ۇكىمەتتىڭ بۇگىنگى وتىرىسىندا پرەمەر-مينيستر باقىتجان ساعىنتاەۆ قاراشانىڭ باسىن الا سوققان قاتتى داۋىلدان كەيىنگى وقو جانە جامبىل وبلىسىنداعى جاعدايدى سۇراپ ءبىلدى. بۇل جايىندا www.primeminister.kz سايتى حابارلادى.

«ۇكىمەتتىڭ كەزەكتى وتىرىسىن باستاماس بۇرىن قاتتى داۋىلدان زارداپ شەككەن وڭتۇستىك وڭىرلەردەگى، اسىرەسە، جامبىل وبلىسىنداعى توتەنشە جاعدايعا توقتالعىم كەلىپ وتىر. تابيعي اپاتتان ينفراقۇرىلىم نىساندارىنا زاقىم كەلىپ، بىرنەشە اۋدان جارىقسىز قالدى. قاتتى جەل عيماراتتار مەن ۇيلەردىڭ شاتىرلارىن جۇلىپ اكەتتى. مەن وبلىس اكىمدەرى مەن ءتيىستى مەملەكەتتىك ورگانداردىڭ باسشىلارىنا شۇعىل تاپسىرما بەرگەن بولاتىنمىن. سونداي-اق، وسى ماسەلەنى اسقار ۇزاقبايۇلىنا باقىلاۋعا الۋدى تاپسىرعانمىن. كارىم ناسبەكۇلى، قالپىنا كەلتىرۋ بويىنشا قانداي جۇمىستار اتقارىلدى، بايانداڭىز»، - دەپ سۇرادى ب. ساعىنتاەۆ.

«تابيعي اپاتتان تاراز قالاسىنداعى جانە وبلىستىڭ بەس اۋدانىنداعى نىساندار زارداپ شەكتى. بارلىعى 1 754 نىسان زارداپ شەكتى، ونىڭ ىشىندە 454 نىساننىڭ شاتىرىنىڭ 70% زاقىمداندى. 53 مىڭ ابونەنت ەلەكتر جەلىسىنەن اجىراپ قالدى، بەس ەلدى مەكەندە گاز بەرۋ توقتادى. شۇعىل تۇردە تج سالدارىن جويۋ شارالارىن قابىلدادىق، ازاماتتىق قورعانىس كۇشتەرى مەن قۇرالدارىن جوعارى ازىرلىككە كوشىردىك، قوعامدىق ءتارتىپ پەن جول قوزعالىسىن كۇشەيتتىك. شۇعىل جۇمىستار ناتيجەسىندە سول كۇنى، 3 قاراشادا گاز بەرۋ قالپىنا كەلتىرىلدى، 4 قاراشادا حالىققا جىلۋ بەرۋ جالعاستىرىلدى، 6 قاراشادا اۋىلدىق ەلدى مەكەندەردە ەلەكتر جەلىسىن بەرۋ قالپىنا كەلتىرىلدى. بۇگىندە تارازدا جەكەمەنشىك تۇرعىن ءۇي سەكتورىنداعى 351 ابونەنتكە جارىق بەرۋ جۇمىستارى جالعاسىپ جاتىر. 36 ازامات مەديتسينالىق كومەككە جۇگىندى، ونىڭ 4-ءۋى اۋرۋحاناعا جاتقىزىلدى. تاراز قالاسىندا، بايزاق، مويىنقۇم جانە شۋ اۋداندارىندا جەرگىلىكتى ماڭىزعا يە تج رەجىمى ەنگىزىلدى»، - دەپ حابارلادى جامبىل وبلىسىنىڭ اكىمى ك. كوكىرەكباەۆ.

ءوز كەزەگىندە، وقو اكىمى ج. تۇيمەباەۆ وبلىستا قالپىنا كەلتىرۋ جۇمىستارى جۇرگىزىلىپ جاتقانىن حابارلادى.

ەسكە سالايىق، 3 قاراشا كۇنى جامبىل جانە وڭتۇستىك قازاقستان وبلىستارىندا ەكپىنى سەكۋندىنا 30 مەتر جىلدامدىققا جەتكەن قاتتى جەل تۇرىپ، سونىڭ سالدارىنان جامبىل وبلىسىنىڭ بايزاق، جامبىل، جۋالى، شۋ اۋداندارى زارداپ شەككەن بولاتىن.  

 اباي-اقپارات