بۇل ءيليننىڭ 2012 جىلعى لوندون وليمپياداسىندا كەزەكتى رەت جەڭىسكە جەتكەن ءساتى. ءسويتىپ ول التىننان القا تاققان بولاتىن. ەندى سول التىن القا كەرى قايتارىلماق. حالىقارالىق انتيدوپينگ قاۋىمداستىعى 18 قازان كۇنى شۇعىل القا-قوتان جيىن وتكىزدى. سول جيىننىڭ شەشىمى بويىنشا يليا يلين باستاعان  قازاقستاندىق اۋىر اتلەتتەر مەدالدارىنان ايرىلاتىن بولدى. "پودوبەدوۆا، مانەزا، چينشانلو جانە يليا يليندەردىڭ لوندون وليمپياداسىندا جەڭگەن مەدالدارى ەندى قايتادان حالىقارالىق وليمپيادا كوميتەتىنە تابىستالۋى ءتيىس"  دەيدى اقپارات كوزدەرى.

رەداكتسيادان: سونىمەن، سوڭعى شەشىم بويىنشا حالىقارالىق كوميتەت سان دودادا توپ جارعان تولاعايلارىمىزدىڭ التىندارىن قايتارىپ الاتىن بولدى. ءبىز ماسەلەنىڭ ءمان-جايىن بىلمەك بولىپ، قر مادەنيەت جانە سپورت مينيسترلىگى، سپورت جانە دەنەشىنىقتىرۋ ىستەرى كوميتەتىنىڭ ءباسپاسوز حاتشىسى باقىتبەك حاميتكە حابارلاستىق.

"اۋىراتلەتتەرگە قاتىستى قانداي دا ءبىر دەرەك مەندە قازىر جوق. نەگىزى حالىقارالىق كوميتەتتىڭ جاۋابى ءبىرىنشى اۋىر اتلەتيكا فەدەراتسياسىنا كەلەدى. سوسىن ولار ول اقپاراتتى قاراستىرىپ بولعان سوڭ عانا بىزگە جىبەرەدى. ال قازىر ونداي اقپارات بىزگە كەلگەن جوق. سوندىقتان ونىڭ راس-وتىرىگىن دە بىلمەيمىن",-دەدى سپورت جانە دەنەشىنىقتىرۋ ىستەرى كوميتەتىنىڭ ءباسپاسوز حاتشىسى.

ءتىپتى، يلين باستاعان اۋىراتلەتتەردىڭ التىننان ايىرىلعانىن ەستىپ اڭىرىپ قالعان مينيسترلىك وكىلى بۇل اقپاراتتىڭ قايدا ءام قاشان جاريالانعانىنان دا بەيحابار بولىپ شىقتى.

سوسىن ءبىز قر اۋىراتلەتيكا فەدەراتسياسىنا حابارلاسىپ، ءمان-جايدى سۇرادىق.

ءوزىن فەدەراتسيانىڭ كادرلىق مامانى دەپ تانىستىرعان ايجان ارمانقىزى، "قازىر ءبىزدىڭ كوپتەگەن قىزمەتكەرلەر ەڭبەك دەمالىسىندا ەدى. ءباسپاسوز قىزمەتىندەگى قىزدار تەك كەلەسى اپتادا بولادى. نەگىزى اۋىراتلەتتەرگە قاتىستى ەشقانداي رەسمي حات كەلىپ تۇسكەن جوق",-دەدى.

Abai.kz