ەلوردا ماڭىنداعى قوسشى كەنتىندە العاشقى، ەل بويىنشا اۋىلدى جەردە ەكىنشى  جاڭا كىتاپحانا اشىلدى. اقمولا وبلىسىنداعى اتالعان ەلدىمەكەندە بۇرىن ءدال مۇنداي رۋحاني-مادەني ورىن بولماعان.

كەنت ورتالىعىنداعى كىتاپحانا نىسانى «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى نۇرجان التاەۆتىڭ باستاماسىمەن باستاۋ العان «كىتاپسۇيەر ۇلت» جوباسى اياسىندا وقىرمان قاۋىمعا ءوز ەسىگىن ايقارا اشتى.

سالتاناتتى تۇساۋكەسەر راسىمدە بارشانى جەرگىلىكتى حالىق ءۇشىن ەلەۋلى وقيعامەن قۇتتىقتاعان نۇرجان التاەۆ، «اۋىل جاستارىنىڭ ءبىلىمى» تومەن دەگەن تۇبەگەيلى قاتە ۇعىمدى تەرىسكە شىعارىپ، تۇرعىنداردى قازىرگى زامان تالابىنا ساي ءبىلىم قورىمەن قامتاماسىز ەتۋ ماقساتىندا قازاق جانە اعىلشىن، ورىس تىلدەرىندە سۋ جاڭا كىتاپتار الۋعا دەمەۋشىلىك كورسەتىلگەنىن جەتكىزدى.

سونىمەن قاتار، وسىندا ءجيى جينالۋى كوزدەلگەن اۋىل جاستارى ءوزارا ەركىن سۇحباتتاسىپ، پىكىر الماسۋ جولىمەن كوكجيەكتەرىن كەڭەيتە الادى.

تاعى ءبىر ماڭىزدى دا وزەكتى ماسەلە، وسكەلەڭ ۇرپاققا ۇنەمى جاڭارتىلىپ وتىراتىن كىتاپ قورىنان تابىستى كاسىپكەرلىك سىرلارىنا قانىعىپ، ءساتتى مىسالدارمەن تانىسۋعا مۇمكىندىك تۋاتىن بولادى.

«مىنە، بيىلعى جىلدىڭ قازان ايىنان بەرى زيالى ۇلت قۇرۋ باعدارلاماسىنا كىرىستىك. الدىمىزدا مۇرات ەتكەن بەلەس، ول – اۋىلدىق ورتاداعى جاستاردىڭ دەڭگەيىن كوتەرىپ، الداعى بيىك اسۋلارعا ىنتالاندىرۋ، قالاداعى قاتارلاستارىمەن تەڭەستىرۋ. سوندىقتان، ءبىز، ءاربىر اۋىلدا وسىنداي كىتاپحانالار اشقىمىز كەلەدى. ەلىمىز باسەكەگە قابىلەتتى بولۋ ءۇشىن، وتانداستارىمىز كوپ كىتاپ وقۋى كەرەك. جەكە تۇلعانى مىقتى ەتىپ قالىپتاستىراتىن الەۋمەتتىك جەلىگە سالىناتىن جازبالار مەن سۋرەتتەر ەمەس، كىتاپ. ويتكەنى كىتاپسۇيەر ۇلت قانا كەمەلدەنىپ، گۇلدەنەدى. مىسالى امەريكادا ميللياردەرلەرگە تابىسقا جەتۋ قۇپياسىمەن بولىسۋگە سۇراۋ سالعاندا، ولاردى ەڭ باستىسى بىلىمگە، كىتاپ وقۋعا زور قۇلشىنىستىڭ بىرىكتىرەتىنى بايقالعان»، - دەپ اڭگىمەلەگەن نۇرجان باۋىرجانۇلى جاستاردى دىڭگەگىنەن اجىراماۋعا شاقىردى.

ۇكپ باسقارما توراعاسىنىڭ ورىنباسارى بولاشاقتا ايقىن قاجەتتىلىك اڭعارىلسا، تاعى دا قوسىمشا ىسكەرلىك، تىلدەر ۇيرەنۋ، باسقا دا سالالار تۇرعىسىندا كىتاپتاردى تارتۋ ەتۋگە ءازىر ەكەندىكتەرىن مالىمدەدى.

 بۇدان تىس، كوۆوركينگ-ورتالىق سيپاتىنداعى مەكەمە كومپيۋتەر-نوۋتبۋكتەرمەن جابدىقتالىپ، تۇراقتى تۇردە كىتاپ اۆتورلارى مەن بەلگىلى بيزنەسمەندەر قوناقتا بولىپ، ءدارىس وقىماق. 

اكتسياعا جينالعان ۇستازدار مەن وقۋشىلار، جەرگىلىكتى اتقارۋشى بيلىك وكىلدەرى، كىتاپ وقۋعا قۇمار قالىڭ بۇقارا بۇل قادامدى قۋانا قابىلداعاندارىن ءبىلدىرىپ جاتتى. اسىرەسە، جاس تولقىن قۇندى مالىمەتتەرگە ارمانسىز سۋسىندايتىندارىن ايتىسىپ، مارە-سارە كۇيگە ءتۇستى. 

اقمولا وبلىسى تسەلينوگراد اۋدانى اكىمىنىڭ ورىنباسارى الما ايتقوجينوۆا كەيبىر كەدەرگىلەرگە قاراماستان، وقۋ ۇلگەرىمى ۇزدىك ۇستايتىن اۋىل مەكتەپتەرى وقۋشىلارىن تۇتاس ەل ماقتان تۇتاتىنىن اتاپ ءوتىپ، كاسىپكەرلەر جاناشىرلىعىنىڭ لايىقتى باعاسىن الاتىنىنا سەندىردى.   

قوسشى №1 ورتا مەكتەبىنىڭ وقۋشىلارى اعا بۋىنعا العىستارىن جولداپ، مەرەكەلىك لەنتانى «اتامەكەن» ۇلتتىق كاسىپكەرلەر پالاتاسى  باسقارما توراعاسىنىڭ ورىنباسارى نۇرجان التاەۆ پەن اقمولا وبلىسى تسەلينوگراد اۋدانى ارداگەرلەر كەڭەسىنىڭ توراعاسى بولات تەمىرباەۆ قيدى.

شارا سوڭىندا نۇرجان التاەۆ «اتامەكەن» ۇكپ اتىنان سىيلانعان «100 شاعىن بيزنەسكە ارنالعان جوبا» كىتابىنا قولتاڭباسىن قويىپ، قابىرعاداعى تاقتاعا تىلەك-لەبىزىن قالدىردى.

ەسكە سالا كەتسەك، بۇعان دەيىن وӊتۇستىك قازاقستان وبلىسى "كىتاپسۇيەر ۇلت" رەسپۋبليكالىق قوزعالىسى بويىنشا لەڭگىر ورتالىق كىتاپحاناسىنا جاڭا جيھاز بەن كەڭسە تەحنيكاسى، ءۇش تىلدە كىتاپ قورى تابىستالعان بولاتىن.  

الدابەرگەن كەمپىرباەۆ  

Abai.kz