استانا قالالىق قىلمىستىق ىستەر جونىندەگى مامانداندىرىلعان اۋدانارالىق əسكەري سوتى بۇگىن 2016 جىلدىڭ 7 قاراشاسىندا قازاقستاننىڭ كونستيتۋتسيالىق قۇرىلىمىنا كۇشتەپ وزگەرىس ەنگىزبەكشى بولعانى ءۇشىن ايىپتالعان توقتار تولەشوۆتى مۇلكىن تاركىلەي وتىرىپ، 21  جىلعا سوتتادى. ول جازاسىن قاتاڭ رەجىمدەگى تۇزەۋ كولونياسىندا وتەيدى، دەپ حابارلايدى قازاقپارات ءتىلشىسى سوت زالىنان(http://kazinform.kz/kz/toktar-toleshov-21-zhylga-sottaldy_a2967018).

 ت. تولەشوۆ 18 اۋىر جانە اسا اۋىر قىلمىستار، سونىڭ ىشىندە ادام ءولتىرۋ، ايۋاندىقپەن ازاپتاۋ، ادام ۇرلاۋ جانە ت.ب. قىلمىستار جاساعانى ءۇشىن سوتتالدى. وعان تاعىلعان ايىپتاردىڭ اراسىندا مەملەكەتتى كۇشپەن باسىپ الۋعا تالپىندى  جانە قازاقستاننىڭ ءوڭىر-وڭىرىندە جەر داۋىن  ۋشىقتىرىپ، زاڭسىز ميتينگتەردى قارجىلاندىردى دەگەن ايىپتاۋلار بار. ەسكە سالا كەتەيىك، ءىس ماتەريالدارىندا مەملەكەتتىك قۇپيالارعا قاتىستى دەرەكتەر بولعاندىقتان، توقتار تولەشوۆتىڭ سوتى بىرنەشە اي بويى جابىق تۇردە وتكەن بولاتىن. 2016 جىلدىڭ قاڭتارىندا شىمكەنتتە كۇش قۇرىلىمدارى ارنايى وپەراتسيا جۇرگىزىپ، ونى قولعا تۇسىرگەن بولاتىن. ارادا التى اي وتكەن سوڭ، ياعني، ماۋسىم ايىندا ۇلتتىق قاۋىپسىزدىك كوميتەتى رەسمي مالىمدەمە جاساي وتىرىپ، توقتار تولەشوۆكە قاراجاتى مەن لاۋازىمىن پايدالانا وتىرىپ، بيلىكتى كۇشپەن باسىپ الۋعا ارەكەتتەندى دەگەن ايىپ تاقتى. بۇل ويىن جۇزەگە اسىرۋ ءۇشىن توقتار تولەشوۆ قۇزىرلى ورگاندار مەن اسكەري سالاداعى ۆەدومستۆولاردان سىبايلاستار تاپقان. قىلمىستىق ىستەگى باستى جاۋاپكەر - توقتار تولەشەۆ بىرقاتار قىلمىستار بويىنشا ايىپتالعان بولاتىن، ولاردىڭ اراسىندا: ادام ۇرلاۋ، ءولتىرۋ، زاڭسىز بوستاندىعىنان ايىرۋ، بيلىكتى باسىپ الۋعا جاريا شاقىرۋ، سونداي-اق بيلىكتى باسىپ الۋ نەمەسە قر كونستيتۋتسيالىق قۇرىلىسىن كۇشتەپ وزگەرتۋ، ەكسترەميستىك توپ قۇرۋ، وعان باسشىلىق ەتۋ نەمەسە ونىڭ قىزمەتىنە قاتىسۋ، توناۋشىلىق، ۇيىمداسقان قىلمىستىق توپ، ۇيىم قۇرۋ جانە وعان باسشىلىق ەتۋ سياقتى ايىپتار تاعىلعان. سونداي-اق ول قارۋلاردىڭ، وق-دارىلەردىڭ، جارىلعىش زاتتاردىڭ جانە جارىلعىش قۇرىلعىلاردىڭ  زاڭسىز اينالىمىنا ايىپتالۋدا. سونىمەن بىرگە، تولەشوۆتىڭ وتكىزۋ ماقساتىنسىز ەسىرتكى زاتتارىنىڭ زاڭسىز اينالىمىنا قاتىسى بار ەكەندىگى جونىندە ايىپ تاعىلعان بولاتىن. كەيىنىرەك əلەۋمەتتىك جەلىدە ت. تولەشوۆتىڭ قىلمىس جاساعانىنا شىن كوڭىلىمەن وكىنگەنى جونىندە قۇجاتتار جاريالاندى. ۇقك-ءنىڭ باسشىسىنا جازعان ءوتىنىش-حاتىندا «شىمكەنتسىرا» جشس-ءنىڭ ەكس-ديرەكتورى ت. تولەشوۆ قازاقستاندا جەردى شەتەلدىكتەرگە ساتۋ مەن جالعا بەرۋگە قارسى شەرۋلەردى ۇيىمداستىرعانىن مويىندادى. «حالىق مەنى قولداۋ ءۇشىن بيلىكتىڭ بەدەلىن ءتۇسىرۋ كەرەكتىگىن ءبىلدىم. ول ءۇشىن الەۋمەتتىك جارىلىس جاساۋ كەرەك ەدى. مۇنداي ءىس ءوز قولىمنان كەلمەيتىنىن ءتۇسىندىم. سول ءۇشىن اتىراۋداعى ەرىك-جىگەرى مول تالعات اياندى ىزدەپ-تاپتىم. ول ءوزىنىڭ سوڭىنان حالىقتى ەرتە الاتىنىنا سەندىم. سوندىقتان اقشالاي دەمەۋشىلىك جاساپ، «حالىق باتىرىنىڭ» بەينەسىن سومداۋدى تاپسىردىم. مەن باق-تاردا ۇزاق ۋاقىت تالقىعا تۇسكەن جەر رەفورماسىنىڭ بولاتىنىن ءبىلدىم. قازاقتاردىڭ تۋعان جەرىن قورعاۋ ءۇشىن ەشتەڭەدەن تايىنبايتىنىن ەسكەرىپ، وسى مۇمكىندىكتى پايدالانعىم كەلدى. سول ءۇشىن قىزبا مىنەزدى تۇرعىندارى كوپ اتىراۋدى تاڭدادىم. جانە ول جەردەگى بۇلىككە قاتىسىمنىڭ بارىن ەشكىم سەزبەيدى دەپ ءتۇيدىم. ءسويتىپ، ءوز قىزمەتكەرلەرىمە تالعات ايانعا 100 000 دوللار جىبەرىپ، «جەر ماسەلەسىمەن» اينالىسۋعا جانە قازاق جەرىن شەتەلدىكتەرگە ساتۋ تۋرالى وسەك تاراتۋعا نۇسقاۋ بەردىم. مۇنداي ارەكەت جۇرتتى دۇرلىكتىرىپ، حالىق تۋعان جەردى قورعاۋ ءۇشىن كوتەرىلەتىنىن ءبىلدىم»،- دەلىنگەن قۇجاتتا. ول ءوزىنىڭ تۇپكى ماقساتى - حالىقتىڭ بيلىككە دەگەن اشۋ-ىزاسىن تۋعىزۋ جولىمەن ەلدە ۆيتسە-پرەزيدەنت لاۋازىمىن ەنگىزۋگە قول جەتكىزۋدى كوزدەگەن.

Abai.kz