"تەرگەۋ بارىسىندا كوشى-قون قىزمەتى مەن پوليتسيانىڭ قىزمەت بابىن اسىرا پايدالانعانى انىقتالمادى. بالا ولىمىنە سەبەپ بولاتىن ارەكەتتەر تىركەلمەدى", - دەلىنگەن پەتەربۋرگ قالاسىنىڭ تەرگەۋ باسقارماسىنىڭ ءباسپاسوز قىزمەتى.

سوت-مەديتسينالىق ساراپتاما قورىتىندىسى بويىنشا، بالا ولىمىنە تسيتومەگالوۆيرۋستىق ينفەكتسيلار جانە تۇماۋ سەبەپ بولعان. ناۋقاستانعان بالانىڭ جۇرەك-تىنىس جەتىسپەۋشىلىگى قوزعان، سوڭى ولىمگە الىپ كەلگەن، دەلىنگەن ساراپشىلار قورىتىندىسىندا.

"كىسى ولىمىنە اكەلەتىن قاندايدا ءبىر سىرتقى فاكتورلار انىقتالمادى. مەديتسينالىق كومەكتىڭ جەتىسپەۋشىلىگى بايقالمادى", - دەلىنگەن تەرگەۋ باسقارماسىنىڭ حابارلاماسىندا.

2015 جىلى 13 قازاندا سانكت-پەتەربۋرگ پوليتسياسى كوشى-قون ەرەجەلەرىن بۇزدى دەگەن كۇدىكپەن تاجىكستان ازاماتتارى دالەر نازاروۆ پەن زارينا يۋنۋسوۆانى ۇستادى. ولاردا تىركەۋ قۇجاتتارى بولماي شىقتى. ەكەۋىن ۋاقىتشا ۇستاۋ كامەراسىنا وتىرعىزىپ، بەس ايلىق بالاسى ءومىرالىنى كۇشپەن تارتىپ الدى. 14 قازاندا بالا بەلگىسىز سەبەپتەرمەن كوز جۇمدى.