بۇگىن ەلوردادا 1986 جىلى الماتى قالاسىندا بولعان جەلتوقسان كوتەرىلىسىنىڭ تاريحي جانە حالىقارالىق ماڭىزىنا ارنالعان عىلىمي-پراكتيكالىق كونفەرەنتسيا ءوتتى. كونفەرەنتسيا  بارىسىندا پولياك عالىمى، ازيانى زەرتتەۋ ينستيتۋتىنىڭ پرەزيدەنتى، PhD دوكتورى ۆلادىسلاۆ سوكولوۆسكي پولشادا قايرات رىسقۇلبەكوۆكە ارنالعان پوشتا ماركاسى بولعانىن ءمالىم ەتتى. عالىم جەلتوقسان وقيعاسى تۋرالى 1986-87 جىلدارى پولشادا ەلۋدەن استام مەرزىمدى باسىلىمدا جاريالانعان ماتەريالدارعا شولۋ جاسادى.

پولشاداعى «ىنتىماقتاستىق» (سوليدارنوست) استىرتىن ۇيىمى حالىق قاھارمانى، جەلتوقسان وقيعاسىنىڭ باتىرى قايرات رىسقۇلبەكوۆتىڭ قۇرمەتىنە  1987 جىلدىڭ شىلدە ايىندا  پوشتا ماركاسىن شىعارىپ تۇرعان.  

ماركادا شالقاسىنان قۇلاپ جاتقان ەر ادامنىڭ بەينەسىنىڭ ۇستىندە «ق.رىسقۇلبەكوۆكە راقىمشىلىق جاسالسىن. الما-اتا 18.06.1987» دەپ جازىلعان. گورباچەۆتىڭ سۋرەتىنىڭ استىندا «اشىقتىق قايدا!؟» دەگەن سۇراق تۇر.

— ماركانىڭ استىڭعى جاعىنداعى جازۋ پولياك تىلىنەن اۋدارعاندا «ماركانى ساتۋدان تۇسكەن تابىس «ەركىندىك پەن بەيبىتشىلىك» قوزعالىسىنا بەرىلەدى» دەگەن جازۋ،— دەدى ۆلادىسلاۆ سوكولوۆسكي.

«وسى ورايدا، پولشانىڭ «ىنتىماقتاستىق» ۇيىمى تۋرالى دا از-كەم ايتا كەتەيىك. جۇمىسى توتاليتارلىق رەجيمگە، كوممۋنيستىك جۇيەگە قارسى باعىتتالعان «ىنتىماقتاستىق» پولشا كاسىپوداقتارى بىرلەستىگىنىڭ قىزمەتى 1989 جىلدىڭ ساۋىرىندە عانا زاڭداستىرىلعان. قازىرگى تاڭدا ول پولشا رەسپۋبليكاسىنىڭ كاسىپوداعى دەگەن اتپەن جۇمىسىن جالعاستىرۋدا. ۇيىمنىڭ نەگىزىن قالاعان لەح ۆالەنسا 1983 جىلى «ادام قۇقى ءۇشىن كۇرەسكەر» رەتىندە بەيبىتشىلىك جونىندەگى نوبەل سىيلىعىمەن ماراپاتتالعان» دەپ جازادى «ەگەمەن قازاقستان» گازەتىنىڭ ءتىلىشىسى ارنۇر اسقاروۆ.

سۋرەت baq.kz سايتىنان الىندى

Abai.kz