بۇگىن №2 اتىراۋ قالالىق سوتىندا بيىل كوكتەمدە اتىراۋدا «جەر ميتينگىلەرىن» وتكىزگەن ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى ودان ءارى جالعاستى. بۇگىنگى وتىرىستا وقيعاعا قاتىسى بار كۋاگەرلەر – توقتار تولەشوۆتىڭ يەلىگىندە بولعان «دارحان Group» جشس باس ديرەكتورى ءىس باسقارماسىنىڭ باستىعى قىزمەتىن اتقارعان نۇرعالي دوسانباەۆ پەن اتالعان جشس-ءتىڭ تاعى ءبىر قىزمەتكەرى ولجاس بەكباۋوۆتان استانا قالالىق سوتىنان ونلاين تۇردە جاۋاپ الىندى.

دەگەنمەن، بۇگىنگى سوت وتىرىسى بارىسىندا ايىپتالۋشىلار م.بوقاەۆ پەن تالعات ايانوۆ اتالعان كۋاگەرلەردەن جاۋاپ الۋعا كەدەرگى جاساپ كەلدى. تاڭەرتەڭگى سوت وتىرىسىندا ايىپتالۋشىلاردىڭ قورعاۋشىلارى ءىس بويىنشا كۋاگەرلەر اتىراۋ قالالىق سوتىنا كەلىپ جاۋاپ بەرسىن دەگەن ءوتىنىش جاسادى. بىراق، سۋديا گ.داۋلەشوۆا كۋاگەرلەردىڭ دالەلدى سەبەپتەرى بولىپ، وسىعان بايلانىستى ولار رەسمي ءوتىنىش جازعاندىقتان قورعاۋشىلاردىڭ ءوتىنىشىن قاناعاتتاندىرعان جوق بولاتىن. وسىدان كەيىن م.بوقاەۆ سوت پروتسەسىن ءۇزۋ ءۇشىن اۋىرىپ تۇرمىن دەپ شۋ شىعارعاندىقتان سۋديا وتىرىستى تۇستەن كەيىنگە قالدىرۋ تۋرالى شەشىم قابىلدادى. ايىپتالۋشىعا ءدارى ەگىلگەننەن كەيىن ەكى-ءۇش ساعاتقا ءۇزىلىس جاريالانعان بولاتىن. تۇستەن كەيىنگى وتىرىس تا سول وتىنىشتەن باستالدى. تالعات ايانوۆ ەگەر ءوتىنىش قاناعاتتاندىرىلماسا، بۇگىننەن باستاپ اشتىق جاريالاپ، سوتقا قاتىسپايتىندىعىن جانە ادۆوكاتتارىنا دا سوتقا قاتىسپاڭدار دەپ ايتاتىندىعىن جەتكىزدى. ماكس بوقاەۆ ونداي جاعدايدا ول دا سوت وتىرىسىنا قاتىسۋدان باس تارتاندىعىن جەتكىزدى. ال سۋديا گ.داۋلەشوۆا كۋاگەرلەردىڭ اتىراۋعا كەلمەي، ونلاين-كورسەتىلىم ارقىلى قاشىقتىقتان جاۋاپ بەرۋىندە ەشقانداي زاڭ بۇزۋشىلىق جوق، بۇل تالاپ قىلمىستىق-پروتسەسسۋالدىق زاڭنامانىڭ نورمالارىنا قايشى كەلمەيدى دەپ ءتۇسىندىردى. سوندىقتان، سۋديا بۇل ءوتىنىش ەكىنشى رەت قارالمايدى دەدى. ت.ايانوۆ مەن م.بوقاەۆ ادۆوكاتتارىمەن كەڭەسىپ، وتىرىسقا قاتىسپايمىز دەپ ءوتىنىش جازدى. سۋديا ايىپتالۋشىلاردىڭ بۇل شەشىمىن سوتقا قىسىم جاساۋ جانە سوتقا كورسەتىلگەن قۇرمەتسىزدىك ەكەندىگىن اتاپ ءوتتى. سوت زالىندا ايىپتالۋشىلاردىڭ قورعاۋشىلارى عانا وتىردى، بىراق ولار جاۋاپ الۋعا قاتىسپادى.

