شىمكەنتتە قر دەنساۋلىق ساقتاۋ جانە الەۋمەتتىك دامۋ مينيسترلىگى، «مەملەكەتتىك الەۋمەتتىك ساقتاندىرۋ قورى» اق مەن وڭتۇستىك قازاقستان اكىمدىگىنىڭ ۇيىمداستىرۋىمەن «الەۋمەتتىك ساقتاندىرۋ: انا مەن بالانى قولداۋ» تاقىرىبىندا رەسپۋبليكالىق سەمينار ءوتتى. شاراعا مۇددەلى مەملەكەتتىك ورگانداردىڭ، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا وكىلدەرى مەن حالىقارالىق ۇيىمداردىڭ ساراپشىلارى قاتىستى.

سەميناردىڭ ماقساتى – وتباسىلىق جانە دەموگرافيالىق ساياسات سالاسىنداعى وزەكتى ماسەلەلەردى تالقىلاۋ، انا مەن بالانى قولداۋداعى ۇزدىك تاجىريبەنى زەردەلەۋ، سونىمەن بىرگە، وتباسى ينستيتۋتىن نىعايتۋ مەن تۋ، ءومىر ءسۇرۋ ۇزاقتىعى جانە حالىقتىڭ كوشى-قون سالاسىنداعى تۇراقتى ءارى جاعىمدى ديناميكاسىن ساقتاۋ.

سەميناردا ءسوز سويلەگەن قر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى سۆەتلانا جاقىپوۆا ۇكىمەتتىڭ دەموگرافيالىق دامۋ مەن الەۋمەتتىك ساياسات سالاسىنداعى جۇزەگە اسىرىپ جاتقان شارالارى تۋ كورسەتكىشىن ۇلعايتۋعا، ءولىم-ءجىتىم دەڭگەيىن تومەندەتۋگە، حالىقتىڭ كۇتىلەتىن ءومىر ءسۇرۋ ۇزاقتىعىن ارتتىرۋعا، كوشى-قون كورسەتكىشىنىڭ جاعىمسىز سالدودان جاعىمدى سالدوعا وتۋىنە ىقپال ەتىپ وتىرعانىن اتاپ ايتتى.

«2002 جىلدان باستاپ تۋ كورسەتكىشىنىڭ ەداۋىر ۇلعايۋىنىڭ، كوشى-قوننىڭ جاعىمدى ديناميكاسىنىڭ ناتيجەسىندە حالىقتىڭ ءوسىمى بايقالدى: 2016 جىلعى 1 قاڭتاردا 17 ملن. 670,9 مىڭ ادام بولدى»، - دەدى ول.

سونىمەن بىرگە، سۆەتلانا جاقىپوۆا سوڭعى جىلدارى حالىقتى الەۋمەتتىك قورعاۋ جۇيەسىنىڭ كۇشەيگەنىن، ەلىمىزدىڭ الەۋمەتتىك-ەكونوميكالىق ومىرىندەگى جەتەكشى باعىتتاردىڭ ءبىرى بولعانىن اتاپ ايتتى. تەك بيىلعى جىلى زەينەتاقى مەن جاردەماقىلاردى تولەۋگە 2 ترلن. تەڭگە ءبولىندى.

الەمدەگى ەكونوميكالىق تۇراقسىزدىققا قاراماستان، قازاقستاندا مەملەكەتتىڭ ازاماتتار الدىنداعى بارلىق الەۋمەتتىك مىندەتتەمەلەرى ورىندالىپ جاتقانىن ايتىپ ءوتۋ كەرەك»، - دەدى ۆيتسە-مينيستر.

انا مەن بالانى قولداۋعا اسا زور كوڭىل بولىنەدى. 2016 جىلى دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسى قابىلداندى. ول ايەلدەر مەن بالالارعا مەديتسينالىق جانە الەۋمەتتىك كەشەندى قىزمەت كورسەتۋ ءۇشىن بوساندىرۋ مەن بالاعا كومەك قىزمەتىنىڭ بىرىكتىرىلگەن مودەلىن قاراستىرادى. «سونداي-اق، مينيسترلىك قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا جانە وزگە دە مۇددەلى ورگانداردىڭ كومەگىمەن قازاقستان رەسپۋبليكاسىنىڭ 2030 جىلعا دەيىنگى وتباسىلىق جانە گەندەرلىك ساياساتىنىڭ تۇجىرىمداماسىن جاساپ جاتىر»، - دەپ ايتتى سۆەتلانا جاقىپوۆا.

شارا بارىسىندا ءسوز العاندار الەۋمەتتىك قورعاۋ سالاسىنداعى حالىقارالىق تاجىريبەمەن ءبولىسىپ، ەرەسەكتەر مەن بالالاردىڭ دەنساۋلىعىن قورعاۋ بويىنشا، ونىڭ ىشىندە حالىقتىڭ رەپرودۋكتيۆتى دەنساۋلىعى تۋرالى ۇسىنىسدار جاسادى، سونىمەن قاتار، قازاقستاننىڭ دەموگرافيالىق ساياسات سالاسىنداعى، انا مەن بالانى الەۋمەتتىك ساقتاندىرۋ، مەكتەپكە دەيىنگى جانە مەكتەپتەگى ءبىلىم بەرۋ مەن بالانى تاربيەلەۋدەگى نەگىزگى جەتىستىكتەرى تالقىلاندى.

Abai.kz