وڭتۇستىك قازاقستان وبلىسىندا جىل باسىندا تۇساۋى كەسىلگەن «بورتە ميلكا» ءسۇت تاۋارلى فەرماسىندا قازىر 272 باس ءسۇتتى باعىتتاعى «گولشتەين» اسىل تۇقىمدى سيىر بار. بۇل تۋرالى «Abai.kz» اقپاراتتىق پورتالىنىڭ وڭتۇستىك قازاقستان وبلىسىنداعى مەنشىكتى ءتىلشىسى حابارلايدى.

الداعى ۋاقىتتا تاعى 200 باس ساتىپ الىنباق. كۇنىنە 30 ليترگە دەيىن ءسۇت بەرەتىن ءاربىر سيىردان جىلىنا 6 -7 مىڭ ليتر اعارعان الۋ جوسپارلانىپ وتىر. فەرما تولىقتاي شۆەيتساريالىق قۇرىلعىلارمەن جابدىقتالعان. فەرمانى ارالاۋ بارىسىندا وڭتۇستىك قازاقستان وبلىسىنىڭ  اكىمى جانسەيىت تۇيمەباەۆ باسەكەگە بارىنشا قابىلەتتى بولۋ ءۇشىن ءونىمنىڭ ساپاسىنا ايرىقشا ءمان بەرۋ كەرەكتىگىن ەسكەرتىپ، ونى وتكىزۋ ماسەلەسىنە بىرلەسىپ جۇمىس جۇرگىزۋ قاجەتتىگىنە توقتالدى.

ايتا كەتەيىك، اگرو ونەركاسىپ سالالارى ىلگەرى باسقان استىقتى ءوڭىر ەسەپتەلەتىن وڭتۇستىك قازاقستان وبلىسىندا وسى سالادا بيىلعى جىلى وندىرىلگەن ءونىمنىڭ جالپى كولەمى 319,6 ملرد. تەڭگەنى قۇراسا، ونىڭ ىشىندە مال شارۋاشىلىعىندا 150,3 ملرد.، ەگىن شارۋاشىلىعىندا 168,6 ملرد. تەڭگەنىڭ ءونىمى ءوندىرىلدى. 

وڭتۇستىك قازاقستان وبلىسىندا اۋىلشارۋاشىلىق سەكتورى قارقىندى دامىپ كەلەدى. وڭتۇستىككە جاساعان ساپارى كەزىندە مەملەكەت باسشىسى ارنايى تاپسىرمالار بەرىپ، وڭىردەگى اگرو سەكتوردىڭ جۇمىسىن جانداندىرۋدى تاپسىرعان بولاتىن. اسىرەسە وڭتۇستىك قازاقستان وبلىسى، سوزاق اۋدانىنىڭ قاراكول قويلارى بىرىككەن اراب امىرلىكتەرىنە ەكسپورتتالۋى جانە اۋىلشارۋاشىلىق ونىمدەرىنىڭ ەو ەلدەرى نارىعىنا شىعۋى قاجىرلى ەڭبەكتىڭ ۇلكەن جەڭىسى ەكەنى انىق.

Abai.kz