كەزىندە قىزمەتتىك ءوسۋ جولىندا ءبىراز ۋاقىت قوعام نازارىندا بولعان كەزەڭنەن كەيىن «سامۇرىق قازىنا» ۇاق دا باسقارۋشى ديرەكتور بولىپ تاعايىندالىپ، جەتى جىلداي جۇمىس ىستەگەن دارحان كالەتاەۆ پرەزيدەنت جارلىعىمەن سەناتور بولىپ تاعايىندالدى.

ادام ادامدى ادەتتە وزىنە قاتىناسى تۇرعىسىنان باعالايدى. ال، ەل نازارىندا جۇرگەن ادام بولسا، ول ادامعا قاتىناس كۇردەلەنىپ، كوپ جاعداي جالپى دولبارعا يەك ارتىپ، سىرتتان تون پىشە پىكىر ايتۋ جول الادى. كالەتاەۆتىڭ دا سىرتىنان تون ءپىشىپ، بال اشقاندار كوپ بولدى... ءتىپتى ءوزى شاشقان قۇمالاقتى ءوز ويىنا، ءوز بويىنا شاقتاپ وزىنە ىڭعايلى باعىتتا سويلەتكەندەر دە بولدى. بولا دا بەرەتىن شىعار. بىراق، سىرتتاي باقىلاعان ادام مۇنىڭ ءبارى كالەتاەۆتى سىندىرا العان جوق. كەرىسىنشە، ونى شىڭداپ، العان باعىتىنىڭ ايقىندىعىن بەكەمدەي ءتۇستى. نەگە دەسەڭىز، دارحان امانۇلى تابيعاتىنان جەل سوزگە بولا تۇتىلمەيتىن، مۇجىلمەيتىن ازامات. سەبەبى، كالەتاەۆ  -  ءار نارسەنىڭ شىعۋ جولىن قاراستىراتىن، «ايتتىم، ءبىتتى! ىستە!» دەپ بۇيرىق بەرۋگە ەمەس، تالقىلاپ، اقىلداسىپ، ويلاسىپ شەشۋگە بەيىلدى ادام. مۇنى كوكتەن الىپ، جەردەن قازىپ، ويدان قيىستىرىپ وتىرعان جوقپىز. بىلتىرى vlast.kz ينتەرنەت جۋرنالىنا كولەمدى ءارى اشىق سۇحبات بەرگەندە دارحان امانۇلى ءوزى دە ءسوز اراسىندا ايتقان. ءارى جالپى سۇحباتتىڭ مازمۇنىنان ءبىز ايتقان ادامي قاسيەتتەردى بايقاۋعا بولادى.