اتاپ وتسەك، كەشەگى سوت پروتسەسىندە بيلىكتى كۇشپەن باسىپ الىپ، قازاقستاننىڭ ۆيتسە-پرەزيدەنتى بولۋدى كوزدەگەن «سىرا كورولى» توقتار تولەشوۆ 24 ساۋىردە اتىراۋدا تالعات ايانوۆ پەن ماكس بوقاەۆ وتكىزگەن زاڭسىز شەرۋدى ءوزى قارجىلاندىرعانىن تولىق مويىنداعان بولاتىن. ول 2015 جىلدىڭ سوڭىندا ءوزىنىڭ سەنىمدى كومەكشىلەرى ارقىلى 100 مىڭ اقش دوللارى كولەمىندەگى قارجىنى تالعات ايانوۆقا جىبەرگەنىن ايتتى. سونداي-اق، كەشەگى سوت وتىرىسىندا ت.تولەشوۆتىڭ قىزمەتكەرى، ونىڭ قارجىلىق ىستەرىن جۇرگىزگەن ۆ.ۆولكوۆتان جاۋاپ الىندى. ول ت.تولەشوۆتىڭ تاپسىرماسىمەن سىرا زاۋىتىنىڭ «قارا كاسساسىنان» 150 مىڭ اقش دوللارى كولەمىندەگى قارجىنى ەش قۇجات راسىمدەۋسىز ن.دوسانباەۆقا بەرگەنىن جانە ونىڭ نە ماقساتقا قاجەت ەكەندىگىن بىلمەگەنىن جەتكىزدى. سونداي-اق، سوت وتىرىسىندا ت.تولەشوۆ قوسىمشا شىعىندار ءۇشىن 50 مىڭ دوللار ن.دوسانباەۆتا بولعانىن، ال قالعان 100 مىڭ دوللاردى دوسانباەۆ قولما-قول اقشا تۇرىندە ت.ايانوۆقا و.بەكباۋوۆ ارقىلى جىبەرگەنىن ايتقان بولاتىن.

وسى جايلى كۋاگەر ن.دوسانباەۆتىڭ ءوزى اڭگىمەلەپ بەردى.

«ت.تولەشوۆ ماجىلىسكە دەپۋتاتتىققا وتە الماي، ۇزاق ۋاقىت بيلىككە ء«تىسىن قايرادى». ويتكەنى ول سايلاۋالدى ۇگىت-ناسيحات جۇمىستارىنا كوپ قارجى مەن كۇش جۇمساعان ەدى. ول 2015 جىلدان بەرى جەر تاقىرىبىنا، سونىڭ ىشىندە جەر زاڭناماسىن وزگەرتۋگە، جەردى شەتەلدىكتەرگە بەرۋگە قىزىعۋشىلىق تانىتتى»، - دەدى ن.دوسانباەۆ.

كۋاگەردىڭ ايتۋىنشا، ت.تولەشوۆ عالامتور ارقىلى تانىمال قوعام بەلسەندىلەرىن، اسىرەسە، وڭتۇستىكتەن جىراقتاعى باتىس وڭىردەن ىزدەگەن. كوپ ۇزاماي تولەشوۆ باق پەن الەۋمەتتىك جەلىلەردەگى جاريالانىمداردان اتىراۋداعى قارسىلىق اكتسيالارىن وتكىزۋمەن تانىلعان قوعام بەلسەندىسى تالعات ايانوۆتى بايقاپ قالادى. ءسويتىپ، ونى ءوز مۇددەسىن ىسكە اسىرۋعا پايدالانادى.

