءپۋتيننىڭ قولاستىنا ءوتىپ، ءبىزدىڭ مەملەكەتتىگىمىزگە ۇلكەن قاۋىپ تونەدى. سەبەبى، ترامپتىڭ سىرتقى ساياساتتاعى ۇستانىمى سونداي. ترامپ ءبىزدى لاقتىرىپ كەتپەكشى. ال، «رەسمي ۆاشينگتون – ءبىزدىڭ تاۋەلسىزدىگىمىزدىڭ كەپىلى، ءبىز يادرولىق قارۋدى بەرگەندە، سولاي ۋاعدالاسقانبىز» دەۋىڭىز مۇمكىن. بىراق، الەمدىك ويىنشىلاردىڭ ويىنىسىز ەشبىر حالىق ءوز ساياساتىن جاساي المايدى...»
ال، ەندەشە!..
ترامپ جەڭدى، بىراق، ەرتەڭ دۇنيە ءبۇلىنىپ كەتپەيدى. «سايقىمازاق» ترامپتان قازاقتىڭ قورقاتىن ەشتەڭەسى جوق. ودان دا زورىن، «كەڭەس وكىمەتى» دەپ اتالاتىن تاجالدىڭ دا تابانىن تايدىرعانبىز. قازاق تا، وزبەك پەن تاجىك تە، تۇركىمەن مەن قىرعىز دا، باسقالارى دا قولىنداعى ءبوزى مەن اۋىزىنداعى ءسوزىن قولدان بەرمەيدى، قالايدا كۇش-قۋاتى مەن قايسار جىگەرىن ايانىپ قالمايدى. سوسىن، «ترامپ پەن پۋتين دوس» دەگەن ءسوز – قۇر ساندىراق. مۇنىڭ شىندىعىن ۋاقىت كورسەتەدى...
امەريكا – ايدالا جاپان تۇزدەگى جابايى دجۋنگلي ەمەس، وتە وركەنيەتتى دە ءورىستى ەل. دەمەك، ترامپتىڭ ءبىلىمدى جاقتاستارى، بىلىكتى كەڭەسشىلەرى، ۇلتتىق بارلاۋ ورتالىعى، ۇلتتىق قاۋىپسىزدىك اگەنتتىگى، كونگرەسس، جوعارى سوت جانە باسقا دا مەملەكەتتىك ورگاندار وسىعان دەيىن ۇستانعان ساياساتتى وڭايشىلىقپەن وزگەرتپەيدى.
قازاق مەملەكەتىنىڭ، قازاق ۇلتىنىڭ ماقتانىشى، مايتالمان بوكسشى گەننادي گولوۆكين كانادالىق داۆيد لەمەنى تەحنيكالىق نوكاۋتپەن جەڭگەندە، امەريكانىڭ جاڭا باسشىسى دونالد ترامپ: «بۇل تاماشا جەكپە-جەك بولدى. گولوۆكين – ۇلى بوكسشى»، – دەگەن ەدى. سول ۇلى سپورتشىنىڭ ۇلى ەلى – قازاق ەلى دە وڭاي شاعىلاتىن جاڭعاق ەمەس. اقىرىن ءجۇرىپ، انىق باسقانىڭىز ءجون، پرەزيدەنت مىرزا!
...قالاي دەسەك تە، «اللانىڭ ءوزى دە راس، ءسوزى دە راس» (اباي) دەمەكشى، اقىرزامان اقىرىنداپ جەر بەتىنە جاقىنداپ كەلە جاتقان سەكىلدى...
الىپ قۇرىلىقتاعى حالىقتىڭ بۇگىنگى ارەكەتى – جالپى ادامزات بالاسىنىڭ اداسۋ جولىنا تۇسكەندىگىن انىق دالەلدەدى...
قاجىمۇقان عابدوللا
Abai.kz
