كىتاپحانالاردا جەلتوقسان وقيعاسى تۋرالى  تاقىرىپتىق كەش  ءوتىپ سلايدتاردا كورسەتىلەتىن وسى ءبىر سۋرەتتى كورگەن سايىن «بۇل باتىر قىز قازىر بار ما ەكەن؟» دەگەن وي مازالايتىن. مىنە، جەلتوقسان كوتەرىلىسىنە 30 جىل تولىپ جاتسا دا، كوپتەگەن سۋرەتتەگى باتىرلارىمىزدىڭ ەسىمدەرى ءالى بەلگىلى بولعان جوق. مىسالى، مىنا سۋرەتتى قاراڭىزشى. قازىر جەلتوقسانشىلار تۋرالى جازىلعان كىتاپتار بارشىلىق، بىراق سونىڭ بىرىندە وسى سۋرەتتەگى قايسار قىز تۋرالى ءبىر اۋىز ءسوز جوق. جاقىندا فەيسبۋك الەۋمەتتىك جەلىسىنىڭ بەتىندە وسى سۋرەت تاعى دا جاريالاندى.

مەن بۇل سۋرەتتى كورە سالا ادەتىمشە «سۋرەتتەگى قىز  تۋرالى ءبىر دەرەك بار ما ەكەن؟» دەپ  ادەتىمشە ويلانىپ قالدىم.

 – بۇل - مەن، – دەدى سول كەزدە انار راحىمجانوۆا ەسىمدى  كەلىنشەك.

(فەيسبۋك الەۋمەتتىك جەلىسىندەگى سۋرەت)

فەيسبۋك جەلىسىندەگىلەر سۇراقتى جاۋدىرا جونەلدى. كەيبىرى سەنبەيتىندەرىن ءبىلدىردى. «سۋرەتتەگى قىزدىڭ ءوزىم ەكەندىگىن مەن ەشكىمگە دالەلدەۋگە تىرىسپايمىن» دەدى ول.

كوپ ساۋالدارعا جاۋاپ بەرمەدى. «قىسىم كوردىم، كەسىرىم قۇربىما ءتيدى» دەدى ماعان. ءالى كۇنگە دەيىن نەگە ءوزى تۋرالى ايتپاعانىن سۇرادىم. «قاسكەلەڭدە تەرگەۋدە بولدىم، قۇجاتتار ءالى ساقتاۋلى شىعار. الدىمنان، قىرىمنان  سۋرەتكە  ءتۇسىردى، ۇرعان جوق. قازىر الماتىدا تۇرامىن» دەدى.

سۋرەتكە تالاسۋشىلار دا تابىلار. ازىرگە بىلگەنىم - وسى. قالعانىن جۋرناليستەر وزدەرى زەرتتەي جاتار. ءبىر كەزدەگى ازات رۋحتارى جانىشتالعىندىقتان، 30 جىل ءتىس جارماي كەلگەن قاراپايىم قاھارماندارىمىزدى تانىپ-ءبىلىپ جۇرگەنىمىز دۇرىس  شىعار. وسىدان وتىز جىل بۇرىن ولار قازاقتا نامىس بارىن، قازاق دەگەن ەل بار ەكەنىن دۇنيە جۇزىنە پاش ەتتى. يمپەريانىڭ قۇلاۋىن تەزدەتتى. جەلتوقسان كوتەرىلىسى بابالار ارمانداعان تاۋەلسىزدىك جولىنداعى ءىرىلى-ۇساقتى 400 كوتەرىلىستىڭ ءبىرى ەدى. سوندىقتان دا، جۇمباق جاندار ەسىمىن ءبىلىپ، ولاردىڭ ەرلىگىن  جاريالاي جۇرەيىك. تاريحي كۇننىڭ وتىز جىلدىعى جاقىنداپ قالدى. وسى كۇنى جۇمباق جاننىڭ ەسىمىن حالقى ءبىلىپ، قۇرمەت كورسەتىپ، ءتوس بەلگى الىپ جاتسا، كوڭىلگە جۇبانىش قوي. تاۋەلسىزدىگىمىز باياندى بولسىن!

ن.مۇقانوۆا

Abai.kz