«تولەشوۆ ماعان اتىراۋلىق تالعات ايانوۆقا 150 مىڭ دوللاردى جىبەرۋدى تاپسىردى. مەن 50 مىڭ دوللارىن قوسىمشا شىعىنعا الىپ قالىپ، قالعان 100 مىڭ دوللارىن جىبەرمەك بولدىم. باستىقپەن اراداعى اڭگىمەدەن ايانوۆتىڭ تولەشوۆتىڭ قانداي ءبىر جوباسىن ىسكە اسىراتىنىن ۇقتىم. اقشانى بانكى ارقىلى اۋدارۋ تۋرالى ۇسىنىسىمدى تولەشوۆ قولداعان جوق. ول ەشكىم بىلمەس ءۇشىن قولما-قول اقشانى سەنىمدى ءبىر ادامنان بەرىپ جىبەرۋدى بۇيىردى»،- دەدى ن.دوسانباەۆ.

دوسانباەۆ و.بەكباۋوۆقا اقشانى جەتكىزۋدى تاپسىرعانىن ايتتى. دوسانباەۆتىڭ ايتۋىنشا، ول اقشا مەن كونۆەرتتى بەكباۋوۆقا 2015 جىلدىڭ جەلتوقسانىنىڭ ەكىنشى جارتىسىندا بەرگەن. جاڭا جىلداعى مەرەكەلىك دەمالىستان ورالعان سوڭ، ول اقشا مەن كونۆەرتتى ت.ايانوۆقا جەتكىزگەنىن باياندادى. «وسىلايشا، مەن تولەشوۆكە «اقشا جونەلتۋ» وپەراتسياسى ءساتتى اياقتالعانىن حابارلادىم»، دەدى ن.دوسانباەۆ. سونداي-اق، ول سوت وتىرىسىندا ت.ايانوۆتى جەكە تانىمايتىندىعىن جانە وزىندە قالعان 50 مىڭ دوللاردىڭ تەرگەۋ بارىسىندا وندىرىلگەنىن ايتتى.

سونداي-اق، سوت وتىرىسىندا تاعى ءبىر كۋاگەر – ولجاس بەكباۋوۆتان جاۋاپ الىندى. ول سوتتاعى جاۋابىندا 2015 جىلدىڭ جەلتوقسان ايىندا اتىراۋعا بارىپ، تالعات ايانوۆپەن كەزدەسىپ، وعان قارجى مەن قۇجاتتار جاتقان پاكەتتى بەرگىنىن راستادى. ول ايانوۆتى فوتودان انىق تانىعانىن ايتتى.

ەسكە سالا كەتسەك، 2016 جىلدىڭ ءساۋىر ايىندا ت.ايانوۆ پەن م.بوقاەۆ جەر زاڭناماسىنا قوعامنىڭ قىزىعۋشىلىعى ارتقان ءساتىن پايدالانىپ، «جەر ماسەلەسى» بويىنشا قارسىلىق اكتسيالارىن ۇيىمداستىرعان. سونداي-اق، ولاردىڭ جەر كودەكسىنە ەنگىزىلگەن تۇزەتۋلەردى الىپ تاستاۋعا قارسىلىق ءبىلدىرۋ ءۇشىن جۇرتتى 21 مامىردا قارسىلىق اكتسياسىنا شىعۋعا شاقىرعاندىعى انىقتالدى. م.بوقاەۆ پەن ت.ايانوۆتىڭ قر قىلمىستىق كودەكسىنىڭ ءۇش بابى بويىنشا ايىپتار تاعىلۋدا. اتاپ ايتساق، ولار: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ءىس-ارەكەتتەر جاساۋ، ازاماتتاردىڭ ۇلتتىق نامىسى مەن قادىر-قاسيەتىنە ءتىل تيگىزۋ; 274 باپتىڭ 4 تارماعى، ياعني، قوعامدىق ءتارتىپتى بۇزۋعا قاۋىپ توندىرەتىن كوپە-كورىنەۋ جالعان اقپارات تاراتۋ; 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ.

Abai.kz