ادامي قاسيەت دەمەكشى، وسى ءبىر نارسە قازىر ءبىزدىڭ قوعامدا ازايىپ بارادى دەپ دابىل قاعىپ جاتامىز. ماسەلە بيلىكتە جۇرگەن ادام تۋرالى بولعاندا تىپتەن قارا اسپاندى توندىرەمىز. نەگە دەسەڭ، جالپىلاما جاۋاپ الاسىڭ. ماسەلەن، اۋرۋ، مۇگەدەك بالالارعا ۇنەمى كومەكتەسىپ، ەم-دومعا قاراجات جيناپ، تالاي ءبۇلدىرشىندى اۋرۋدان اراشالاعان ارۋجان سايىندى جۇرت جاقسى بىلەدى. ەندى بۇل جەرگە كالەتاەۆتىڭ قانداي قاتىسى بار دەرسىز. «سامۇرىق قازىناعا» بالالارى اۋىر سىرقاتقا شالدىققان اتا-انالاردان كوپتەپ حاتتار كەلەدى ەكەن. كومەك سۇراعان جانداردىڭ ماسەلەسىن قاراستىرۋ ءۇشىن كوميسسيا جۇمىس ىستەپ، ونى كالەتاەۆ باسقارادى. سودان ءبىر بالاعا كومەكتەسەيىك دەسە، ەكىنشى بالانىڭ دا جاعدايى مۇشكىل. بارىنە كومەكتەسۋ ازاماتتىق مىندەت! نە ىستەۋ كەرەك؟ سودان دارحان امانۇلى ارۋجان سايىنمەن كەزدەسىپ، ماسەلەنى تالقىلاپ، ەمدەلۋگە ءزارۋ بالالارعا ارۋجاننىڭ قايىرىمدىلىق قورى ارقىلى كومەكتەسۋدى قولعا الادى. وسىلايشا، ەل سەنىمىنە كىرگەن قايىرىمدىلىق قور ارقىلى تالاي ءبۇلدىرشىن سىرقاتىن ايىعىپ، قانشاما وتباسىنا شاتتىق ورنادى. مىنە، بۇل ءسوزدىڭ باسىندا ايتقان ادامي قاسيەت دەگەن سوزىمىزگە ناقتى مىسال. قولىنداعى مۇمكىندىگىن پايدالانىپ، قول ۇشىن سوزۋ ەكىنىڭ ءبىرىنىڭ قولىنان كەلمەي تۇرعان زاماندا ءىشىڭ جىليتىن دۇنيە. ول از دەسەڭىز، وسى جاعدايدان سوڭ، اتا-انالاردان ءۇش جۇزگە تارتا العىس ايتقان حاتتار كەلگەن. كالەتاەۆقا وسى حاتتاردى جاريالاپ، جاقسى ات جاساپ قالۋعا كەڭەس بەرگەندەر دە بولعان ەكەن. بىراق، دارحان امانۇلى سانالى تۇردە باس تارتقان. vlast.kz ينتەرنەت جۋرنالىنا بەرگەن سۇحباتىندا بۇل تازا ادامگەرشىلىك ماسەلەسى ەكەنىن، مۇنداي نارسەدەن جاقسى اتقا جارناما جاساۋعا ارىم بارمادى دەپ ءوزى دە اعىنان جارىلعان. ال، ءسىز ءبارىن قارا تۇستە عانا كورگىڭىز كەلەدى... ايتا بەرسەك، كالەتاەۆتىڭ جەتى جىلدا جۇرتقا جاريا ەتپەي-اق اتقارعان شارۋاسى جەتەرلىك.

تىلگە تيەك ەتىپ وتىرعان الگى سۇحباتتا كالەتاەۆ ءوزىن كولەڭكەدە قالدىم دەپ ەسەپتەمەيتىنىن كەرىسىنشە، «سامۇرىق قازىناداعى» جەتى جىلدا ەكونوميكا مەن الەۋمەتتىك سالادا، سپورتتىڭ كەيبىر تۇرلەرىنىڭ سالالىق ماسەلەلەرىن ىشىنەن تانىپ، كوپ نارسە ۇيرەنگەنىن، ۇلكەن مەكتەپ بولعانىن ايتقان. ەندى مىنە، ول تاعى ءبىر بەلەسكە شىقتى – سەناتور بولدى. بۇل بەلەستە دە دارحان امانۇلى ءوزىنىڭ بولمىسىنان تانباي، ۇستانعان باعىتىن ۇشتاپ، جەمىستى جۇمىس ىستەيتىنىنە سەنىم بار.

ءبىز تاڭدى قانشا كۇتكەنىمىزبەن، ول ءبارىبىر ۋاقىتى كەلگەندە عانا اتادى. سول سياقتى ءبىزدىڭ قوعام، جۇيە قالاي بولعاندا دا جاڭارۋعا بەت الدى. سول جاڭارۋدىڭ ءبىر نۇكتەسى قىرىقتىڭ قىرقاسىنا ەندى شىعىپ، تولىسقان شاعىندا سەنات قۇرامىنا كىرىپ وتىرعان دارحان كالەتاەۆ.

نۇرا ماتاي

Abai.kz